ເຝິກອົບຮົມ “ທັກສະການຕິດຕາມກວດກາວຽກງານການເງິນ ແລະງົບປະມານ” ຂອງສະພາແຫ່ງທີ່ແຂວງສະຫວັນນະເຂດ

ໃນລະຫວ່າງວັນທີ 5-6 ຕຸລາ 2015, ທີ່ຫໍວັດທະນະທຳ ໄກສອນ ພົມວິຫານ ໄດ້ຈັດໃຫ້ມີຊຸດເຝິກອົບຮົມຍົກລະດັບ“ທັກສະການຕິດຕາມກວດກາວຽກງານການເງິນ ແລະງົບປະມານ” ຂອງສະພາແຫ່ງຊາດຊຸດທີ VII ຂຶ້ນ. ເຂົ້າຮ່ວມໃນຊຸດເຝິກອົບຮົມຄັ້ງນີ້ ໂດຍມີ ທ່ານ ດຣ ຄຳເຜີຍ ປານມະໄລທອງ ກຳມະການສູນກາງພັກ ສະມາຊິກສະພາແຫ່ງຊາດ, ທີ່ປຶກສາພິເສດ ຂອງທ່ານ ປະທານສະພາແຫ່ງຊາດ, ທ່ານ ບຸນປອນ ສີສຸລາດ ຮອງປະທານກຳມາທິການເສດຖະກິດ ແຜນການ ແລະການເງິນສະພາແຫ່ງຊາດ, ທີ່ປຶກສາພິເສດ ຂອງທ່ານ ປະທານສະພາແຫ່ງຊາດ, ທ່ານ ໂງ ຕື ນາມ ຮອງປະທານຄະນະກິດຈະການຜູ້ແທນ ຫົວໜ້າຄະນະຊ່ຽວຊານ ແຫ່ງ ສສ ຫວຽດນາມ.
ການຈັດກອງປະຊຸມເຝິກອົບຮົມ ຍົກລະດັບທັກສະການຕິດຕາມກວດກາວຽກງານການເງິນ ແລະງົບປະມານໃນຄັ້ງນີ້ ແມ່ນເປັນການຜັນຂະຫຍາຍເນື້ອໃນຈິດໃຈບົດບັນທຶກຊ່ວຍຈຳລະຫວ່າງສູນເຝິກອົບຮົມຫ້ອງວ່າການສະພາແຫ່ງຊາດ ແລະສູນບຳລຸງຜູ້ແທນປະຊາຊົນ ຂອງຄະນະວຽກງານສະພາແຫ່ງຊາດ ສສ ຫວຽດນາມ ທີ່ໄດ້ເຊັນລົງນາມບົດບົນທຶກກັນໃນວັນທີ 5 ສິງຫາ 2013 ທີ່ນະຄອນຫຼວງວຽງຈັນ. ຊຸດເຝິກອົບຮົມຄັ້ງນີ້ແມ່ນເລັ່ງໃສ່ 3 ຫົວຂໍ້ສຳຄັນຄື: ເວົ້າເຖິງບົດຮຽນ ແລະທັກສະຂອງສະມາຊິກສະພາແຫ່ງຊາດໃນການກວດກາຜ່ານ ແລະຮັບຮອງເອົາແຜນງົບປະມານແຫ່ງລັດ, ເວົ້າເຖິງບົດຮຽນ ແລະທັກສະຂອງສະມາຊິກສະພາແຫ່ງຊາດ ໃນການຕິດຕາມກວດກາງົບປະມານແຫ່ງລັດ, ເວົ້າເຖິງບົດຮຽນ ແລະທັກສະຂອງສະມາຊິກສະພາແຫ່ງຊາດໃນການຄົ້ນຄວ້າ ແລະຕິດຕາມກວດກາໂຄງການລົງທຶນກໍ່ສ້າງພື້ນຖານໂຄງລ່າງຂອງລັດ

ທີ່ມາ Savanhphuttana News