ເປົ່າຮັບພາດທີ່ໄລ່ຊຸບເປີ້ມາຣິໂອ້ອອກຈາກສະໜາມ

 

ກາສປານ ກາຣິບິຢອງ ປະທານເຕັກນິກການຕັດສິນຂອງບານເຕະລີກຝຣັ່ງລະບຸວ່າ ໂອລິວິເຢ ຕູອັນ ກຳມະການທີ່ຕັດສິນໄລ່ ມາຣິໂອ ບາໂລເຕລີ້ ຫົວຫອກ ນີດ ອອກຈາກສະໜາມຍອມຮັບວ່າຕັດສິນຜິດພາດທີ່ແຈກໃບເຫຼືອງໃບທີສອງໃຫ້ກັບ “ຊຸບເປີ້ມາຣິໂອ້” ໂດຍຄະນະກຳມະການດ້ານລະບຽບວິໄນຈະພິຈາລະນາເຖິງປະເດັນນີ້ໃນວັນພະຫັດນີ້.

 

ກາສປານ ກາຣິບິຢອງ ປະທານເຕັກນິກການຕັດສິນຂອງລີກບານເຕະຝຣັ່ງເປີດເຜີຍວ່າກຳມະການ ໂອລິວິເຢ ຕູອັນ ຍອມຮັບວ່າຕັດສິນຜິດພາດທີ່ໄລ່ ມາຣິໂອ ບາໂລເຕລີ້ ກອງໜ້າໂຕກຽນຂອງ ນີດ ອອກຈາກສະໜາມໃນເກມລີກນັດທີ່ ນີດ ຊະນະ ລໍຣິຢອງ 2-1 ເມື່ອວັນອາທິດທີ່ຜ່ານມາ.

 

ຕອນທຳອິດເບິ່ງວ່າເກມຈະຈົບລົງໂດຍຜົນສະເໝີກັນແລ້ວແຕ່ວ່າ ບາໂລ ມາຍິງປະຕູໄຊໃຫ້ທີມໄດ້ໃນຊ່ວງ 4 ນາທີສຸດທ້າຍເຊິ່ງມັນເຮັດໃຫ້ ນີດ ຂຶ້ນເປັນຈ່າຝູງຂອງຕາຕາລາງຄະແນນໂດຍທີ່ເຂົາແກ້ເສື້ອສະຫຼອງຈົນໄດ້ໃບເຫຼືອງ.

 

ຢ່າງໃດກໍຕາມ ໃນຊ່ວງທົດເວລາບາດເຈັບນັ້ນ “ຊຸບເປີ້ມາຣິໂອ້” ມາຖືກໃບເຫຼືອງໃບທີສອງເປັນໃບແດງໄລ່ອອກຈາກສະໜາມຈາກຈັງຫວະທີ່ເບິ່ງວ່າຈະໄປປະທະກັບ ສະຕິເວັ້ນ ໂມໄຣຣ້າ ກອງຫຼັງຂອງຄູ່ແຂ່ງແຕ່ພາບຊ້າສະແດງໃຫ້ເຫັນວ່າທັງຄູ່ເບິ່ງຄືຈະບໍ່ໄດ້ເຮັດຫຍັງຜິດເລີຍ.

 

ກາຣິບິຢອງ ເຜີຍວ່າ “ໂອຣິວິເຢ ຕູອັນ ໄດ້ເບິ່ງການແຂ່ງຂັນຍ້ອນຫຼັງແລ້ວ ແນ່ນອນວ່າເຂົາເຫັນດີເຫັນພ້ອມວ່າເຂົາໃຈຮ້ອນໄປໃນຈັງຫວະນັ້ນ ແລະ ບໍ່ຄວນເຮັດແບບນັ້ນ ກຳມະການລາຍດັ່ງກ່າວພ້ອມເຂົ້າພົບກັບຄະນະກຳມະການດ້ານລະບຽບວິໄນເພື່ອເວົ້າເຖິງເລື່ອງນີ້ ແລ້ວຈາກນັ້ນຄະນະກຳມະການກໍຈະຕັດສິນວ່າຄວນຈະມີການດຳເນີນມາດຕະການຫຍັງອີກ ຫຼື ບໍ່”.

 

ທັງນີ້ ຄະນະກຳມະການດ້ານລະບຽບວິໄນຈະພິຈາລະນາກໍລະນີຂອງ ບາໂລເຕລີ ໃນວັນພະຫັດນີ້ໂດຍທີ່ ນີດ ຫວັງວ່າເຂົາຈະໄດ້ຮັບການຕັດສິນໃຫ້ໄດ້ຮັບການຍົກເລີກໂທດແບນເພື່ອທີ່ຈະໄດ້ລົງຫຼິ້ນໃນເກມກັບ ໂອລິມປິກ ລີຢົງ ວັນສຸກນີ້ໄດ້.