ເປີດປະຫວັດ ນ້ອງໝີພູ ປະກວດລະດັບໂລກ Miss Global 2018

 ຊື່: ນາງ ພູຄຳ ທິບພົມວົງ ສາວຊຳເໜືອໂຕນ້ອຍໃຈໃຫຍ່ ຢືນເຕັງໜຶ່ງໃນເວທີລະດັບໂລກ Miss Global 2018 ໂຕນ້ອຍໃຈນັກສູ້ ສາວງາມຈາກ ແດນປະຫວັດສາດ ພູຄຳ ທິບພົມວົງ (ໝີພູ) ສູ່ເວທີການປະກວດລະດັບໂລກ Miss Global 2018 ທີ່ກຸງ ມະນິລາ ປະເທດຟິລິປິນ. ພູຄຳ ທິບພົມວົງ ຫຼື ໝີພູ ເກີດທີ່ບ້ານ ຊ່ອນໃຕ້ ເມືອງວຽງທອງ ແຂວງຫົວພັນ ດິນແດນປະຫວັດສາດແຫ່ງການປະຕິວັດ.

ໝີພູ ເປັນລູກຄົນທີ3ຂອງຄອບຄົວ, ມີອ້າຍເອື້ອຍນ້ອງຮ່ວມກັນ 4 ຄົນ, ໂດຍພື້ນຖານຄອບຄົວຂອງໝີພູ ເປັນຊົນຊັ້ນກາງ ພໍຢູ່ພໍກິນ ເຊິ່ງໝີພູໂຊກດີໜຶ່ງຢ່າງຄື ຄອບຄົວ ພໍ່ແມ່ສົ່ງເສີມໃນທຸກໆດ້ານທີ່ລູກໆທຸກຄົນມັກ ແລະ ໝີພູກໍຝັນມາຕະຫຼອດວ່າ ຢາກເປັນລູກຄົນໜຶ່ງທີ່ສາມາດຫາລ້ຽງພໍ່ແມ່ ແລະ ຄອບຄົວໄດ້ ເປັນທີ່ມາຂອງການຕັດສິນໃຈເດີນທາງລົງມາສຶກສາຕໍ່ທີ່ນະຄອນຫຼວງວຽງຈັໍນພາຍຫຼັງຈົບຊັ້ນມັດທະຍົມຕອນປາຍທີ່ບ້ານເກີດ ແລະ ນັ້ນເອງ ທີ່ເຮັດໃຫ້ຊີວິດຂອງໝີພູປ່ຽນຈາກຜູ້ຍິງທຳມະດາຄົນໜຶ່ງ

ໃຫ້ກາຍເປັນຜູ້ຍິງເຂັ້ມແຂງ ສາມາດດູແລ ຈັດການໂຕເອງ ເຮັດວຽກຫາລ້ຽງຊີບເພື່ອສົ່ງໂຕເອງຮຽນ ຈົນຈົບໃນລະດັບການສຶກສາຊັ້ນສູງ ທີ່ສະຖາບັນການທະນາຄານ ເມື່ອປີ 2016 ທີ່ຜ່ານມາ. ໃນລະຫວ່າງທີ່ກຳລັງສຶກສາຢູ່, ໝີພູກໍມີໂອກາດໄດ້ເຮັດວຽກໃນວົງການບັນເທິງ ທັງປະກວດນາງສາວປະຕິທິນ ແລະ ໄດ້ຂຶ້ນປົກວາລະສານຫຼາຍສະບັບ, ໝີພູຝັນມາຕະຫຼອດວ່າຢາກເປັນນາງສາວລາວ ທີ່ໄດ້ເຮັດໜ້າທີ່ອັນຊົງກຽດ ເປັນແບບຢ່າງໃຫ້ແກ່ແມ່ຍິງລາວທົ່ວປະເທດ

ແລະ ກໍໄດ້ມີໂອກາດເຂົ້າປະກວດນາງສາວລາວໃນປີ 2015 ແຕ່ໃນຕອນນັ້ນກໍໄປບໍ່ເຖິງຝັນ ເພາະບໍ່ໄດ້ເຂົ້າໄປເຖິງຮອບເລິກໃດໆເລີຍ ຕອນນັ້ນຮູ້ສຶກໝົດຫວັງໃນທາງສາຍນີ້ໄປຄັ້ງໜຶ່ງ ແຕ່ກໍບອກໂຕເອງສະເໝີວ່າຖ້າຫາກມີໂອກາດອີກຄັ້ງ ໝີພູຈະເຮັດໃຫ້ເຕັມທີ່ໃນທຸກໆວິນາທີ ແລະ ໝີພູກໍໄດ້ໂອກາດອີກຄັ້ງເຂົ້າປະກວດໃນເວທີການປະກວດ Miss Tourism Queen Laos 2018 ຫຼື ນາງສາວທູດວັດທະນະທຳແດນຈຳປາ ທີ່ໄດ້ຄັດເລືອກເອົາສາວງາມຈາກທົ່ວປະເທດ ເຊິ່ງຖືເປັນໂອກາດອັນຍິ່ງໃຫຍ່ທີ່ໝີພູໄດ້ເປັນຕົວແທນຂອງແຂວງຫົວພັນ

ເຂົ້າປະກວດໃນຄັ້ງນັ້ນ ແລະ ກໍສາມາດເຮັດຄວາມຝັນຂອງຕົນເອງໃຫ້ເປັນຈິງ ໂດຍສາມາດຄວ້າເອົາຕຳແໜ່ງ ນາງສາວທູດວັດທະນະທຳ ຫຼື Miss Tourism Unierse Laos 2018 ເຊິ່ງຖືເປັນສາວງາມຄົນທຳອິດຈາກແຂວງຫົວພັນ ທີ່ສາມາດຄວ້າຕຳແໜ່ງອັນຍິ່ງໃຫຍ່ນີ້ໄດ້ ສ້າງຄວາມພູມໃຈໃຫ້ຄອບຄົວ ພໍ່ແມ່ ແລະ ພໍ່ແມ່ພີ່ນ້ອງທີ່ຢູ່ແຂວງຫົວພັນເປັນຢ່າງດີ. ເຊິ່ງຕອນນີ້, ໝີພູກໍໄດ້ເປັນຕົວແທນແມ່ຍິງລາວ ເຂົ້າປະກວດໃນເວທີລະດັບໂລກ Miss Global 2018 ທີ່ຈະຕັດສິນໃນວັນທີ 11 ກຸມພາ 2019 ນີ້ ທີ່ກຸງມະນີລາ ປະເທດຟິລິປິນ

ໃນນາມເປັນແມ່ຍິງລາວຄົນໜຶ່ງ ໝີພູຈະເຜີຍແຜ່ວັດທະນະທຳອັນດີງາມຂອງລາວເຮົາໃຫ້ແກ່ໝູ່ນາງງາມ ແລະ ອວດສາຍຕາຄົນທົ່ວໂລກເຖິງເອກະລັກອັນໂດດເດັ່ນຂອງລາວເຮົາໃຫ້ດີທີ່ສຸດ. ຫວັງວ່າພໍ່ແມ່ພີ່ນ້ອງລາວທົ່ວປະເທດຈະເຊຍ ແລະ ສົ່ງກຳລັງໃຈໃຫ້ສາວຫົວພັນໃນການປະກວດໃນຄັ້ງນີ້ເນີ້