ເລີຟຮັບເກມບຸກອິນຊີເຫຼັກບໍ່ດີເທົ່າທີ່ຄວນຈຶ່ງສະເໝີໂປແລນ

 

ໂຍຄິມ ເລີຟ ນາຍໃຫຍ່ທີມຊາດເຢຍລະມັນກົ້ມໜ້າຮັບເກມບຸກຂອງທີມເຮັດໄດ້ບໍ່ດີໃນເກມທີ່ສະເໝີ ໂປແລນ 0 – 0 ພ້ອມກັບເຜີຍວ່າທີ່ບໍ່ສົ່ງ ມາຣິໂອ ໂກເມດ ຫົວຫອກຕາມທໍາມະຊາດເປັນຕົວຈິງໃນເກມນີ້ເປັນຍ້ອນວ່າແນວຮັບຂອງ ໂປແລນ ຫຼິ້ນລູກກາງອາກາດໄດ້ດີ.

 

ໂຍຄິມ ເລີຟ ເທຣນເນີທີມຊາດເຢຍລະມັນຍອມຮັບວ່າເກມບຸກຂອງທີມເຮັດຜົນງານໄດ້ບໍ່ດີເທົ່າທີ່ຄວນ ຫຼັງຈາກທີ່ພວກເຂົາເຮັດໄດ້ພຽງແຕ່ສະເໝີກັບ ໂປແລນ 0 – 0 ໃນເກມບານເຕະຊິງແຊມແຫ່ງຊາດເອີຣົບ ຢູໂຣ 2016 ຮອບແບ່ງກຸ່ມຂອງ ກຸ່ມ ເຊ ເມື່ອວັນພະຫັດທີ່ຜ່ານມາ.

 

ເກມນີ້ເຢຍລະມັນສົ່ງໂຕບຸກຊື່ດັງຫຼາຍຄົນລົງຫຼິ້ນເປັນຕົວຈິງເຊັ່ນ ມາຣິໂອ ເກິດເຊ, ໂທມັສ ມຸນເລີ, ເມຊຸດ ໂອຊິວ ແລະ ຢູລຽນ ດຣັກສ໌ເລີ ເປັນຕົ້ນ ແຕ່ສຸດທ້າຍພວກເຂົາກໍບໍ່ສາມາດເຈາະບ້ານຂອງ ໂປແລນ ໄດ້.

 

“ຂ້ອຍພໍໃຈກັບເກມຮັບຂອງເຮົາ ແຕ່ວ່າເກມບຸກຂອງເຮົາບໍ່ໄດ້ສ້າງໂອກາດຫຼາຍພໍເທົ່າໃດ ແຕ່ວ່າເກມບຸກຂອງພວກເຂົາກໍສ້າງໂອກາດໄດ້ບໍ່ຫຼາຍເຊັ່ນກັນ ຂ້ອຍບໍ່ໄດ້ສົ່ງ ມາຣິໂອ ໂກເມດ ລົງຫຼິ້ນເປັນຕົວຈິງເພາະວ່າກອງຫຼັງຂອງໂປແລນຫຼິ້ນໄດ້ດີຫຼາຍໃນຈັງຫວະລູກກາງອາກາດ ດັ່ງນັ້ນຂ້ອຍເລີຍຢາກໃຊ້ວິທີການຫຼິ້ນບານທາງພື້ນຂອງ ເກິດເຊ ເກມຮອບແບ່ງກຸ່ມມັນອອກແນວແບບເບິ່ງທາງກັນ ຂ້ອຍຄິດວ່າເກມຮອບຕັດເຊືອກຈະມີການເປີດແລກກັນຫຼາຍກວ່ານີ້” ເລີຟ ລະບຸ.