ເລຂາອາເຈັນຕິນາລັ່ນອຸທອນໂທດແບນແນ່ນອນ

 

ຮໍເກ ມິອາໂດສະກີ ເລຂາທິການຂອງທີມຊາດອາເຈັນຕິນາລະບຸວ່າຈະອຸທອນໂທດແບນ 4 ເກມຂອງ ລິໂອເນວ ເມສຊີ ກອງໜ້າຄົນສຳຄັນແນ່ນອນ ໂວຍເປັນຄຳຕັດສິນທີ່ຮັບບໍ່ໄດ້.

 

ຮໍເກ ມິອາໂດສະກີ ເລຂາທິການຂອງທີມຊາດອາເຈັນຕິນາປະກາດຢືນຢັນເມື່ອວັນອັງຄານທີ່ຜ່ານມາວ່າພວກເຂົາຈະຍື່ນອຸທອນບົດລົງໂທດຂອງສະຫະພັນບານເຕະນາໆຊາດ ຫຼື ຟີຟາ ທີ່ສັ່ງແບນ ລິໂອເນວ ເມສຊີ ດາວຍິງກັບຕັນທີມຄົນເກັ່ງເປັນຈຳນວນ 4 ເກມຢ່າງແນ່ນອນ.

 

ໂທດແບນຂອງ ເມສຊີ ໃນເທື່ອນີ້ກ່ຽວຂ້ອງກັບການທີ່ເຂົາສະແດງທີ່ທາງບໍ່ເໝາະສົມໃສ່ ມາເຊໂລ ຟານ ກາສ ຜູ້ຊ່ວຍຜູ້ຕັດສິນໃນເກມບານໂລກ 2018 ຮອບຄັດເລືອກໂຊນອາເມລິກາໃຕ້ທີ່ບ້ານເກີດຂອງເຂົາຊະນະ ຊີລີ 1-0 ເມື່ອວັນພະຫັດທີ 23 ມິນາທີ່ຜ່ານມາ ໂດຍເຂົາປະຕິເສດທີ່ຈະຈັບມືກັບລາຍແມນລາຍດັງກ່າວຫຼັງຈົບເກມ ເຊິ່ງຕອນທຳອິດກຳມະການ ຊານໂດຣ ຣິດຊີ ບໍ່ໄດ້ລະບຸເຖິງເຫດການນີ້ໃນລາຍງານຂອງເຂົາ ແຕ່ສຸດທ້າຍ ຟີຟາ ກໍລົງມາສອບສວນເອງຫຼັງມີວີດີໂອປ່ອຍອອກມາ.

 

ນອກຈາກຖືກແບນແລ້ວນັ້ນ ເມສຊີ ຍັງຖືກປັບເງິນອີກ 10,000 ຟຣັງສະວິສເຊິ່ງໂທດແບນຂອງເຂົາຈະມີຜົນຕັ້ງແຕ່ເກມບານໂລກ 2018 ຮອບຄັດເລືອກໂຊນອາເມລິກາໃຕ້ທີ່ທັບ “ຟ້າ-ຂາວ” ຕ້ອງພົບກັບ ໂບລິເວຍ ວັນອັງຄານທີ່ 28 ມີນານີ້ (ຕາມເວລາທ້ອງຖິ່ນ) ແລະ ກວ່າທີ່ເຂົາຈະກັບມາຊ່ວຍບ້ານເກີດໄດ້ກໍຕ້ອງຖ້າຈົນຮອດເກມໃນລາຍການດຽວກັນທີ່ຕ້ອງພົບກັບ ເອກວາດໍ ວັນທີ 10 ຕຸລາ.

 

“ເຮົາຮູ້ສຶກຕົກໃຈຫຼາຍກັບຄຳຕັດສິນທີ່ເກີດຂຶ້ນ ເຮົາບໍ່ພໍໃຈກັບການຕັດສິນໃຈເທື່ອນີ້ຫຼາຍໆເພາະມັນເກີດຂຶ້ນຊ່ວງບໍ່ເທົ່າໃດຊົ່ວໂມງກ່ອນທີ່ເຮົາຈະລົງຫຼິ້ນ (ໃນເກມກັບ ໂບລິເວຍ) ເຮົາຈະອຸທອນກັບຄໍາຕັດສິນຂອງ ຟີຟາ ກ່ອນໜ້ານີ້ມັນກໍເຄີຍມີຕົວຢ່າງມາແລ້ວທີ່ບົດລົງໂທດສາມາດຫຼຸດລົງໄດ້ ເມສຊີ ເສຍໃຈກັບເລື່ອງທີ່ເກີດຂຶ້ນຄືກັບພວກເຮົາທຸກຄົນ ເຮົາບໍ່ເຫັນດີກັບແນວທາງການຕັດສິນໃນເລື່ອງນີ້” ມິອາໂດສະກີ ລະບຸ.