ເປັນ​ຫວ່ງ! ​ພະ​ລັງ​ງານ​ທີ່​ມີ​ຢູ່ຫາກ​ນຳໃຊ້​ບໍ່​ຖຶກວິທີ ກໍ່​ອາດ​ກະທົບ​​ໄລຍະ​ຍາວ

ກະຊວງພະລັງງານ ແລະ ບໍ່ແຮ່ ປຶກສາຫາລືກັບອົງການ UNIDO ກ່ຽວກັບການການພັດທະນາຕະຫຼາດພະລັງງານໃນພາກພື້ນ, ບັນຫາທີ່ພວມປະເຊີນຢູ່ໃນຂະແໜງອຸດສາຫະກຳພະລັງງານ ແລະ ພ້ອມກັນສະໜັບສະໜູນຂະແໜງອຸດສາຫະກຳພະລັງງານຂອງພາກພື້ນໃຫ້ມີຄວາມກ້າວໜ້າ. ຂະນະທີ່ ປີ 2016 ທົ່ວປະເທດມີໂຄງການຜະລິດໄຟຟ້າທັງໝົດ 45 ແຫ່ງ, ມີກຳລັງຜະລິດທັງໝົດ 6,441 ເມກາວັດ.

ກະຊວງພະລັງງານ ແລະ ບໍ່ແຮ່ ຮ່ວມກັບ ອົງການ UNIDO ( UNITED NATIONS INTUSTRIAL DEVILOPMENT ORGANIZATION ) ຈັດກອງປະຊຸມສຸດຍອດການຮ່ວມມືດ້ານພະລັງງານສາກົນ ໃນ ສປປ ລາວ 2017 ( Laos International Power Summit 2017 ) ຂຶ້ນ, ໂດຍການເປັນປະທານຂອງ ທ່ານ ປອ. ສິນາວາ ສຸພານຸວົງ ຮອງລັດຖະມົນຕີກະຊວງພະລັງງານ ແລະ ບໍ່ແຮ່, ພ້ອມດ້ວຍບັນດານັກລົງທຶນດ້ານພະລັງງານໄຟຟ້າ, ອົງການຈັດຕັ້ງສາກົນ ແລະ ພາກສ່ວນກ່ຽວຂ້ອງເຂົ້າຮ່ວມ. ໃນວັນທີ 22 ມິຖຸນາ 2017, ທີ່ໂຮງແຮມດອນຈັນພາເລດ.

ທ່ານ ປອ. ສິນາວາ ສຸພານຸວົງ ຮອງລັດຖະມົນຕີກະຊວງພະລັງງານ ແລະ ບໍ່ແຮ່ ກ່າວວ່າ: ຈຸດປະສົງກອງປະຊຸມຄັ້ງນີ້ ເພື່ອເປັນການເຕົ້າໂຮມເອົາບັນດາພະນັກງານລັດ, ຜູ້ວາງນະໂຍບາຍ, ຜູ້ດຳເນີນທຸລະກິດໄຟຟ້າ ລວມທັງບັນດາວິສາຫະກິດ ແລະ ເອກະຊົນ, ບັນດານັກລົງທຶນ ແລະ ຜູ້ໃຫ້ບໍລິການຕ່າງໆ ເພື່ອແລກປ່ຽນ ແລະ ປຶກສາຫາລືກ່ຽວກັບການພັດທະນາຕະຫຼາດພະລັງງານໃນພາກພື້ນ, ບັນຫາທີ່ພວມປະເຊີນຢູ່ໃນຂະແໜງອຸດສາຫະກຳພະລັງງານ ແລະ ພ້ອມກັນສະໜັບສະໜູນຂະແໜງອຸດສາຫະກຳພະລັງງານຂອງພາກພື້ນໃຫ້ມີຄວາມກ້າວໜ້າ. ກອງປະຊຸມຄັ້ງນີ້ຈັດຂຶ້ນພາຍໃຕ້ຫົວຂໍ້: “ ການເພີ່ມປະສິດທິພາບໃນການເຊື່ອມໂຍງພະລັງງານ ເພື່ອການຂັບເຄື່ອນທີ່ຂະຫຍາຍຕົວແບບຍືນຍົງ ” ເຊິ່ງຫົວຂໍ້ດັ່ງກ່າວນີ້ຈະກວມເອາບັນດານະໂຍບາຍ, ລະບຽບການສຳລັບການລົງທຶນດ້ານທຸລະກິດໄຟຟ້າ, ການຊື້ – ຂາຍໄຟຟ້າ ແລະ ການຄຸ້ມຄອງຄວາມສ່ຽງຕ່າງໆ, ການຜະລິດໄຟຟ້າ ແລະ ການພັດທະນາພະລັງງານທົດແທນອື່ນໆ, ການຈັດສັນງົບປະມານຂອງໂຄງການ, ລະບົບສາຍສົ່ງ ແລະ ການຈຳໜ່າຍ, ການຜະລິດພະລັງານຄວາມຮ້ອນຖ່ານຫີນທີ່ສະດວກ ແລະ ອື່ນໆ.

ທ່ານ ຄຳໂສ ກຸໂພຄຳ ຮອງຫົວໜ້າກົມນະໂຍບາຍ ແລະ ແຜນພະລັງງານ ກະຊວງພະລັງງານ ແລະ ບໍ່ແຮ່ ກ່າວບາງຕອນວ່າ: ສປປ ລາວ ເປັນປະເທດມີທ່າແຮງທາງດ້ານໄຟຟ້າພະລັງງານນ້ຳຕົກ, ເຊິ່ງມາຮອດປີ 2016 ທົ່ວປະເທດມີໂຄງການຜະລິດໄຟຟ້າທັງໝົດ 45 ແຫ່ງ, ມີກຳລັງຜະລິດທັງໝົດ 6,441 ເມກາວັດ. ໃນນັ້ນ, ມີໂຄງການຜະລິດໄຟຟ້ານ້ຳຕົກ 42 ແຫ່ງ ມີກຳລັງການຜະລິດ 4,537.59 ເມກາວັດ ກວມເອົາ 70.45% ຂອງພະລັງງານທັງໝົດ, ໂຄງການຜະລິດໄຟຟ້າຖ່ານຫີນ 1 ແຫ່ງ ມີກຳລັງການຜະລິດ 1,875 ເມກາວັດ ກວມເອົາ 29.16% ລ້ານ ແລະ ໂຄງການຜະລິດໄຟຟ້າຊີວະມວນ ມີ 2 ແຫ່ງ ມີກຳລັງການຜະລິດ 25 ເມກາວັດ ກວມເອົາ 0.39% ຂອງພະລັງງານທັງໝົດ.

Cr: https://laoedaily.com.la