ເມສຊີຟິວຂາດ!!ດ່າເລະແຟນບານເຈຍໃຫຍ່ດຶກຕຸກໃສ່ເນມາ-ຊົວເຣດ

 

ຟິວຂາດເລີຍ!!! ລີໂອເນວ ເມສຊີ ດາວເຕະ ບາເຊໂລນາ ຂອງຂຶ້ນຫຼັງຈາກທີ່ເຫັນແຟນບານ ບາເລັນເຊຍ ດຶກກະຕຸກນຳ້ໃສ່ຫົວ ເນມາ ຈົນເຖິງຂັ້ນດ່າດ້ວຍຄຳຮຸນແຮງຂະນະທີ່ ເຊຊາເຣ ປຣັນເດວລີ ນາຍໃຫຍ່ ບາເລັນເຊຍ ອ້າງວ່າເບິ່ງບໍ່ເຫັນເຫດການເລີຍຂໍບໍ່ເວົ້າເຖິງ.

 

ລີໂອເນວ ເມສຊີ ກອງໜ້າ ບາເຊໂລນາ ອອກອາການຟິວຂາດຈົນເຖິງຂັ້ນຫຼຸດປາກດ່າແຟນບານ ບາເລັນເຊຍ ດ້ວຍຄຳເວົ້າທີ່ບໍ່ສຸພາບຫຼັງຈາກທີ່ດຶກຂວດນຳ້ມາໃສ່ ເນມາ ດາວຍິງເພື່ອນຮ່ວມທີມໃນເກມລີກທີ່ ບາຊາ ບຸກໄປເສືອນຊະນະ ບາເລັນເຊຍ ຢ່າງສຸດມັນ 3-2 ເມື່ອວັນເສົາທີ່ຜ່ານມາ.

 

ເມສຊີ ຍິງໃຫ້ ບາຊາ ນຳກ່ອນໃນນາທີ 22 ແຕ່ເຈົ້າບ້ານມາຍິງຄືນ 2 ລູກຈາກ ມິນີ ເອວ ຮັດດາດີ ໃນນາທີ 52 ກັບ ໂຣດຣິໂກ ໂມເຣໂນ ນາທີ 56 ແຕ່ວ່າ ບາຊາ ກໍຕາຍຍາກເມື່ອຕີສະເໝີໄດ້ຈາກ ຫຼຸຍ ຊົວເຣດ ນາທີ 62 ກ່ອນທີ່ຈະໄດ້ປະຕູໄຊຈາກລູກຈຸດໂທດຂອງ ເມສຊີ ໃນຊ່ວງທົດເວລາບາດເຈັບ ແລະ ໃນລະຫວ່າງທີ່ນັກເຕະ ບາຊາ ກຳລັງສະຫຼອງດີໃຈຢູ່ນັ້ນກໍໄດ້ມີແຟນບານເຈົ້າບ້ານດຶກກະຕຸກມາຖືກຫົວຂອງ ເນມາ ເຊັ່ນດຽວກັບ ຊົວເຣດ ທີ່ຖືກລູກຫຼົງໄປນຳຄືກັນ.

 

ຈາກພາບວີດີໂອເຜີຍໃຫ້ເຫັນວ່າ ເມສຊີ ມີການໂມໂຫຢ່າງໜັກ ແລະ ດ່າແຟນບານ ບາເລັນເຊຍ ໄປວ່າ “ພວກລູກ ກະ**..”ຂະນະທີ່ ເຊຊາເຣ ປຣັນເດວລີ ນາຍໃຫຍ່ ບາເລັນເຊຍ ປະຕິເສດທີ່ຈະເວົ້າເຖິງສິ່ງທີ່ເກີດຂຶ້ນໂດຍອ້າງວ່າ ຕົນເອງເບິ່ງບໍ່ເຫັນເຫດການແຕ່ຢ່າງໃດ.