ເມືອງນອງ ຈັດພິທີທຳລາຍ ສິນຄ້າເສື່ອມຄຸນະພາບ

ໃນວັນທີ 30 ກັນຍາ 2015 ຜ່ານມາ, ຫ້ອງການອຸດສາຫະກຳ ແລະ ການຄ້າເມືອງນອງ ຈັດພິທີທຳລາຍສິນຄ້າທີ່ເສື່ອມຄຸນະພາບ ແລະ ສິນຄ້ານຳເຂົ້າທີ່ບໍ່ຖືກຕ້ອງຂຶ້ນ, ໂດຍໃຫ້ກຽດເຂົ້າຮ່ວມຂອງທ່ານ ແກ້ວໂອໃດ ສຸວັນແນນ ຮອງເຈົ້າເມືອງໆນອງ, ມີທ່ານ ນາງ ສັງທອງ ກຽດຕະວົງ ປະທານກວດກາພັກ-ລັດ ເມືອງ, ມີຫົວໜ້າຫ້ອງການອຸດສາຫະກຳ ແລະ ການຄ້າເມືອງ, ບັນດາຫ້ອງການອ້ອມຂ້າງເມືອງ ກໍ່ໄດ້ເຂົ້າຮ່ວມໃນການທຳລາຍສິນຄ້າດັ່ງກ່າວ.
ເຊິ່ງສິນຄ້າທີ່ໄດ້ນຳມາທຳລາຍໃນມື້ນີ້, ແມ່ນສິນຄ້າທີ່ນຳເຂົ້າທີ່ບໍ່ຖືກຕ້ອງ, ສິນຄ້າເສື່ອມຄຸນະພາບ ທີ່ທາງຫ້ອງການອຸດສາຫະກຳ ແລະ ການຄ້າເມືອງ ສາມາດອາຍັດມາໄດ້ ຊຶ່ງປະກອບມີ: ຢາສູບ, ເຄື່ອງສຳອາງ, ເຄື່ອງດື່ມປະເພດຕ່າງໆ ທີ່ນຳມາເຂົ້າມາຈາກປະເທດທີ່ມີຊາຍແດນຕິດຈອດກັນ (ຫວຽດນາມ) ເຊັ່ນວ່າ: ນ້ຳດື່ມຊູໂມ້, ນ້ຳຊາຂຽວ, ເຄື່ອງປຸງແຕ່ງອາຫານ, ເບຍຮູດາ ແລະ ອື່ນໆ ລວມມີ 24 ລາຍການ. ລວມມູນຄ່າທັງໝົດ 6 ລ້ານກວ່າກີບ. ນອກຈາກນີ້ ກໍ່ຍັງມີສິນຄ້າທີ່ເກືອດຫ້າມທີ່ສຸດເປັນຕົ້ນແມ່ນຢາຂ້າຫຍ້າ, ອາໄຫຼ່ຈັກສະຕິນ, ອາຫານເສີມຂອງເດັກ ໂດຍສິນຄ້າທີ່ກ່າວມານັ້ນ, ສ່ວນໃຫຍ່ແມ່ນພົບເຫັນຢູ່ທັງຮ້ານຄ້າທັງຄົນລາວ ແລະ ຕ່າງປະເທດ (ຫວຽດນາມ, ຈີນ) ທັງນີ້້ກໍ່ເພື່ອຕ້ານ ແລະ ສະກັດກັ້ນການນຳເຂົ້າ ແລະ ການຈຳໜ່າຍສິນຄ້ານອກລະບົບ ທີ່ບໍ່ຖືກຕ້ອງ, ຫ້າມນຳເຂົ້າມາຈຳໜ່າຍ. 
ໂອກາດນີ້, ທ່ານ ແກ້ວໂອໄດ ສຸວັນແນນ ກໍ່ໄດ້ສະແດງຄວາມຍ້ອງຍໍຊົມເຊີຍນຳຫ້ອງການອຸດສາຫະກຳ ແລະ ການຄ້າເມືອງ ທີ່ໄດ້ເອົາໃຈໃສ່ປະຕິບັດຕາມພາລະບົດບາດຂອງຕົນ, ເຊິ່ງເຫັນໄດ້ຈາກສິນຄ້າທີ່ຢຶດມາໄດ້ ໂດຍສະເພາະແມ່ນນຳຢາຂ້າຫຍ້າ, ອາຫານເສີມຂອງເດັກ ເຊິ່ງເປັນສິ່ງອັນຕະລາຍແກ່ຊີວິດ ແລະ ສິນຄ້າປະເພດອື່ນໆກໍ່ເຊັ່ນກັນ. ນອກນີ້ ກໍ່ຮຽກຮ້ອງມາຍັງພໍ່ແມ່ປະຊາຊົນບັນດາເຜົ່າພວກເຮົາ ຈົ່ງມີສະຕິໃນເວລາຊື້ສິ່ງຂອງຕ່າງໆ ກໍ່ຄວນອ່ານສະຫຼາກທີ່ຕິດໄວ້ໃນສິນຄ້າກ່ອນວ່າໝົດອາຍຸການນຳໃຊ້ຫຼືບໍ່ ແລະ ສັງເກດເບິ່ງລັກສະນະສີສັນຂອງສິນຄ້າໃຫ້ລະອຽດຖີ່ຖ້ວນ ທັງນີ້ກໍ່ເພື່ອຫຼີກລ່ຽງຈາກສິນຄ້າທີ່ເສື່ອມຄຸນະພາບ. 
ຫຼັງຈາກນັ້ນ, ທາງການນຳຂັ້ນເມືອງ ພ້ອມດ້ວຍພາກສ່ວນຕ່າງໆທີ່ກ່ຽວຂ້ອງ ກໍ່ໄດ້ພ້ອມກັນທຳຈູດທຳລາຍສິນຄ້າຕ່າໆທີ່ອາຢັດມາໄດ້ທັງໝົດ.

ທີ່ມາ Savanhphuttana News