ເມືອງວິລະບູລີ ມີ 64 ບ້ານ ຖືກກະທົບຈາກພາຍຸດອກສຸຣິ

ໃນອາທິດຜ່ານມາ ທ່ານ ຄຳພູນ ຕຸໄພທູນ ຮອງເຈົ້າແຂວງສະຫວັນນະເຂດ ພ້ອມຄະນະ ໄດ້ລົງຢ້ຽມຢາມ ແລະ ຕິດຕາມສະພາບຄວາມເສຍຫາຍ ທີ່ເກີດຈາກພາຍຸພັດເຂົ້າຖະຫຼົ່ມ ທີ່ເມືອງວິລະບູລີ ໃນວັນທີ 15 ກັນຍາຜ່ານມາ.

ໂອກາດນີ້, ທ່ານຮອງເຈົ້າແຂວງ ກໍ່ໄດ້ຮັບຟັງການລາຍງານສະພາບ ຄວາມເສຍຫາຍ ແລະ ຜົນກະທົບຂອງພາຍຸດອກສຸຣິ ຈາກຄະນະພັກຮາກຖານເຂດກຸ່ມບ້ານທີ 5 ເມືອງແສນ ເຊິ່ງເຂດນີ້ແມ່ນເປັນເຂດໜຶ່ງ ທີ່ໄດ້ຮັບຜົນເສຍຫາຍໜັກຈາກພາຍຸດັ່ງກ່າວ. ພ້ອມນີ້, ທ່ານ ຄຳພູນ ຕຸໄພທູນ ກໍ່ໄດ້ສະແດງຄວາມເປັນຫ່ວງເປັນໃຍ ແລະ ສອບຖາມຄວາມສຸກທຸກຂອງພໍ່ແມ່ປະຊາຊົນ ຜູ້ທີ່ໄດ້ຮັບຜົນກະທົບຈາກພາຍຸດອກສຸຣິ ພ້ອມທັງໄດ້ມອບເຄື່ອງຊ່ວຍເຫຼືອບັນເທົາທຸກຈຳນວນໜຶ່ງ ເພື່ອເປັນກຳລັງໃຈໃຫ້ພໍ່ແມ່ປະຊາຊົນໃນກຸ່ມບ້ານດັ່ງກ່າວ ແລະ ຍັງໄດ້ມີການມອບເງິນຈຳນວນ 5 ລ້ານກີບ ໃຫ້ຄອບຄົວ ທ້າວ ໂພສາ ອາຍຸ 43 ປີ ປະຊາຊົນບ້ານຂົວງະ ທີ່ຖືກຕົ້ນໄມ້ລົ້ມທັບຄາຖຽງນາ ເຮັດໃຫ້ຜູ້ກ່ຽວເສຍຊີວິດຄາທີ່. ຕໍ່ມາທ່ານຮອງເຈົ້າແຂວງ ກໍ່ຍັງໄປຢ້ຽມຢາມ ແລະ ມອບເຄື່ອງບັນເທົາທຸກໃຫ້ປະຊາຊົນ ບ້ານສົບສະລຸງ ແລະ ບ້ານສະເລາະ ເຂດຈຸດສຸມອ່າງຄຳອີກດ້ວຍ.

ສຳລັບຜົນກະທົບຈາກພາຍຸດອກສຸຣິ ທີ່ພັດເຂົ້າຖະຫຼົ່ມ ເມືອງວິລະບູລີ ຄັ້ງນີ້ ໄດ້ສ້າງຄວາມເສຍຫາຍເປັນຈຳນວນຫຼາຍ ໃຫ້ແກ່ປະຊາຊົນ 64 ບ້ານ 1,940 ຄອບຄົວ, ຫຼັງຄາເຮືອນເປ່ເພ 1,169 ຫຼັງ; ຜົນຜະລິດກະສິກຳທີ່ຖືກນ້ຳຖ້ວມມີ: ເຂົ້ານາປີ 452.1 ເຮັກຕາ, ໄຮ່ 21 ເຮັກຕາ, ຄັນຄູໜອງປາຂາດ 140 ໜອງ, ຕົ້ນໄມ້ອຸດສາຫະກຳ 37,884 ຕົ້ນ, ຕົ້ນໄມ້ກິນໝາກ 4,575 ຕົ້ນ, ງົວ, ຄວາຍ, ແບ້ ແລະ ໝູຖືກນ້ຳຖ້ວມຕາຍ 97 ໂຕ, ສັດປີກ 728 ໂຕ.

ສ່ວນດ້ານຊັບສິນຂອງລັດ ເສຍຫາຍປະກອບມີ: ໂຮງຮຽນ 20 ຫຼັງ, ຫໍພັກຄູ ແລະ ນັກຮຽນ 4 ຫຼັງ, ຫ້ອງນ້ຳຂອງໂຮງຮຽນ 4 ຫຼັງ, ສຸກສາລາ 1 ຫຼັງ, ສະໂມສອນຈຸດສຸມ 1 ຫຼັງ, ຫ້ອງການບ້ານ 3 ຫຼັງ, ອາຄານຫ້ອງການ ສູນເຕັກນິກກະສິກຳ 1 ຫຼັງ, ຫ້ອງການ ປກສ ໜ່ວຍບໍລິການປະຊາຊົນ 4 ຫຼັງ, ເສົາໄຟຟ້າຫັກ ແລະ ລົ້ມ 20 ຕົ້ນ ແລະ ເສັ້ນທາງຄົມມະນາຄົມຖືກຕັດຂາດ 5 ເສັ້ນ.

ປັດຈຸບັນນີ້ ທາງການນຳຂອງ ເມືອງວິລະບູລີ ກໍ່ກຳລັງເລັ່ງຊ່ວຍເຫຼືອແກ້ໄຂຊີວິດການເປັນຢູ່ຂອງພໍ່ແມ່ປະຊາຊົນ ຜູ້ທີ່ຖືກຜົນກະທົບຈາກພາຍຸດັ່ງກ່າວຢ່າງຮີບດ່ວນ ແລະ ທັນການ. ການນຳຂັ້ນແຂວງກໍ່ໄດ້ມອບເຄື່ອງອຸປະໂພກ – ບໍລິໂພກ ທີ່ຈຳເປັນໃນຊີວິດປະຈຳວັນ ໃຫ້ແກ່ປະຊາຊົນທີ່ປະສົບກັບໄພພິບັດທາງທຳມະຊາດໃນຄັ້ງນີ້ອີກດ້ວຍ.