ເຣອັນ ມາດຣິດ ຕ້ອງການດຶງໂຕ ເອເດັນ ອາຊາ ເສີມທັບໃນລະດູການໜ້າ

ເຣອັນ ມາດຣິດ ຕົກເປັນຂ່າວວ່າຈະດຶງໂຕ ເອເດັນ ອາຊາ ນັກເຕະກອງກາງຂອງ ເຊວຊີ ມາເສີມທັບໃນລະດູການໜ້າ ເຖິງວ່າ “ສິງບລູ” ປະກາດວ່າຈະບໍ່ມີທາງຂາຍນັກເຕະຄົນນີ້ເດັດຂາດກໍຕາມ ຄາດວ່າ “ລາຊາຊຸດຂາວ” ພ້ອມທີ່ຈະຍື່ນຂໍ້ສະເໜີເຖິງ 60 ລ້ານປອນ ສໍາລັບນັກເຕະເບວຢ້ຽມທີ່ກຳລັງປະສົບກັບບັນຫາຟອມການຫຼິ້ນຕົກໃນລະດູການນີ້.

“ລາຊາຊຸດຂາວ” ເຣອັນ ມາດຣິດ ສະໂມສອນຍັກໃຫຍ່ແຫ່ງ ລາ ລີກາ ສະເປນ ຕົກເປັນຂ່າວວ່າສົນໃຈທີ່ຈະດຶງໂຕ ເອເດັນ ອາຊາ ນັກເຕະກອງກາງໂຕສ້າງສັນເກມຂອງ ເຊວຊີ ສະໂມສອນຍັກໃຫຍ່ຈາກແດນຜູ້ດີ ພຣີເມຍລີກ ອັງກິດ ເຂົ້າມາເສີມທັບໃນຊ່ວງລະດູການໜ້າ ຈາກການລາຍງານເມື່ອວັນຈັນທີ 19 ຕຸລາທີ່ຜ່ານມາ.

ເຊວຊີ ຢືນຢັນວ່າ ນັກເຕະອາຍຸ 24 ປີ ຄົນນີ້ທີ່ຫາກໍຕໍ່ສັນຍາສະບັບໃໝ່ອອກໄປ 5 ປີເຄິ່ງໃນເດືອນກຸມພາ ບໍ່ໄດ້ມີໄວ້ຂາຍ ໂດຍທີ່ ໂຊເຊ ມູຣິນໂຢ ນາຍໃຫຍ່ທີມ ເຊວຊີ ເຄີຍປະກາດໄວ້ວ່າ ສະໂມສອນໃດທີ່ຕ້ອງການນັກເຕະຄົນນີ້ຕ້ອງຍື່ນຂໍ້ສະເໜີ 100 ລ້ານປອນ ສຳລັບຂາແຕ່ລະເບື້ອງຂອງນັກເຕະ ຈຶ່ງຈະເຮັດໃຫ້ພວກເຂົາພິຈາລະນາທີ່ຈະຂາຍອອກໄປ.

ຢ່າງໃດກໍຕາມ ລ່າສຸດ ສື່ສະເປນ ລາຍງານວ່າ ເຣອັນ ມາດຣິດ ພ້ອມທີ່ຈະຍື່ນຂໍ້ສະເໜີຂໍຊື້ ອາຊາ ໂດຍມີການຄາດວ່າຄ່າໂຕຂອງເຂົາອາດຈະຫຼາຍກວ່າ 60 ລ້ານປອນ ແລະ “ລາຊາຊຸດຂາວ” ກໍຢາກໄດ້ມາເປັນສະມາຊິກໃໝ່ໃນຊ່ວງພັກລະດູການໜ້າ ກ່ອນທີ່ລາຄາຂອງນັກເຕະຈະສູງຂຶ້ນຫຼາຍກວ່ານີ້.

ຂະນະທີ່ ບາເຢິນ ມິວນິກ ຍອດທີມຈາກ ເຢຍລະມັນ ກໍເຄີຍມີຂ່າວຢາກໄດ້ ອາຊາ ຮ່ວມທີມເຊັ່ນດຽວກັນ ແຕ່ກໍລົ້ມເລີກຄວາມຄິດໄປ ໂດຍປັດຈຸບັນ ດາວເຕະຄົນນີ້ກຳລັງຟອມການຫຼິ້ນຕົກ ແລະ ຍັງບໍ່ສາມາດຍິງປະຕູໄດ້ໃນ ພຣີເມຍລີກ ລະດູການນີ້.

................................................................................................................................................................................

 

ບົດຄວາມໃຫມ່ໆ