ເປເອັດເຊເລັງຍື່ນງົບຂໍດຶງ ລູກາກູ ປີໜ້າ

 

ສື່ຕີຂ່າວ ປາຣີ ແຊັງ-ແຊັກແມັງ ກຽມຈົກເງິນລ່າໂຕ ໂຣເມລູ ລູກາກູ ຫົວຫອກຂອງ ເອເວີຕັນ ມາຟາດແຄ່ງໃນຖິ່ນ ປາກ ເດີ ແພຣງ ຕົ້ນປີໜ້າ ຍ້ອນວ່າໃນເວລານີ້ ເປເອັດເຊ ມີພຽງ ເອດິສັນ ກາວານີ ດາວຍິງທີມຊາດອຸລູກວາຍເທົ່ານັ້ນທີ່ເປັນສູນໜ້າທຳມະຊາດ.

 

“ເດິ ມິນເລີ” ສື່ຊື່ດັງຂອງເມືອງຜູ້ດີລາຍງານຂ່າວວ່າ ປາຣີ ແຊັງ-ແຊັກແມັງ ສະໂມສອນອະພິມະຫາເສດຖີຈາກເວທີ ລີກແອັງ ຝຣັ່ງພ້ອມຍື່ນຂໍ້ສະເໜີດຶງໂຕ ໂຣເມລູ ລູກາກູ ດາວຍິງຟອມລະເບີດຂອງ ເອເວີຕັນ ສະໂມສອນດັງຂອງ ພຣີເມຍລີກ ມາເສີມຄົມໃນຊ່ວງເປີດຕະຫຼາດຊື້ຂາຍນັກເຕະເດືອນມັງກອນປີໜ້າ.

 

ລະດູການນີ້ ກອງໜ້າທີມຊາດແບນຊິກເຮັດຜົນງານໄດ້ຢ່າງຮ້ອນແຮງໃຫ້ກັບ “ທັອບຟີ” ໂດຍການຍິງເຖິງ 7 ລູກໃນເກມລີກ ແລະ ຈາກຟອມອັນໂດດເດັ່ນຂອງເຂົາເຮັດໃຫ້ຫຼ້າສຸດ “ເດິ ມິນເລີ” ອ້າງວ່າ ເປເອັດເຊ ເລັງທຸ່ມເງິນຂໍຊື້ ລູກາກູ ເນື່ອງຈາກວ່າພວກເຂົາມີກອງໜ້າທຳມະຊາດພຽງແຕ່ ເອດິສັນ ກາວານີ ຄົນດຽວ ແລະ ຫາກໍໄດ້ຮັບບາດເຈັບຕົ້ນຂາຈາກເກມທີ່ຊະນະ ແຣນ 4-0 ເມື່ອວັນອາທິດທີ່ຜ່ານມາ.

 

ຢ່າງໃດກໍຕາມທີມຂອງ ອູໄນ ເອເມຣີ ຕ້ອງເຈິກັບງານຊ້າງໃນການລ່າໂຕ ລູກາກູ ເນື່ອງຈາກ ເອເວີຕັນ ບອກວ່າຈະບໍ່ຂາຍນັກເຕະອອກຈາກຖິ່ນ ກູດິສັນ ພາກ ແນ່ນອນ.