ເລຂາທິການໃຫຍ່ ພັກກອມມູນິດຫວຽດນາມ ຕ້ອນຮັບການເຂົ້າຢ້ຽມຂໍ່ານັບ ຂອງ ປະ ທານສະພາແຫ່ງຊາດລາວ

 ຕອນເຊົ້າວັນທີ 8 ກໍລະກົດ ນີ້, ຢູ່ທີ່ຫ້ອງວ່າການສູນກາງພັກ ໃນນະຄອນຫລວງ ຮ່າໂນ້ຍ; ທ່ານນາງ ປານີ ຢາທໍ່ຕູ້ ປະທານສະພາແຫ່ງຊາດລາວ ພ້ອມຄະນະຜູ້ແທນຂັ້ນສູງ ໄດ້ເຂົ້າຢ້ຽມຂ່ຳນັບ ສະຫາຍ ຫງວຽນຝູຈ້ອງ ເລຂາທິການໃຫຍ່ ຄະນະບໍລິຫານງານ ສູນກາງພັກ ກອມມູນິດຫວຽດນາມ ໃນໂອກາດຢ້ຽມຢາມ ແລະ ເຂົ້າຮ່ວມບັນດາການເຄື່ອນໄຫວ ເນື່ອງໃນໂອກາດສະເຫລີມສະຫລອງ 55 ປີ ວັນສ້າງຕັ້ງສາຍພົວພັນການທູດ ແລະ 40 ປີ ວັນເຊັນສົນທິສັນຍາມິດຕະພາບ ແລະ ການຮ່ວມມືລາວ-ຫວຽດນາມ ຢູ່ ແຂວງ ເຊີນລາ ແຫ່ງ ສສ ຫວຽດນາມ.

            ທ່ານນາງ ປານີ ຢາທໍ່ຕູ້ ໄດ້ສະແດງຄວາມຂອບໃຈ ຕໍ່ການຕ້ອນຮັບຢ່າງອົບອຸ່ນ, ສະໜິດສະໜົມ ຂອງສະຫາຍ ເລຂາທິການໃຫຍ່ ຫງວຽນຝູຈ້ອງ ທີ່ມີຕໍ່ຄະນະ ແລະ ສົ່ງຄຳຢື້ຢາມຖາມຂ່າວຈາກສະຫາຍ ເລຂາທິການໃຫຍ່, ປະທານປະເທດ ບຸນຍັງ ວໍລະຈິດ ເຖິງສະຫາຍ ເລຂາທິການໃຫຍ່ຫງວຽນຝູຈ້ອງ.

       ທ່ານນາງ ປານີ ຢາທໍ່ຕູ້ ໄດ້ອວຍພອນ ແລະ ສະແດງຄວາມຍິນດີຕໍ່ຜົນງານ ທີ່ປະຊາຊົນຫວຽດນາມ ຍາດມາໄດ້ ໃນໄລຍະຜ່ານມາ ແລະ ເຊື່ອໝັ້ນວ່າ ພາຍໃຕ້ການນຳພາ ຂອງ ພັກກອມມູນິດຫວຽດນາມ ປະຊາຊົນຫວຽດນາມ ຈະສືບຕໍ່ຍາດໄດ້ຜົນງານໃໝ່ໃຫຍ່ຫລວງກວ່າເກົ່າ ໃນການປ່ຽນແປງໃໝ່, ປະຕິບັດຢ່າງສຳເລັດຜົນ ມະຕິກອງປະຊຸມໃຫຍ່ ຄັ້ງທີ XII ຂອງ ພັກກອມມູນິດຫວຽດນາມ; ສະແດງຄວາມຂອບໃຈ ຢ່າງຈິງໃຈ ຕໍ່ການສະໜັບສະໜູນ, ຊ່ວຍເຫລືອ ແລະ ມີປະສິດທິຜົນ ຊຶ່ງຫວຽດນາມ ມີໃຫ້ແກ່ລາວ ໃນເມື່ອກ່ອນ ຈົນເຖິງປະຈຸບັນ.

       ທ່ານນາງ ປານີ ຢາທໍ່ຕູ້ ຍັງໄດ້ລາຍງານສະພາບການໂດຍຫຍໍ້ ຂອງ ລາວ ໃນໄລຍະຜ່ານມາ, ຜົນການເຂົ້າຮ່ວມການເຄື່ອນໄຫວ ສະເຫລີມສະຫລອງ ປີສາມັກຄີມິດຕະພາບລາວ-ຫວຽດນາມ 2017 ຢູ່ ແຂວງ ເຊີນລາ ແລະ ຜົນການສຳມະນາລະຫວ່າງ ສອງສະພາ ກໍຄື ການພົວພັນຮ່ວມມືລະຫວ່າງ ສອງສະພາ ໃນໄລຍະຜ່ານມາ ພ້ອມທັງຢັ້ງຢືນວ່າ ສະພາແຫ່ງຊາດລາວ ຈະປະສານສົມທົບ ຢ່າງແໜ້ນແຟ້ນ ກັບສະພາແຫ່ງຊາດຫວຽດນາມ ໃນການປະຕິບັດ ໃຫ້ເກີດດອກອອກຜົນ ບັນດາຂໍ້ຕົກລົງລະຫວ່າງການນຳພັກ-ລັດ ຂອງ ສອງປະເທດ ແລະ ຂໍ້ຕົກລົງການ ຮ່ວມມືລະຫວ່າງສອງສະພາ.

      ສະຫາຍ ເລຂາທິການໃຫຍ່ ຫງວຽນຝູຈ້ອງ ໄດ້ສະແດງການຕ້ອນຮັບຢ່າງອົບອຸ່ນ, ສະໜິດສະໜົມ ແລະ ໄດ້ຕີລາຄາສູງຕໍ່ ປະທານສະພາແຫ່ງຊາດລາວ ປານີ ຢາທໍ່ຕູ້ ທີ່ເຂົ້າຮ່ວມການເຄື່ອນໄຫວ ສະເຫລີມສະຫລອງ 55 ປີວັນສ້າງຕັ້ງສາຍພົວພັນການທູດ ແລະ 40 ປີວັນເຊັນສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດນາມ. ສະຫາຍເລຂາທິການໃຫຍ່ ໄດ້ຕີລາຄາສູງ ຕໍ່ຄວາມໝາຍ ຄວາມສຳຄັນ ທີ່ສອງປະເທດ ໄດ້ພ້ອມກັນຈັດຕັ້ງສະເຫລີມສະຫລອງ ສອງເຫດການສຳຄັນ ໃນຄວາມສຳພັນລາວ-ຫວຽດນາມ.

         ສະຫາຍ ເລຂາທິການໃຫຍ່ ຫງວຽນຝູຈ້ອງ ໄດ້ສະແດງຄວາມຍິນດີຕໍ່ຜົນງານ ທີ່ ສປປ ລາວ ຍາດມາໄດ້ ໃນໄລຍະຜ່ານມາ, ເປັນຕົ້ນແມ່ນພາຍຫລັງ ປະຕິບັດມະຕິກອງປະຊຸມໃຫຍ່ຄັ້ງທີ X ຂອງ ພັກປະຊາຊົນ ປະຕິວັດລາວ ພ້ອມທັງກ່າວຢ້ຳວ່າ ຫວຽດນາມ ຈະເຮັດສຸດຄວາມສາມາດ ຂອງ ຕົນ ໃນການສະໜັບສະໜູນ ຢ່າງຮອບດ້ານ ຕໍ່ພາລະກິດການປ່ຽນແປງໃໝ່, ປົກປັກຮັກສາ ແລະ ສ້າງສາປະເທດຊາດ ແລະ ເຊື່ອໝັ້ນວ່າ ພາຍໃຕ້ການນຳພາ ຂອງ ພັກປະຊາຊົນ ປະຕິວັດລາວ, ປະຊາຊົນລາວ ຈະສືບຕໍ່ຍາດໄດ້ຜົນສຳເລັດໃຫຍ່ຫລວງກວ່າເກົ່າ ໃນພາລະກິດການປ່ຽນແປງໃໝ່, ປະຕິບັດຢ່າງສຳເລັດຜົນ ມະຕິກອງປະຊຸມໃຫຍ່ຄັ້ງທີ X ຂອງ ພັກປະຊາຊົນ ປະຕິວັດລາວ. ສະຫາຍ ເລຂາທິການໃຫຍ່ ຕີລາຄາສູງ ຕໍ່ຜົນການຮ່ວມມືລະຫວ່າງສອງສະພາ ໃນໄລຍະຜ່ານມາ ແລະ ໃນຕໍ່ໜ້າ ສອງສະພາ ຈະຕ້ອງເພີ່ມທະວີການຮ່ວມມືກັນ ໃນການແລກປ່ຽນຂໍ້ມູນຂ່າວສານ, ບົດຮຽນ, ປະສົບການໃນຂົງເຂດດ້ານກົດໝາຍ, ເພີ່ມທະວີການກວດກາ, ຕິດຕາມ, ຊີ້ນຳບັນດາກະຊວງ, ຂະແໜງການ, ທ້ອງຖິ່ນ ນັບທັງບັນດາວິສາຫະກິດ ໃນການເສີມຂະຫຍາຍ ແລະ ປະຕິບັດ ຖະແຫລງການຮ່ວມລາວ-ຫວຽດນາມ ແລະ ບັນດາຂໍ້ຕົກລົງລະຫວ່າງການນຳຂັ້ນສູງ ຂອງ ສອງປະເທດ.

         ສະຫາຍ ເລຂາທິການໃຫຍ່ ສະເໜີໃຫ້ທັງສອງຝ່າຍ ປະສານງານກັນຢ່າງໃກ້ຊິດ ໃນການຈັດບັນດາກິດຈະກຳ ການເຄື່ອນໄຫວ ປີສາມັກຄີ ມິດຕະພາບ 2017. ໂຄສະນາ ໃຫ້ກວ້າງຂວາງເຖິງບັນດາຊັ້ນຄົນ, ເປັນຕົ້ນແມ່ນຄົນຮຸ້ນໜຸ່ມ ລະຫວ່າງສອງປະເທດ ແລະ ເພື່ອນມິດສາກົນ ໃຫ້ເຂົ້າໃຈຕໍ່ຄວາມສາມັກຄີພິເສດລາວ-ຫວຽດນາມ. ສະຫາຍ ເລຂາທິການໃຫຍ່ ໄດ້ລາຍງານ ສະພາບລວມ ຂອງ ຫວຽດນາມໂດຍຫຍໍ້ ໃນໄລຍະຫລັງໆ ມານີ້ ພ້ອມທັງສົ່ງຄຳຢື້ຢາມຖາມຂ່າວ ເຖິງສະຫາຍເລຂາທິການໃຫຍ່, ປະທານປະເທດ ບຸນຍັງ ວໍລະຈິດ ແລະ ບັນດາສະຫາຍການນຳຂັ້ນສູງພັກ, ລັດ ແລະ ປະຊາຊົນລາວ ທຸກທົ່ວໜ້າ.

         ສະຫາຍ ເລຂາທິການໃຫຍ່ຫງວຽນຝູຈ້ອງ ແລະ ທ່ານນາງ ປານີ ຢາທໍ່ຕູ້ ປະທານສະພາແຫ່ງຊາດລາວ ມີຄວາມເພິ່ງພໍໃຈຕໍ່ຜົນງານ ທີ່ພັກ, ລັດຖະບານ ຂອງ ແຕ່ລະປະເທດຍາດມາໄດ້, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງລາວ-ຫວຽດນາມ ນັບມື້ຂະຫຍາຍຕົວ ແລະ ກ້າວສູ່ລວງເລິກ, ແທດເໝາະກັບຕົວຈິງ ແລະ ເກີດດອກອອກຜົນ ໃນຫລາຍຂົງເຂດ, ປະກອບສ່ວນສຳ ຄັນເຂົ້າໃນການປົກປັກຮັກສາ ແລະ ສ້າງສາປະເທດຊາດ ຂອງ ແຕ່ລະປະເທດ. ສອງຝ່າຍໄດ້ຢືນຢັນວ່າ ຈະພ້ອມກັນປົກປັກຮັກສາ, ເສີຂະຫຍາຍຄວາມສຳພັນທີ່ເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານລາວ-ຫວຽດນາມ ໃຫ້ໝັ້ນຄົງຕະຫລອດໄປ.

ຂໍ້ມູນຈາກ: ສຳນັກຂ່າວສານປະເທດລາວ