ເປັນຫຍັງ? ຕະຫຼາດຄຳສະຫວາດ ສ້າງແລ້ວ ແຕ່ບໍ່ມີແມ່ຄ້າມາຂາຍເຄື່ອງ

      ຕະຫຼາດຄຳສະຫວາດ ເມືອງໄຊເສດຖາ ນະຄອນຫຼວງວຽງຈັນກໍແມ່ນຕະຫຼາດ ໜຶ່ງທີ່ສ້າງຂຶ້ນເພື່ອເປັນທາງເລືອກໃໝ່ໃຫ້ກັບແມ່ຄ້າຊາວຂາຍທີ່ມີຄວາມສົນໃຈຢາກເຊົ່າພື້ນທີ່ເພື່ອຂາຍເຄື່ອງຍົກ-ຍ່ອຍສິນຄ້າທັງເປັນການຫຼຸດຜ່ອນຄວາມແອອັດໃຫ້ກັບຕະຫຼາດໃຫຍ່ໆຂອງນະຄອນຫຼວງ, ແຕ່ພາຍຫຼັງທີ່ສ້າງສຳເລັດແລ້ວ ພັດຍັງບໍ່ທັນມີແມ່ ຄ້າເຂົ້າມາຈັບຈອງຫຼາຍເທື່ອຂະນະທີ່ຜູ້ເປັນເຈົ້າຂອງຕະ ຫຼາດເຊີນຊວນຜູ້ປະກອບ ການກໍຄືແມ່ຄ້າຊາວຂາຍເຂົ້າ ມາຈັບຈອງໂດຍໄລຍະໃໝ່ນີ້ແມ່ນຈະບໍ່ມີການເກັບຄ່າແຕ່ຢ່າງໃດ.

          ທ່ານນາງ ຂັວນຕາ ລິດຕິ ເຈົ້າຂອງຕະຫຼາດຄຳສະຫວາດ ໃຫ້ສຳພາດກັບນັກຂ່າວເສດຖະກິດ ເມື່ອບໍ່ ດົນມານີ້ ໃຫ້ຮູ້ວ່າ: ຕະຫຼາດຄຳສະຫວາດເປັນຕະຫຼາດໜຶ່ງທີ່ໄດ້ເລີ່ມໃຫ້ບໍລິການມາແຕ່ປີ 2009 ໂດຍເບື້ອງຕົ້ນເປັນພຽງຕະຫຼາດຂອງບ້ານ ແລະໄດ້ຂະຫຍາຍມາເລື້ອຍໆ, ພ້ອມທັງໄດ້ຂຶ້ນທະບຽນເປັນວິສາຫະກິດ ໃນປີ 2012 ແລະຕົກມາໃນປີ 2015, ພາຍຫຼັງທີ່ທາງຂັ້ນເທິງ ກໍຄື ກອງປະຊຸມຂອງນະຄອນຫຼວງໄດ້ຕົກລົງເຫັນດີມອບໃຫ້ຕະຫຼາດຄຳສະ ຫວາດເປັນໜຶ່ງໃນຕະຫຼາດທີ່ຈະຮອງຮັບ ແມ່ຄ້າຈາກການຍົກຍ້າຍຂອງຕະຫຼາດ ທາດຫຼວງ, ເມື່ອເປັນແນວນັ້ນເຈົ້າຂອງຕະຫຼາດຈຶ່ງໄດ້ທຸ່ມທຶນ 8 ຕື້ກວ່າກີບ ເຂົ້າໃນການປັບປຸງ, ບູລະນະສະຖານທີ່ເກົ່າ ຄືນໃໝ່ ແລະໄດ້ຂະຫຍາຍພື້ນທີ່ອອກຕື່ມເພື່ອໃຫ້ພຽງພໍກັບການຮອງຮັບແມ່ຄ້າທີ່ຈະຍົກຍ້າຍມາ ແລະມາຮອດດຽວນີ້ ຕະ ຫຼາດຂອງພວກເຮົາແມ່ນສ້າງສຳເລັດ, ທັງພ້ອມແລ້ວທີ່ຈະຮັບເອົາບັນດາແມ່ຄ້າ ທີ່ຖືກຍົກຍ້າຍມາ.

    ສຳລັບການປັບປຸງກໍ່ສ້າງຕະຫຼາດຄຳສະຫວາດແຫ່ງນີ້ ມີເນື້ອທີ່ທັງໝົດ 2,5 ເຮັກຕາ, ເປັນອາຄານ 3 ຫຼັງ ແລະສາມາດຮອງຮັບແມ່ຄ້າທີ່ຈະເຂົ້າມາວາງຂາຍໄດ້ທັງໝົດ 500 ກວ່າໂຕະຂຶ້ນໄປ, ພ້ອມ ນັ້ນ ຕະຫຼາດຍັງໄດ້ອຳນວຍຄວາມສະ ດວກໃຫ້ກັບແມ່ຄ້າທີ່ມາຂາຍ ເປັນຕົ້ນ ແມ່ນສະຖານທີ່ຈອດລົດ, ນ້ຳ, ໄຟຟ້າ, ການຮັກສາຄວາມສະອາດຂອງຕະຫຼາດ ແລະອື່ນໆ, ແຕ່ປະຈຸບັນ ມີຜູ້ມາຂາຍແລ້ວແຕ່ພຽງ 5% ຂອງພື້ນທີ່ທັງໝົດໃນຕະ ຫຼາດ.

           ທ່ານນາງ ຂວັນຕາ ລິດຕິ ຍັງໃຫ້ຮູ້ ອີກວ່າ: ຢ່າງໃດກໍຕາມ ໃນການປະຕິບັດ ຕາມຄຳສັ່ງດັ່ງກ່າວນັ້ນ ຍັງເຫັນວ່າຈຳນວນແມ່ຄ້າທີ່ຈະຍົກຍ້າຍມາຢູ່ພາຍໃນຕະຫຼາດຂອງພວກເຮົາ, ມາຮອດດຽວນີ້ ແມ່ນຍັງບໍ່ທັນເຂົ້າມາເທື່ອ, ສະນັ້ນ ຈິ່ງເຮັດໃຫ້ພື້ນທີ່ຂອງຕະຫຼາດ ຍັງວ່າງເປັນຈຳນວນຫຼວງຫຼາຍ, ຖ້າຫາກວ່າແມ່ຄ້າ ຫຼື ຜູ້ປະກອບການທ່ານໃດມີຄວາມສົນ ໃຈຢາກເຂົ້າມາຈັບຈອງ ຫຼື ວາງຂາຍສິນ ຄ້າປະເພດເຄື່ອງສົດ, ອາຫານແຫ້ງ ແລະອື່ນໆ ກໍສາມາດເຂົ້າມາປະສານງານກັບ ທີມງານຕະຫຼາດຂອງພວກເຮົາໄດ້ ແລະເພື່ອເປັນການທົດລອງຕະຫຼາດ ໃນໄລຍະໃໝ່ນີ້ທາງຮ້ານ ຈະບໍ່ໄດ້ເກັບຄ່າແຕ່ຢ່າງ ໃດ, ຊຶ່ງຕະຫຼາດຂອງພວກເຮົາຕັ້ງຢູ່ບ້ານ ຄຳສະຫວາດ ເມືອງໄຊເສດຖາ ນະຄອນ ຫຼວງວຽງຈັນ.

ແຫຼ່ງຂ່າວ: ໜັງສືພິມເສດຖະກິດ-ສັງຄົມ.