ເປີຕີເຜີຍປັອກບາເທບແຕ່ 100 ລ້ານປອນມັນຍັງແພງເກີນໄປ

 

ເອັມມານູເອວ ເປີຕີ ອະດີດກອງກາງທີມຊາດຝຣັ່ງເຜີຍວ່າ ພໍ ປັອກບາ ເປັນນັກເຕະຝີຕີນດີມີອະນາຄົດແຕ່ຕອນນີ້ຍັງໄວໂພດທີ່ຈະຍ້າຍທີມ ຫຼື ໄດ້ຮັບການຍົກຍ້ອງວ່າຍິ່ງໃຫຍ່ແບບນັ້ນແບບນີ້ ແລະ ເສຍດາຍເງິນແທນ ແມນເຊສເຕີ ຢູໄນເຕັດ ຖ້າວ່າຕ້ອງຈ່າຍເງິນເຖິງ 100 ລ້ານປອນເພື່ອແລກກັບນັກເຕະໃຫ້ມາຮ່ວມທັບ.

 

ເອັມມານູເອວ ເປີຕີ ອະດີດກອງກາງຂອງທີມຊາດຝຣັ່ງຊຸດແຊມໂລກປີ 1998 ແລະ ແຊມຢູໂຣ 2000 ບໍ່ຖຽງວ່າ ພໍ ປັອກບາ ກອງກາງດາວລຸ້ງລຸ້ນນ້ອງຊາດດຽວກັນຂອງ ຢູເວັນຕຸດ ທີມດັງຈາກ ກັນໂຊ ຊີຣີ ອາ ເປັນນັກເຕະທີ່ມີອະນາຄົດໄກ ແຕ່ບໍ່ຄິດວ່າຈະສົມຄວນເຖິງຂັ້ນເຮັດໃຫ້ ແມນເຊສເຕີ ຢູໄນເຕັດ ຕ້ອງທຸ່ມເງິນສູງເຖິງ 100 ລ້ານປອນຊື້ໂຕໄປຮ່ວມທັບ.

 

ປັອກບາ ພັດທະນາຕົນເອງໄດ້ຢ່າງຕໍ່ເນື່ອງຕັ້ງແຕ່ຍ້າຍຈາກ ແມນຢູ ໄປຫຼິ້ນກັບ ຢູເວ ໃນປີ 2012 ໂດຍເຂົາໄດ້ຮັບການຄາດໝາຍວ່າຈະເປັນນັກເຕະຄ່າໂຕແພງທີ່ສຸດໃນໂລກຄົນຕໍ່ໄປ ແລະ ຕອນນີ້ມີຂ່າວວ່າ “ຜີສາດແດງ” ຕ້ອງການໄດ້ໂຕຢ່າງຍິ່ງ ແລະ ພ້ອມຈ່າຍເງິນແບບເລືອດຂຶ້ນໜ້າ 100 ລ້ານປອນເລີຍ ເຊິ່ງໃນສາຍຕາຂອງ ເປີຕີ ເບິ່ງວ່າເສຍດາຍເງິນລ້າໆ.

 

“ພວກເຂົາເວົ້າເຖິງເງິນ 100 ລ້ານປອນ ຂ້ອຍວ່າມັນເກີນໄປ ປັອກບາ ມີອະນາຄົດທີ່ຍິ່ງໃຫຍ່ແຕ່ເຂົາຍ້າຍທີມຕອນນີ້ມັນໄວໂພດ ຂ້ອຍບໍ່ມັກສະຖານະການຂອງເຂົາເລີຍເຮົາເຮັດໃຫ້ເຂົາເປັນນັກເຕະດາວດັງທີ່ຍິ່ງໃຫຍ່ ແຕ່ຂ້ອຍເບິ່ງວ່າເຂົາຍັງບໍ່ແມ່ນເຂົາຍັງບໍ່ໄປຮອດລະດັບຂອງ ແຊມປຽນລີກ ຫຼື ລະດັບຂອງທີມຊາດ”.

 

“ຂ້ອຍໝັ້ນໃຈວ່າເຂົາຈະໄປຮອດແນ່ນອນແຕ່ວ່າຕອນນີ້ມັນຍັງໄວຢູ່ ເຂົາເປັນຂ່າວໃຫ້ເວົ້າເຖິງມາຕະຫຼອດເວລາແຕ່ຂ້ອຍຍັງບໍ່ເບິ່ງແບບນັ້ນ ສະລັບຕອນນີ້ຂ້ອຍຍັງບໍ່ເຊື່ອຖ້າວ່າ ເຣອັນ ມາດຣິດ ຢາກໄດ້ເຂົາພວກເຂົາຈະຕ້ອງຍື່ນຂໍ້ສະເໜີມາແຕ່ວ່າພວກເຂົາບໍ່ສູ້ກັບ ແມນຢູ ເພື່ອ ປັອກບາ ດອກ ມັນມີເຫດຜົນຂອງມັນຢູ່”.