ເປີດຕົວ Huawei nova 4 ສະມາດໂຟນໜ້າຈໍໄຮ້ຂອບເຈາະຮູກ້ອງໜ້າ!!

 

ຫຼັງຈາກທີ່ມີກະແສຂ່າວມາຢ່າງຕໍ່ເນື່ອງຕັ້ງແຕ່ຊ່ວງທ້າຍເດືອນພະຈິກຈົນເຖິງຊ່ວງຕົ້ນເດືອນທັນວາວ່າທາງ Huawei ກຳລັງພັດທະນາສະມາດໂຟນລຸ້ນ nova ລຸ້ນໃໝ່ຫຼ້າສຸດພາຍໃຕ້ຊື່ Huawei nova 4 ເຊິ່ງເປັນສະມາດໂຟນທີ່ພັດທະນາຕໍ່ຍອດມາຈາກ Huawei nova 3 ທີ່ມີວາງຈຳໜ່າຍໃນບ້ານເຮົາ ແລະ ໄດ້ຮັບກະແສຕອບຮັບດີ. ໃນທີ່ສຸດ ວັນທີ 17 ທັນວາ ທີ່ຫາກໍ່ຜ່ານມາກັນສົດໆຮ້ອນໆນີ້ ທາງ Huawei ກໍ່ໄດ້ເປີດຕົວ Huawei nova 4 ຢ່າງເປັນທາງການທີ່ປະເທດຈີນ ທີ່ມົນຖົນຊາງຊ່າ ງານເປີດໂຕຈັດຂຶ້ນຢ່າງອະລັງການທັງໄຟແສງສີສຽງ ແລະ ພາຍໃນງານກໍ່ໄດ້ມີການເປີດຕົວສິນຄ້າອື່ນໆອີກຫຼາຍລາຍການ.

 

ແຕ່ເຮົາຈະມາເວົ້າສະເພາະຕົວເອກຂອງງານຢ່າງ Huawei nova 4 ເພາະການມາໃນຄັ້ງນີ້ໄດ້ສັ່ນຄອນວົງການສະມາດໂຟນ!! ເຫດໃດຈຶ່ງກ່າວວ່າຈົນເຖິງຂັ້ນສັ່ນຄອນວົງການ ເຮົາມາເບິ່ງລາຍລະອຽດຕ່າງໆນຳກັນເລີຍ. ສຳລັບ Huawei nova 4 ໄດ້ຮັບການພັດທະນາປັບປຸງໃນຫຼາຍໆດ້ານ ໂດຍສະເພາະໜ້າຈໍສະແດງຜົນທີ່ມີການຂະຫຍາຍພື້ນທີ່ການສະແດງຜົນໃຫ້ຊິດຂອບຫຼາຍຂຶ້ນ ສົ່ງຜົນໃຫ້ມີຂະໜາດໜ້າຈໍໃຫຍ່ເຖິງ 6.41 ນິ້ວ,​ ມີພື້ນທີ່ໃນການສະແດງຜົນເທື່ອປຽບທຽບກັບຕົວເຄື່ອງສູງເຖິງ 91.8% ແລະ ທີ່ເປັນຈຸດເດັ່ນທີ່ສຸດເລີຍນັ້ນກໍ່ຄືກັນຕັດເອົາຮອຍແຫວ່ງທີ່ເຄີຍຢູ່ດ້ານກາງອອກ ປ່ຽນເປັນການເຈາະຮູໜ້າຈໍບໍລິເວນມຸມຊ້າຍເທິງຂອງໜ້າຈໍເພື່ອຕິດຕັ້ງກ້ອງໜ້າຄວາມລະອຽດ 25 ລ້ານພິກເຊວ ມາພ້ອມເທັກໂນໂລຍີ AI Beautification ໃນຕົວ.

ທາງດ້ານຫຼັງກ້ອງ 3 ຕົວ (Triple Camara)  ຍັງຈັດຢູ່ໃນຕຳແໜ່ງມຸມດ້ານຊ້າຍ ໂດຍແບ່ງອອກເປັນກ້ອງຫຼັກ, ກ້ອງເລນມຸມກວ້າງ ແລະ ກ້ອງຮອງເກັບຂໍ້ມູນໄລຍະເລິກຕື້ນຂອງຮູບພາບ, ສຳລັບກ້ອງຫຼັກທີ່ມາໃນ Huawei nova 4 ລຸ້ນທ໋ອບຖືເປັນອີກໜຶ່ງຈຸດເດັ່ນເພາະໃຫ້ຄວາມລະອຽດຈັດເຕັມເຖິງ 48 ລ້ານພິກເຊວໂດຍໃຊ້ເຊັນເຊີ້ຮັບພາບຂັ້ນສູງລຸ້ນໃໝ່ IMX586 ຈາກທາງ Sony, ກາຍເປັນສະມາດໂຟນກ້ອງ 3  ຕົວລຸ້ນທຳອິດຂອງໂລກທີ່ມາພ້ອມກັບຄວາມລະອຽດຂອງພິກເຊວທີ່ຫຼາຍຂະໜາດນີ້ ແລະ ທີ່ຂາດບໍ່ໄດ້ເລີຍນັ້ນກໍ່ຄືເທັກໂນໂລຍີ AI ຊ່ວຍປັບແຕ່ງພາບໃຫ້ງາມແບບອັດຕະໂນມັດ.

ທາງດ້ານຂຸມພະລັງ Huawei nova 4 ມາພ້ອມກັບຊີພີຍູ Kirin 970 ເປັນຊິບເຊັດດຽວກັນກັບທີ່ໃຊ້ຢູ່ໃນ P20 ແລະ P20 Pro,  ທີ່ກາຍມາເປັນອີກໜຶ່ງຈຸດເດັ່ນກໍ່ຄືໜ່ວຍຄວາມຈຳ RAM ທີ່ໃຫ້ສູງເຖິງ 8GB, ສ່ວນໜ່ວຍຄວາມຈຳພາຍໃນ 128GB ແລະ ແບັດເຕີຣີ້ຄວາມຈຸ 3750 mAh ຮອງຮັບລະບົບສາກໄວ 18W.

ສະຫຼຸບຄຸນນະສົມບັດລວມຂອງ Huawei nova 4

  • ໜ້າຈໍສະແດງຜົນໄຮ້ຂອບຂະໜາດ 6.4ນິ້ວ ຄວາມລະອຽດ 2310x1080 ພິກເຊວ (FHD+)
  • ຊິບເຊັດປະມວນຜົນ (CPU) Huawei Kirin 970 Octa-Core Processor
  • ໜ່ວຍປະມວນຜົນກຣາບຟິກ (GPU) Mali-G72 ມາພ້ອມກັບເທັກໂນໂລຍີ GPU Turbo
  • ໜ່ວຍຄວາມຈຳ RAM 8GB
  • ໜ່ວຍຄວາມຈຳ ROM 128GB (ບໍ່ຮອງຮັບການເພີ່ມໜ່ວຍຄວາມຈຳເສີມພາຍນອກ)
  • ກ້ອງໜ້າຄວາມລະອຽດ 25 ລ້ານພິກເຊວ ຮູຮັບແສງກວ້າງ f/2.0
  • ລຸ້ນທ໋ອບກ້ອງຫຼັງ 3ຕົວ (Triple Camera) ແບ່ງອອກເປັນກ້ອງຫຼັກ ຄວາມລະອຽດ 48 ລ້ານພິກເຊວ ຮູຮັບແສງກວ້າງ f/1.8 + ກ້ອງເລນມຸມກວ້າງ ຄວາມລະອຽດ 16 ລ້ານພິກເຊວ ຮູຮັບແສງກວ້າງ f/2.2 + ກ້ອງເກັບຂໍ້ມູນໄລຍະເລິກຕື້ນຂອງຮູບພາບ ຄວາມລະອຽດ 2 ລ້ານພິກເຊວ ຮູຮັບແສງກວ້າງ f/2.4 ແລະ ສຳລັບລຸ້ນປົກກະຕິກ້ອງຫຼັກ ຄວາມລະອຽດ 20 ລ້ານພິກເຊວ ຮູຮັບແສງກວ້າງ f/1.8 + ກ້ອງເລນມຸມກວ້າງ ຄວາມລະອຽດ 16 ລ້ານພິກເຊວ ຮູຮັບແສງກວ້າງ f/2.2 + ກ້ອງເກັບຂໍ້ມູນໄລຍະເລິກຕື້ນຂອງຮູບພາບ ຄວາມລະອຽດ 2 ລ້ານພິກເຊວ ຮູຮັບແສງກວ້າງ f/2.4
  • ຮອງຮັບການໃຊ້ງານສອງຊິມ
  • ຮອງຮັບການເຊື່ອມຕໍ່ເທິງເຄືອຂ່າຍ 4G LTE, Bluetooth 4.2, Wi-Fi 802.11 a/b/g/n/ac Dual-Band
  • ຈຸດເຊື່ອມຕໍ່ເປັນແບບຫົວ USB Type-C
  • ແບັດເຕີຣີ້ 3750 mAh ພ້ອມຮອງຮັບເທັກໂນໂລຍີສາກໄວແບບ 18W
  • ລະບົບປະຕິບັດການ Android 9.0 Pie ຄອບທັບດ້ວຍ EMUI 9.0.1

ສຳລັບ Huawei nova 4 ມີໃຫ້ເລືອກທັງໝົດ 4ສີ ໄດ້ແກ່ ສີດຳ, ສີຂາວ, ສີນ້ຳເງິນແບບໄລ່ເຊດສີ ແລະ ສີແດງແບບໄລ່ເຊດສີ, ທັງ 2 ລຸ້ນແມ່ນຍັງບໍ່ໄດ້ຮັບການຢືນຢັນວ່າຈະມີການນຳເຂົ້າມາຈຳໜ່າຍໃນປະເທດລາວຫຼືບໍ່, ສາມາດຕິດຕາມຂ່າວສານຄວາມເຄື່ອນໄຫວຂອງຫົວເຫວີຍໄດ້ທີ່ Facebook Page: https://www.facebook.com/HuaweimobileLA/ , ທາງດ້ານປະເທດຈີນເລີ່ມເປີດໃຫ້ຈອງລ່ວງໜ້າກັນແລ້ວ ເລີ່ມແຕ່ 17-27 ທັນວາ ລາຍລະອຽດລາຄາມີດັ່ງລຸ່ມນີ້:

  • Huawei nova 4 ລຸ້ນທ໋ອບ (ກ້ອງຫຼັງຄວາມລະອຽດ 48 ລ້ານພິກເຊວ) ລາຄາ 3,399 ຢວນ
  • Huawei nova 4 ລຸ້ນປົກກະຕິ (ກ້ອງຫຼັງຄວາມລະອຽດ 20 ລ້ານພິກເຊວ) ລາຄາ 3,099 ຢວນ