ເຢຍລະມັນ ສະໜັບສະໜູນແຜນຍຸດທະສາດໃໝ່ແມ່ນ້ຳຂອງ 7 ລ້ານເອີໂຣ

ລັດຖະບານ​ ເຢຍລະ​ມັນ ໄດ້ຕົກລົງໃຫ້ ການຊ່ວຍເຫລືອ ​ໂດຍ​ຜ່ານກະຊວງ​ ການ​ຮ່ວມ​ມື​ດ້ານ​ເສດຖະກິດ ​ແລະ ການ​ພັດທະນາ​ ຂອງ​ເຢຍລະ​ມັນ (BMZ) ຈຳນວນ 7 ລ້ານ​​ເອີ​ໂຣ ​ຫລື ປະມານ 70 ຕື້ກີບ ໃຫ້​ແກ່​ຄະ​ນະ​ກຳມາ​ທິການ ​ແມ່ນ້ຳຂອງ​ສາກົນ (MRC) ​ເພື່ອ​ສະໜັບສະໜູນ​ ແຜນ​ຍຸດ​ທະ​ສາດ​​ໃໝ່​ໄລຍະ 5 ປີ (2016-2020) ຂອງ MRC ທີ່​​ສຸມ​ໃສ່ການ​ເສີມ​ສ້າງ​ ຄວາມ​ເຂັ້ມ​ແຂງ​ ໃນ​ການ​ຮ່ວມ​ມື​ລະດັບ​ພາກ​ພື້ນ, ການ​ພັດທະນາ​ ພະລັງງານ​ນ້ຳ​ແບບ​ຍືນ​ຍົງ ​ແລະ ການ​ປັບ​ຕົວ​ກັບ​ ການ​ປ່ຽນ​ແປງ​ດິນ​ຟ້າ​ອາກາດ.

ພິທີ​​ລົງນາມໃນສັນຍາ ​ການ​ຊ່ວຍ​ເຫລືອ​ດັ່ງກ່າວ ​ໄດ້​ຈັດ​ຂຶ້ນ ​ໃນ​ວັນ​ທີ 29 ກັນຍາ​ນີ້ ຢູ່ນະຄອນ ຫລວງ​ວຽງ​ຈັນ ລະຫວ່າງ ທ່ານ ພາມ ຕວນ ພານ (Pham Tuan Phan) ຫົວໜ້າ​ຜູ້​ບໍລິຫານ ກອງ​ເລຂາ MRC ​ແລະ ທ່ານ ​ແອ​ສທ ຮຸດ​​ເຕັດ (Ernst Hustaedt) ຜູ້ຕາງໜ້າ GIZ ປະຈຳ​ ສປປ ລາວ ​ແລະ ທ່ານ ​ເບີດ​ທຣອນ ມີ​ເນຍ (Bertrand Meinier) ຫົວໜ້າ​ແຜນ​ງານ​ ການ​ຮ່ວມ​ມື MRC/GIZ.

ລັດຖະບານ ​ເຢຍລະ​ມັນ ​​ໄດ້​ໃຫ້ການ​ສະໜັບສະໜູນ MRC ຕັ້ງ​ແຕ່​ປີ 2003 ​ເປັນຕົ້ນມາ ​ເຊິ່ງຕະຫລອດ​ໄລຍະ​ດັ່ງກ່າວ ​ເຢຍລະ​ມັນ ​ໄດ້​ປະກອບສ່ວນ ຈຳນວນ 24 ລ້ານ​ເອີ​ໂຣ ຫລື ປະມານ 240 ຕື້ກີບ ​ໃຫ້​ແກ່ MRC ​ເພື່ອ​ປະຕິບັດ​ກິດຈະກຳ ​ໃນ​ການ​ຄຸ້ມ​ຄອງ​ ຊັບພະຍາກອນ​ນ້ຳ ​ແບບ​ປະສົມ​ປະສານ, ການ​ປັບປຸງ​ ຕາມ​ການ​ປ່ຽນ​ແປງ ​ດິນ​ຟ້າ​ອາກາດ, ຫລຸດຜ່ອນ​ອຸ​ທົກ​ກະ​ໄພ​ ​ແລະ ການ​ພັດທະນາ​ພະລັງງານ​ນ້ຳ​ ແບບ​ຍືນ​ຍົງ.

ຂໍ້ມູນຈາກ: