ເປີດຕົວດາວທຽມລາວ ດວງທຳອິດ

ໃນວັັນທີ 2 ກັນຍາ 2015 ນີ້ ທ່ານ ຈູມມາລີ ໄຊຍະສອນ ເລຂາທິການໃຫຍ່ ຄະນະບໍລິ ຫານງານສູນການພັກ ປປ ລາວ, ປະທານປະເທດ ແຫ່ງ ສປປ ລາວ ພ້ອມພັນລະຍາ ແລະ ຄະນະຜູ້ແທນຂັ້ນສູງ ໄດ້ໄປສະຖາບັນອາວະກາດແຫ່ງ ສປ ຈີນ ເພື່ອຢ້ຽມຢາມໂຮງງານຜະລິດດາວທຽມ ແລະ ເປັນໂຮງງານຜະລິດດາວທຽມດວງທຳອິດຂອງລາວ.

ທ່ານ ຈູມມາລີ ໄຊຍະສອນ ໄດ້ຮັບຟັງການລາຍງານສະພາບການຜະລິດດາວທຽມລາວ ດວງທຳອິດ ຈາກ ທ່ານ ເລີຍ ຝານເຜີຍ ປະທານກຸ່ມບໍລິສັດວິທະຍາສາດເຕັກໂນໂລຊີ ການບິນອາວະກາດ ສປ ຈີນ ແລະ ການກະກຽມຄວາມພ້ອມຂອງ ສປປ ລາວ ຈາກທ່ານ ຫຽມ ພົມມະຈັນ ລັດຖະມົນຕີວ່າການກະຊວງໄປສະນີ ໂທລະຄົມມະນາຄົມ ແລະ ການສື່ສານ ສປປ ລາວ ເຊິ່ງທ່ານ ຫຽມ ພົມມະຈັນ ໄດ້ກ່າວບາງຕອນວ່າ: ໃນເດືອນທັນວາ 2011, ກະຊວງໄປສະນີໂທລະຄົມມະນາຄົມ ແລະ ການສື່ສານ ໄດ້ປັບປຸງ ແລະ ເຊັນສັນຍາການກໍ່ສ້າງໂຄງການດາວທຽມ ກັບບໍລິສັດ China APMT ແລະ ບໍລິສັດອຸດສາຫະກໍາ ກໍາແພງຍັກຂອງ ສປ ຈີນ ທີ່ນະຄອນຫລວງວຽງຈັນ. ນັບແຕ່ນັ້ນມາ, ທັງສອງຝ່າຍກໍໄດ້ຮ່ວມມືກັນດຳເນີນການປະຕິບັດໂຄງການດັ່ງກ່າວ ຢ່າງມີຄວາມຮັບຜິດຊອບສູງ, ເພາະວ່າໂຄງການນີ້ເປັນໂຄງ ການທີ່ມີຄວາມໝາຍຄວາມສຳຄັນຫລາຍຕໍ່ການພົວພັນ ແລະ ຮ່ວມມື ລາວ-ຈີນ ໂດຍສະເພາະໃນຂົງເຂດ ເຕັກໂນໂລຊີລະດັບສູງ ກໍຄືໃນການປະກອບສ່ວນເຂົ້າໃນການພັດທະນາເສດຖະກິດ ແລະ ສັງຄົມຂອງ ສປປ ລາວ.

ທ່ານ ກ່າວຕື່ມວ່າ: ໂຄງການໄດ້ດຳເນີນເປັນ 2 ໄລຍະ ຄື: ໄລຍະທີ 1 ແມ່ນໄລຍະການຜະລິດ ແລະ ສົ່ງດາວທຽມຂຶ້ນສູ່ວົງໂຄຈອນ, ພ້ອມທັງເປັນໄລຍະກໍ່ສ້າງສະຖານີບັນຊາພາກພື້ນດິນ, ເຊິ່ງມາຮອດປັດ ຈຸບັນໄດ້ສໍາ ເລັດໂດຍພື້ນຖານແລ້ວ. ປັດຈຸບັນການກໍ່ສ້າງລະບົບຕ່າງໆ ຂອງໂຄງການແມ່ນມີຄວາມພ້ອມທຸກຢ່າງ ແລະ ດາວທຽມດວງນີ້ຈະໄດ້ສົ່ງຂຶ້ນສູ່ວົງໂຄຈອນໃນທ້າຍເດືອນພະຈິກ 2015 ທີ່ຈະມາເຖິງນີ້. ທັງນີ້ກໍເພື່ອເປັນ ຂອງຂວັນອັນ ປະເສີດ ຕ້ອນຮັບວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 40 ປີ. ໄລຍະທີ 2 ແມ່ນໄລຍະການດຳເນີນທຸລະກິດດາວທຽມ ເຊິ່ງທັງສອງຝ່າຍໄດ້ຮ່ວມກັນສ້າງຕັ້ງ ບໍລິສັດຮ່ວມທຶນນໍາກັນ ເພື່ອດຳເນີນ ທຸລະກິດດາວທຽມດວງດັ່ງກ່າວ ໃຫ້ເກີດຜົນປະໂຫຍດສູງສຸດໃຫ້ແກ່ສອງຝ່າຍ, ໂດຍສະເພາະສຳລັບຝ່າຍລາວ ແມ່ນມີຄວາມມຸ້ງຫວັງຢາກໃຫ້ໂຄງ ການດາວທຽມດວງທໍາອິດນີ້ສາມາດ ສ້າງລາຍໄດ້ ເພື່ອທົດແທນເງິນກູ້ ແລະ ເພື່ອສືບຕໍ່ຂະຫຍາຍໂຄງ ການນີ້ຕໍ່ໄປອີກ, ອີກດ້ານໜຶ່ງກໍຈະເປັນການຍົກຖານະຂອງ ສປປ ລາວ ໃຫ້ສູງຂຶ້ນຕື່ມໃນວົງຄະນາຍາດສາກົນ.ໃນພິທີເປີດຕົວດາວທຽມລາວດວງທຳອິດນີ້ ທ່ານ ຈູມມາລີ ໄຊຍະສອນ ເລຂາທິການໃຫຍ່, ຄະ ນະບໍລິຫານງານສູນການພັກ ປປ ລາວ, ປະທານປະເທດ ແຫ່ງ ສປປ ລາວ ໄດ້ໃຫ້ກຽດຕາງໜ້າການນໍາສູງສຸດຂອງພັກ ແລະ ລັດ ແຫ່ງ ສປປ ລາວ ເຂົ້າຮ່ວມພິທີ ແລະ ຕັດແຖບຜ້າ ເພື່ອເປັນສີລິມຸງຄຸນຢ່າງສູງໃຫ້ແກ່ດາວທຽມລາວ ແລະ ເພື່ອເປັນການຢັ້ງຢືນເຖິງຜົນສຳເລັດ ການຜະລິດແກ່ດາວທຽມລາວດວງທຳອິດ.

ທີ່ມາ CRI-FM93