ເປເອັດເຊເລັງດຶງຊານເຊດ-ກຸນເສີມທັບ

 

ປາຣີ ແຊງ-ແຊັກແມງ  ຕົກເປັນຂ່າວດຶງ ອະເລັກຊິດ ຊານເຊດ ກອງໜ້າຂອງ ອາເຊນອນ ຫຼື ເຊຄິໂອ ກຸນ ອາເກວໂຣ ຫົວຫອກຂອງ ແມນເຊສເຕີ ຊີຕີ ເສີມທັບໃນຊ່ວງຊຳເມີນີ້ເພື່ອມາປະສານງານໃນແດນໜ້າກັບ ເອດິສັນ ກາວານີ ດາວຍິງຕົວເກັ່ງຂອງທີມເພື່ອປະສົບຄວາມສຳເລັດໃນເວທີລະດັບເອີຣົບ ຢູຟາ ແຊມປຽນ ລີກ ໃນລະດູການໜ້າ.

 

ປາຣີ ແຊງ-ແຊັກແມງ ສະໂມສອນມະຫາເສດຖີຂອງ ລີກ ແອັງ ຝຣັ່ງຕົກເປັນຂ່າວກຽມເສີມທັບຄັ້ງໃຫຍ່ໂດຍການເຊັນສັນຍາດຶງຕົວ ອະເລັກຊິດ ຊານເຊດ ຫົວຫອກຂອງ “ປືນໃຫຍ່” ອາເຊນອນ ຫຼື ເຊຄິໂອ ອາເກວໂຣ ດາວຍິງ “ເຮືອໃບສີຟ້າ” ແມນເຊສເຕີ ຊີຕີ ໃນຊ່ວງຊຳເມີນີ້ ຈາກການລາຍງານເມື່ອວັນພຸດທີ່ຜ່ານມາ.

 

ອະເລັກຊິດ ກັບ ອາເກວໂຣ ເປັນເປົ້າໝາຍສຳຄັນຂອງ ເປເອັດເຊ ເຊັ່ນດຽວກັບ ປິແອ-ເອເມຣິກ ໂອບາເມຢອງ ກອງໜ້າຂອງ ໂບຣຸສເຊຍ ດອດມຸນ ເພື່ອມາປະສານງານໃນເກມບຸກກັບ ເອດິສັນ ກາວານີ ສະຕາທີມຊາດອຸຣູກວາຍໃນລະດູການໜ້າ.

 

ເມື່ອຊ່ວງຊຳເມີທີ່ຜ່ານມາ ອູູໄນ ເອເມຣີ ນາຍໃຫຍ່ຂອງ ເປເອັດເຊ ມີການເສີມທັບຄັ້ງໃຫຍ່ແຕ່ສຸດທ້າຍກໍຖືກ ບາເຊໂລນາ ທີມດັງຂອງສະເປນຂ່ຽນຕົກຮອບ 16 ທີມສຸດທ້າຍຂອງ ຢູຟາ ແຊມປຽນ ລີກ ແລະ ຍັງເປັນຮອງ ໂມນາໂກ ຈ່າຝູງລີກຝຣັ່ງ.

 

ມີຂ່າວລືອອກມາຕະຫຼອດກ່ຽວກັບອະນາຄົດຂອງ ອະເລັກຊິດ ຊານເຊດ ແລະ ອາເກວໂຣ ນັບຕັ້ງແຕ່ຂຶ້ນປີ 2017 ໂດຍສະຕາ ອາເຊນອນ ຈະໝົດສັນຍາໃນຊ່ວງຊຳເມີໜ້າ ແລະ ບໍ່ຄິດທີ່ຈະຂະຫຍາຍອອກໄປ ຂະນະທີ່ຫົວຫອກ ແມນ ຊີຕີ ກໍເບິ່ງວ່າຈະບໍ່ເໝາະກັບແຜນການເຮັດທີມຂອງ ໂຈເຊບ ກວາດິໂອລາ ຜູ້ຈັດການທີມ “ເຮືອໃບສີຟ້າ”.

 

ທັງນີ້ເລື່ອງເງິນຄ່າເມື່ອຍຈຳນວນມະຫາສານຂອງນັກເຕະຈະບໍ່ແມ່ນບັນຫາສຳລັບ ເປເອັດເຊ ແຕ່ຢ່າງໃດ ແລະ ອາດຈະພຽງພໍໃນການດຶງດູດໃຈໃຫ້ສະຕາຈາກອາເມຣິກາໃຕ້ຍອມຍ້າຍຈາກອັງກິດມາຫຼິ້ນໃນຝຣັ່ງແທນ.

 

ບົດຄວາມໃຫມ່ໆ