ເປີດກິດຈະກຳການນຳໃຊ້ນ້ຳຢ່າງມີສ່ວນຮ່ວມແບບຍືນຍົງເຂົ້າໃນການຜະລິດກາເຟ

ພະ​ແນ​ກຊັບພະຍາກອນ​ທຳ​ມະ​ຊາດ ​ແລະ ສິ່ງ​ແວດ​ລ້ອມ ​ແຂວງ​ຈຳປາ​ສັກ​ ໄດ້​ຈັດ​ກອງ​ປະຊຸມ ​ເປີດ​ກິດຈະກຳ​ການ​ນຳ​ໃຊ້​ນ້ຳຢ່າງມີ​ສ່ວນ​ຮ່ວມ​ແບບ​ຍືນ​ຍົງ ​ເຂົ້າ​ໃນ​ການ​ຜະລິດ​ກາ​ເຟ ​ເຂດ​ພູ​ພຽງ​ບໍລະ​ເວນ ​ເພື່ອ​ຫລຸດຜ່ອນ​ນ້ຳ​ເປື້ອນ​ ຈາກຂະ​ບວນການ​ແປ​ຮູບ​ກາ​ເຟ​ແບບ​ປຽກ ທີ່​ກໍ່​ໃຫ້​ເກີດ​ມົນ​ລະ​ພິດ​ຕໍ່​ແຫລ່ງນ້ຳ ​ໂດຍ​ໄດ້​ຮັບ​ທຶນ​ຊ່ວຍ​ເຫລືອ​ຈາກ ກອງ​ທຶນ​ອະນຸ​ລັກ​ຊັບພະຍາກອນ​ທຳ​ມະ​ຊາດ​ສາກົນ (WWF).

ກອງ​ປະຊຸມ​ໄດ້​ຈັດ​ຂຶ້ນ​ໃນ​ວັນ​ທີ 18 ກັນຍາ 2015 ນີ້​ ທີ່​ພະ​ແນ​ກດັ່ງກ່າວ, ​ໃຫ້​ກຽດ​ເປັນ​ປະທານ​ຂອງ​ທ່ານ ບຸນຄ້ຳ ​ໂພທິ​ສານ ຮອງ​ຫົວໜ້າ​ພະ​ແນ​ກຊັບພະຍາກອນ​ທຳ​ມະ​ຊາດ ​ແລະ ສິ່ງ​ແວດ​ລ້ອມ​ແຂວງ​ຈຳປາ​ສັກ, ທ່ານ ຟຣັ່ງຊົວ ​ເກ​ກັງ ຮອງ​ຫົວໜ້າ​ກອງ​ທຶນ​ອະນຸ​ລັກ​ຊັບພະຍາກອນ​ທຳ​ມະ​ຊາດ​ສາກົນ, ມີຂະ​ແໜງ ການ​ທີ່​ກ່ຽວຂ້ອງ​ພາຍ​ໃນ​ແຂວງເຂົ້າຮ່ວມ​ຢ່າງ​ພ້ອມພຽງ.

​​ທ່ານນາງ ວິສາ ຊ່ຽວຊານ​ຂອງກອງ​ທຶນອະນຸ​ລັກ​ຊັບພະຍາກອນ​ທຳ​ມະ​ຊາດ​ສາກົນ​​ກ່າວວ່າ: ​ນ້ຳ​ເປື້ອນ​ທີ່​ເກີດ​ຈາກ​ຂະ​ບວນການ​ແປ​ຮູບ​ກາ​ເຟ​ແບບ​ປຽກ ​ເຊິ່ງມີ​ປະລິມານ​ນ້ຳຕານ​ສູງ ​ແລະ ​​ເຮັດ​ໃຫ້​ຄຸນຄ່າ​ຂອງ​ປະລິມານ​ອົກ​ຊີ​ແຊນ​ທີ່​​ແບຣດທິ​ເລຍ ​ໃຊ້​ໃນ​ການ​ຍ່ອຍ​ສະຫລາຍ​ອິນ​ຊີ ​ແລະ ປະລິມານ​ອົກ​ຊີ​ແຊນ​​ໃນ​ນ້ຳຫລຸດ​ລົງ. ຫາກ​ບໍ່​ມີ​ການ​ປ້ອງ​ກັນ​ນ້ຳ​ເປື້ອນມັນ​ຈະ​ເຮັດ​ໃຫ້​ເກີດ​ມົນ​ລະ​ພິດ​ຕໍ່​ແຫລ່ງນ້ຳ, ສ້າງ​ຄວາມ​ເສຍ​ຫາຍ​ຕໍ່​ລະບົບ​ນິ​ເວດ​ທາງນ້ຳ ​ແລະ ​ເປັນ​ໄພ​ຂົ່ມຂູ່​ຕໍ່​ສຸ​ຂະ​ພາບ​ຂອງ​ຊຸມ​ຊົນ​ທີ່​ຢູ່​​ໃກ້​ຄຽງ​ໄດ້. ເຊິ່ງ​ບັນຫາ​ສິ່ງ​ແວດ​ລ້ອມ​ດັ່ງກ່າວ ​ໄດ້​ຮັບ​ຄວາມເອົາ​ໃຈ​ໃສ່​ຫລາຍ​ຂຶ້ນ​ ໃນ​ບັນດາ​ປະ​ເທດ​ທີ່​ຜະລິດ​ກ​າ​ເຟ​ໃນ​ໄລຍະ 2-3 ປີ​ທີ່​ຜ່ານ​ມາ ມີ​ຫລາຍໆ​ການ​ສຶກສາ​ໄດ້​ເປີດ​ເຜີ​ຍວ່າ​ນ້ຳ​ເປື້ອນ ​ທີ່​ບໍ່​ຖືກ​ບຳບັດ​ຈາກ​ຂະ​ບວນການ​ຜະລິດ​ກາ​ເຟ ຂອງ​ຜູ້​ປະກອບ​ການ ​ແມ່ນ​ໄດ້​ສົ່ງ​ຜົນ​ກະທົບ​ຕໍ່​ຄຸນ​ນະພາ​ບຂອງ​ໜ້ານ້ຳ​ໃນ​ທົ່ວ​ໂລກ ​ແລະ ​ເປັນ​ຈຳນວນ​ຫລາຍ​ໃນ​ບັນດາ​ປະ​ເທດ​ທີ່​ກຳລັງ​ພັດທະນາ​ ເຊັ່ນ​ດຽວ​ກັບປະ​ເທດ​ລາວ. ຂະ​ບວນການ​ແປ​ຮູບ​ກາ​ເຟ ອາ​ລາ​ບີ​ກາ ລະບົບ​ປຽກ​ແມ່ນ​ຕ້ອງ​ໃຊ້​ນ້ຳຈຳນວນຫລາຍ​ໃນ​ຂະ​ບວນການ​ຜະລິດ ​ຈົນ​ກວ່າ​ຈະ​ໄດ້​ກາ​ເຟ​ເມັດ​ຂຽວ​ທີ່​ສະອາດ.​ ເຊິ່ງ​ໄດ້​ມີ​ການ​ຄາ​ດຄະ​ເນນ້ຳ​ເປື້​ອນ​ທີ່​ເກີດ​ຈາກການ​ປຸງ​ແຕ່ງ​ກາ​ເຟ ຈຳນວນ 23 ລ້ານ​ລິດ ​ໄດ້​ໄຫລລົງ​ສູ່​ແມ່ນ້ຳ​ໃນ​ເຂດ​ພູ​ພຽງ​ບໍລະ​ເວນ​​ໃນ​ແຕ່ລະ​ປີ.

            ທ່ານນາງ ວິສາ ​ໃຫ້ຮູ້ຕື່ມວ່າ: ຕໍ່ກັບບັນຫາດັ່ງກ່າວ ຈຶ່ງໄດ້ເປີດກິດຈະກຳໃນການສົ່ງເສີມການນຳໃຊ້ນ້ຳຢ່າງມີສ່ວນຮ່ວມແບບຍືນຍົງ ໃນການຜະລິດກາເຟ ຢູ່ເຂດພູພຽງບໍລະເວນ, ເພື່ອສ້າງຄວາມເຂົ້າໃຈກ່ຽວກັບຜົນກະທົບຂອງການຜະລິດກາເຟຕໍ່ກັບສິ່ງແວດລ້ອມ ​ໃຫ້ແກ່ຜູ້ມີສ່ວນຮ່ວມໃນການຜະລິດກາເຟ. ປັບປຸງຄວາມອາດສາມາດຂອງພະນັກງານຫ້ອງການຊັບພະຍາກອນທຳມະຊາດ ​ແລະ ສິ່ງແວດລ້ອມ. ພັດທະນາຍຸດທະສາດການຮ່ວມມືຈາກຫລາຍພາກສ່ວນ ສຳລັບອົງການອະນຸລັກທຳມະຊາດໂລກ ປະຈຳ ສປປ ລາວ​ ​ແລະ ອົງການອອກຟາມກ່ຽວກັບນ້ຳ ​ແລະ ກາເຟໃນເຂດເມືອງປາກຊ່ອງ, ເຊິ່ງກິດຈະກຳທີ່ຈະເຮັດປະກອບມີເຊັ່ນ: ສ້າງແຜນທີ່ເຂດການຜະລິດກາເຟ, ການໄຫລຂອງລະບົບຍອດນ້ຳ,​ ໄປທັດສະນະສຶກສາທີ່ປະເທດຫວຽດນາມ ​ເພື່ອຊ່ວຍໃຫ້ກຸ່ມຜູ້ມີສ່ວນຮ່ວມໄດ້ພົບເຫັນ ​ແລະ ຮຽນຮູ້ເອົາຮູບແບບການປະຕິບັດຕໍ່ສິ່ງແວດລ້ອມ ​ແລະ ກິດຈະກຳອື່ນໆທີ່ສຳຄັນ ເຊິ່ງກິດຈະກຳດັ່ງກ່າວແມ່ນໄດ້ຮັບທຶນສະໜັບສະໜູນ ຈາກກອງທຶນ ອະນຸລັກຊັບພະຍາກອນທຳມະຊາດສາກົນ ມູນຄ່າ 30 ພັນ​​ກວ່າໂດລາສະຫະລັດ, ມີໄລຍະເວລາໃນການດຳເນີນກິດຈະກຳ 4 ​ເດືອນ ສົກປີ 2014-2015 .

ທີ່ມາ http://kpl.gov.la/