ເມືອງປາກຊ່ອງ ຫັນມາປູກພືດປອດສານພິດ ເປັນສິນຄ້າເພ່ືອການສົ່ງອອກ

​ເມືອງ​ປາກ​ຊ່ອງ ​ແຂວງ​ຈໍາປາ​ສັກ ​ເປັນ​ອີກ​ເມືອງ​ໜຶ່ງ​ ທີ່ມີ​ທ່າ​ແຮງ​ບົ່ມ​ຊ້ອນ ດ້ານ​ຊັບພະຍາກອນ​ດິນ ​ແລະ ປ່າ​ໄມ້ ​ທີ່​ມີ​ຄຸນຄ່າ​ເໝາະ​ສົມ​ ກັບ​ການຈະ​ເລີ​ນ​ເຕີບ​ໂຕ​ ຂອງ​ຊີວະນາໆ​ພັນ, ​ເປັນ​ເຂດ​ທີ່​ເໝາະ​ສົມ​ ກັບ​ການ​​ຜະລິດ​ກະ​ສີ​ກໍາ ​ເປັນ​ຕົ້ນ ການ​ປູກ​ກາ​ເຟ​ເປັນ​ສິນຄ້າ, ການ​ປູກ​ພຶດຜັກ​ປອດ​ສານພິດ ຕິດ​ພັນ​ກັບ​ການ​ປຸງ​ແຕ່ງ.

ທ່ານ ຄໍາສີ ປ່ຽງ​ວໍລະ​ວົງ ​ເລຂາ​ຄະນະບໍລິ​ຫານງານ​ພັກ ​ເມືອງ​ປາກ​ຊ່ອງ ​ໄດ້​ລາຍ​ງານ​ຕໍ່​ກອງ​ປະຊຸມ​​​ໃຫຍ່ ​ຄັ້ງ​ທີ VII ອົງຄະ​ນະ​ພັກ​ແຂວງ​ຈໍາປາ​ສັກ ທີ່​ຜ່ານ​ມາ​ໃຫ້​ຮູ້​ວ່າ: ປະຊາຊົນ​ສ່ວນ​ໃຫຍ່​ແມ່ນ ​ຖື​ເອົາ​ການ​ປູກ​ຝັງ​ເປັນ​ອາຊີບ​​ຕົ້ນຕໍ, ການ​ຜະລິດ​ພືດ​ຜັກ​ເປັນ​ສິນຄ້າ. ການ​ຜະລິດ​ກະ​ສີ​ກໍາ-ປ່າ​ໄມ້ ​​ຂອງ​ເມືອງມີ​ການ​ຂະຫຍາຍຕົວ, ມີ​ການ​ຫັນປ່ຽນ​ຮູບ​ແບບ ​ແລະ ຂະໜາດ​ຂອງ​ການ​ຜະລິດ​ ຈາກ​ແບບ​ທໍາ​ມະ​ຊາດ​ດັ້ງ​ເດີ​ມ​ເຮັດ​ພໍ​ຢູ່​ພໍ​ກິນ ຫັນ​ໄປ​ສູ່​ການ​ຜະລິດ​ເປັນ​ສິນຄ້າ ​ຕາມ​ທິດ​ຫັນ​ເປັນ​ອຸດ​ສະຫະ​ກໍາ ​ແລະ ທັນ​ສະ​ໄໝ​ ເທື່ອ​ລະ​ກ້າວ. ລວມຍອດ​ລາຍ​ຮັບ​ ຈາກ​ຜະລິດ​ຕະພັນ​ກະ​ສີ​ກໍາ​ບັນລຸ​ໄດ້ 585 ຕື້​ກີບ, ກວມ 97% ຂອງ​ລວມຍອດ​ຜະລິດ​ຕະພັນ​ ພາຍ​ໃນ​ເພີ່ມ​ຂຶ້ນ 6,91% ​ໃນ​ປີ 2014. ມາ​ຮອດ​ປັດຈຸບັນ ​ທົ່ວ​ເມືອງ​ມີ​ເນື້ອ​ທີ່ ປູກ​ກາ​ເຟທັງໝົດ 46.694 ​ເຮັກຕາ, ​ເນື້ອ​ທີ່​ໃຫ້​ໝາກ 43.305 ຮຕ, ສະມັດ​ຕະພາບ 1,23 ​ໂຕນ/ຮຕ, ຜົນ​ຜະລິດ 53.625 ​ໂຕນ, ສົມ​ທຽບ​ໃສ່​ປີ 2009 ​ເພີ່ມ​ຂຶ້ນ 20,5%, ​ເນື້ອ​ທີ່​ປູກ​ກາ​ເຟກວມ 59,86% ຂອງ​ເນື້ອ​ທີ່​ກາ​ເຟທົ່ວ​ປະ​ເທດ. ສາມາດ​ສ້າງ​ວຽກ​ເຮັດ​ງານ​ທໍາ​ ໃຫ້​ປະຊາຊົນ​ບັນດາ​ເຜົ່າ​ເຖິງ 140.080 ກວ່າ​ຄົນ. ສະ​ເພາະ​ການຜະລິດ​ພືດ​ຜັກ​ຊະນິດ​ຕ່າງໆ​ ໃນ​ປີທີ່​ຜ່ານ​ມາ ມີ​ເນື້ອ​ທີ່ 4.900 ກວ່າ​ເຮັກຕາ, ມີ​ເນື້ອ​ທີ​ປູກ​ຜັກ​ກະ​ລໍ່າ​ປີ 2.900 ​ເຮັກຕາ, ​ເນື້ອ​ທີ່​ປູກ​ຜັກກາດ​ຫໍ່ 700 ກວ່າ​ເຮັກ​ຕາ, ພືດຜັກ​ທົ່ວ​ໄປ 1.200 ກວ່າ​ເຮັກຕາ​ ຜົນ​ຜະລິດ​ທີ່​ສົ່ງ​ອອກ ​ໄດ້​ຫລາຍ​ກວ່າ​ໝູ່​ແມ່ນ​ກະ​ລໍ່າ​ປີ ​ແລະ ຜັກກາດ​ຫໍ່ 263.200 ​ໂຕນ ສາມາດສົ່ງ​ອອກຕ່າງປະ​ເທດ 70%, ຜົນ​ຜະລິດ​ສົ່ງ​ອອກ​ສະ​ເລ່ຍ 150-200 ​ໂຕນ/ວັນ. ສໍາລັບ​ການ​ປູກ​ພືດ​ຜັກ​ປອດ​ສານພິດ​ ຢູ່​ເມືອງ​ປາກ​ຊ່ອງ​ ໄດ້​ນໍາ​ໃຊ້​ເຕັກນິກ​ການ​ປູກ​ໃນ​ເຮືອນ​ຮົ່ມ ​ໄດ້​ຮ່ວມ​ມື ລະ​ຫວ່າງ ລາວ-ຈີນ ​ເຊິ່ງປັດຈຸບັນ​ ທາງ​ໂຄງການ​ໄດ້​ປຸກ​ສ້າງ​ເຮືອນ​ຮົ່ມ​ ຈໍານວນ 120 ຫລັງ ​ໃນ​ຂະໜາດ 8X40 ​ແມັດ, ສາມາດ​ປູກ​ພືດໄດ້ 4 ຮອບ​ວຽນ​ໃນ​ໜຶ່ງ​ປີ​ ມີ​ລາຍ​ຮັບ 6 ລ້ານ​ກີບ/ຫລັງ/ຮອບ​ວຽນ, ມາ​ຮອດ​ປັດຈຸບັນ ການ​ປູກ​ພືດ​ໃນ​ເຮືອນ​ຮົ່ມ​ ໄດ້​ຂະຫຍາຍຕົວ​ລົງ​ສູ່​ຄອບ​ຄົວ​ ປະຊາຊົນນັບ​ມື້​ເພີ່ມ​ຂຶ້ນ ​ເຮັດ​ໃຫ້ການ​ຜະລິດ​ກະ​ສີ​ກໍາ​ອີນຊີ ມີ​ທ່ວງທ່າ​ຂະຫຍາຍຕົວ​ເພີ່ມ​ຂຶ້ນ​ ໃນ​ແຕ່ລະ​ໄລຍະ.

​ທ່ານ​ ຄໍາສີ ປ່ຽງ​ວໍລະ​ວົງ ​ກ່າວ​ຕື່ມ​​ວ່າ: ການ​ພັດທະນາ ເສດຖະກິດ-ສັງຄົມ ​ໃນ​ໄລຍະ 5 ປີ ຜ່ານ​ມາ ​ເສດຖະກິດ​ຂອງ​ເມືອງ​ ໄດ້​ມີ​ການ​ຂະຫຍາຍຕົວ​ ຢ່າງ​ຕໍ່​ເນື່ອງ ​ແລະ ມີ​ຈັງ​ຫວະ​ໝັ້ນ​ທ່ຽງ ​ສະ​ແດງ​ອອກ​ຄື: ຈັງຫວະ​ການ​ຂະຫຍາຍ​ຕົວ ​ຂອງ​ເສດຖະກິດ​ໃນ​ປີ 2014 ອັດຕາ​ການ​ຂະຫຍາຍຕົວ 7,6% ຕໍ່​ປີ, ສະ​ເລ່ຍລາຍ​ຮັບ​ 1.026 ​ໂດ​ລາ​ສະຫະລັດ ຕໍ່​ຄົນ/ປີ,  ເມືອງ​ປາກ​ຊ່ອງ​ ມີ​ເນື້ອ​ທີ່​ທັງ​ໝົດ 348.735 ຮຕ ມີ​ພົນລະ​ເມືອງ​ 73.449 ຄົນ, ມີ 10 ກຸ່ມ​ບ້ານ, ມີ 88 ບ້ານ ​ແລະ ມີ 13.570 ຄົວ​ເຮືອນ ​ແລະ14 ຊົນ​ເຜົ່າ. ສ່ວນ​ໃຫຍ່​ແມ່ນ​​ເຜົ່າ​ຢຣຸ ​ແລະ ຊົນ​ເຜົ່າ​ຢ່າ​ເຫີ​ນກວມ 65%. ນອກຈາກ​​ທ່າ​ແຮງທາງ​ດ້ານ​ກະ​ສີ​ກໍາ​ແລ້ວ ​​ການ​ພັດທະນາທາງ​ດ້ານ​ພະລັງງານ ​ເຂື່ອນ​ໄຟຟ້າ​ນໍ້າຕົກ ມີ​ເຖິງ 16 ​ແຫ່ງ, ມີ​ກໍາລັງ​ຕິດ​ຕັ້ງ​ຫລາຍ​ກວ່າ 650 MW, ທາງ​ດ້ານ​ຊັບພະຍາກອນ​ບໍ່​ແຮ່​ ແມ່ນບໍ່​ບົກ​ຊິດ, ພ້ອມ​ນັ້ນ​ ທາງ​ເມືອງ​ຍັງ​ມີ​ທ່າ​ແຮງ​ດ້ານ​ການທ່ອງທ່ຽວ ​ທີ່​ຫລາກ​ຫລາຍ​ທາງ​ດ້ານ​ທໍາ​ມະ​ຊາດ, ວັດທະນະທຳ, ປະຫວັດສາດ ​ແລະ ການທ່ອງທ່ຽວ​ ທາງ​ດ້ານ​ການ​ຜະລິດ​ ລວມທັງ​ໝົດ 67 ​ແຫ່ງ.

.....................................................................................................................................................................................................

ທີ່ມາ: www.kpl.gov.la