ເປເຣີຣາ ຢ້ຳ!! ບໍ່ມີບັນຫາຫຍັງກັບ "ອາວີພີ"

ບິກເຕີ ເປເຣີຣາ ນາຍໃຫຍ່ ເຟເນບາເຊ ຢືນຢັນສຽງດັງວ່າເຂົາກັບ ໂຣບິນ ຟານ ເພີຊີ ບໍ່ໄດ້ມີບັນຫາໃຫຍ່ໂຕມະໂຫລານຄືທີ່ສື່ຕ່າງໆເວົ້າກັນ ຈາກການທີ່ກອງໜ້າເຊື້ອຊາດເນເທີແລນ ບໍ່ພໍໃຈກັບບົດບາດໂຕສຳຮອງໃນທີມລະດູການນີ້.

ບິກເຕີ ເປເຣີຣາ ນາຍໃຫຍ່ ເຟເນບາເຊ ທີມຍັກໃຫຍ່ຂອງ ຕຸລະກີ ຢືນຢັນອີກຮອບວ່າເຂົາບໍ່ມີບັນຫາຫຍັງເລີຍກັບ ໂຣບິນ ຟານ ເພີຊີ ກອງໜ້າຊຸບເປີ້ສະຕາ ທີ່ຈົ່ມເລື່ອງຖືກຈັບນັ່ງເປັນໂຕສຳຮອງ ແລະ ລ່າສຸດກໍຈັບມືກັນແບບຂໍໄປທີ່ຫຼັງເກມບິກແມັດລີກ ໄກ່ງວງ ທີ່ປ່ຽນໂຕລົງມາຍິງ 1 ລູກ ແລະ ທີມເສຍໃຫ້ກັບ ເບຊິກຕັສ 3-2 ກ່ອນມີຄິວລົງສະໜາມເຮັດເສິກ ຢູໂຣປາ ລີກ ກັບ ກລາສໂກ ເຊວຕິກ ວັນພະຫັດທີ 1 ຕຸລາ.

ເປເຣີຣາ ເລີ່ມຕົ້ນດ້ວຍການໃຊ້ງານ ແຟນານເດົາ ຫົວຫອກແຊມບາ ທີ່ຍ້າຍມາຈາກ ບູຊາສປໍ ເປັນໂຕຈິງເຮັດໃຫ້ “ອາວີພີ” ຈົ່ມບໍ່ພໍໃຈສະຖານະພາບໂຕເອງ ໂດຍສະເພາະສອງເກມຫຼັງທີ່ເຂົາເປັນໂຕສຳຮອງ ແລະ ຍິງໄດ້ 2 ປະຕູຊ່ວຍທີມຊະນະ ບູຊາສປໍ 2-1 ແລະ ເສຍ ເບຊິກຕັສ 3-2 ເຊິ່ງຫຼັງເກມກັບ ເບຊິກຕັສ ເບິ່ງວ່າ ອາວີພີ ຈະບໍ່ມີອາລົມຈັບມືກັບເທຣນເນີ້ພໍປານໃດແຕ່ ເປເຣີຣາ ຢືນຢັນວ່າພວກເຂົາບໍ່ໄດ້ມີບັນຫາກັນ.

“ຂ້ອຍມີຄວາມສຳພັນທີ່ດີກັບທີມ ແລະ ນັກເຕະຂອງຂ້ອຍ ບາງຄັ້ງມັນກໍມີຄວາມເຄັ່ງຕຶງຄືກັນ ເຮົາຕ້ອງການໃຫ້ທີມນີ້ພັດທະນາຂຶ້ນ ແລະ ປັບປຸງໃນແງ່ຂອງອາຊີບ ອາວີພີ ເປັນສ່ວນໜຶ່ງຂອງທີມ ແລະ ເຮົາທຸກຄົນລ້ວນແຕ່ຢາກພັດທະນາຂຶ້ນໄປ ຄວາມສຳພັນຂອງເຮົາຢູ່ບົນພື້ນຖານຂອງການເຊື່ອໃຈກັນ ເຮົາມີເປົ້າໝາຍ ແລະ ຄວາມສຳພັນຂອງເຮົາກໍປົກກະຕິດີ ຄວາມເຄັ່ງຄຽດມັນເກີດຂຶ້ນໄດ້ ແຕ່ໃນເກມກິລາບັນຫາພວກນີ້ເຮົາສາມາດແກ້ໄຂມັນໄດ້.”

“ຫຼາຍຄັ້ງທີ່ເຈົ້າຊະນະໃນເກມກິລາດ້ວຍຄວາມເຄັ່ງຕຶງແບບນີ້ ຖ້າເຮົາທຸກຄົນມິດງຽບກັນໝົດ ເຈົ້າອາດຈະບໍ່ຊະນະກໍໄດ້ ເລື່ອງແບບນີ້ເປັນເລື່ອງປົກກະຕິຂອງເຮົາ ໃນຖານະຄົນທີ່ເຮັດວຽກເພື່ອສະໂມສອນ ເຮົາຢູ່ກັບມັນ ແລະ ບໍ່ໄດ້ເອົາມາໃສ່ໃຈ ແຕ່ຂ້ອຍເຂົ້າໃຈມຸມມອງຂອງນັກຂ່າວທີ່ມີຕໍ່ເລື່ອງນີ້ ພວກເຈົ້າຕ້ອງການຂ່າວທີ່ໜ້າສົນໃຈ ມັນເກີດຂຶ້ນຢ່າງວ່ອງໄວ ແຕ່ເຮົາກໍແກ້ໄຂຈັດການໄດ້ໄວເຊັ່ນດຽວກັນ.”

..................................................................................................................................