ເມື່ອຄວາມໂລບມາບັງໜ້າ ລົງມືຂ້າຊາວຕ່າງດ້າວ

ຕາມບົດລາຍງານລະບຸວ່າ: ໃນຄັ້ງວັນທີ 18 ຕຸລາ 2015 ຜ່ານມານີ້ໄດ້ມີເຫດການຄາດຕະກໍາຄົນຈີນຢູ່ບ້ານ ແກ້ງກອກເໜືອ ເມືອງ ຈຳພອນ ແຂວງ ສະຫວັນນະເຂດ ຜ່ານການສືບສວນ-ສອບສວນຮອດວັນທີ 27 ຕຸລາ 2015 ຈຶ່ງສາມາດກັກຕົວເປົ້າໝາຍທີ່ລົງມືກໍ່ເຫດໄດ້ຈຳນວນ 2 ຄົນຄື: ທ້າວ ເມກສະໝອນ ອາຍຸ 14 ປີ, ນັກຮຽນ ຢູ່ບ້ານແກ້ງກອກທົ່ງ ແລະ ນາງ ພອນໄຊ ຫຼື ລີ້ ອາຍຸ 14 ປີ, ນັກຮຽນ ຢູ່ບ້ານ ແກ້ງກອກເໜືອ ທັງສອງຄົນຢູ່ເມືອງຈຳພອນ ແຂວງສະຫວັນນະເຂດ. ຜ່ານການສືບສວນ-ສອບສວນ ທ້າວເມກສະໝອນ ໄດ້ຮັບສາລະພາບວ່າ: ຕົນເອງໄດ້ຖືອາວຸດມີດ 2 ດວງ ຈາກນັ້ນກໍໄດ້ງັດຫ້ອງແລ້ວເຂົ້າໄປຫ້ອງນອນຄົນຈີນເຫັນຜູ້ຕາຍນອນຄົນດຽວເລີຍລົງມືຂ້າທັນທີ. ພາຍຫຼັງຂ້າສຳເລັດແລ້ວກໍໄດ້ໄປເອີ້ນເອົານາງພອນໄຊ ຫຼື ລີ້ ເພື່ອເຂົ້າມາງັດເອົາເງິນໃນຕູ້ນິລະໄພ (ຕູ້ເຊັບ) ໄດ້ເງິນສົດອອກໄປຄັ້ງນີ້ມີ: ໂທລະສັບ ໄອໂຟນ 5s 1 ໜ່ວຍ, ເງິນສົດຈຳນວນ 74 ລ້ານກວ່າກີບ ແລະ ເງິນສົດ 331.990 ບາດ (ສະກຸນເງິນໄທ). ພາຍຫຼັງທີ່ໄດ້ຊັບສິນດັ່ງກ່າວແລ້ວພວກກ່ຽວກໍໄດ້ນຳໄປຝັງດິນໄວ້ຢູ່ທົ່ງນາຂ້າງເຮືອນທ້າວເມກສະໝອນ, ສ່ວນອາວຸດທີ່ນຳໃຊ້ເຂົ້າໃນການຄາດຕະກໍ​ໄດ້ນຳໄປຝັງດິນໄວ້.

ສ່ວນນາງພອນໄຊ ກໍໄດ້ຮັບສາລະພາບວ່າ: ພວກກ່ຽວແມ່ນໄດ້ຮ່ວມກັນວາງແຜນຄາດຕະກຳ ແຕ່ໃນມື້ລົງມືກໍ່ເຫດດັ່ງກ່າວຕົນເອງແມ່ນໄດ້ຕິດຕາມຢູ່ທາງນອກ ຈາກນັ້ນທ້າວເມກສະໝອນກໍໄດ້ເອີ້ນເຂົ້າໄປຊອກຄົ້ນເອົາຊັບສິນຢູ່ໃນຫ້ອງຄົນຕາຍ. ສ່ວນແຮງຈຸງໃຈໃນການກໍ່ເຫດຄັ້ງນີ້ແມ່ນຍ້ອນຢາກໄດ້ໂທລະສັບ ໄອໂຟນ 5s, ລົດຈັກ CBR ແລະ ເງິນຄຳເພື່ອນຳໄປໃຊ້ຈ່າຍ.

ແຫຼ່ງຂ່າວ: ສະຫວັນພັດທະນາ ຂ່າວ/ Svanhphuttana News

ບົດຄວາມໃຫມ່ໆ