ເປັນຫຍັງ 'ແຟນເດ' ຈຶ່ງເຮັດໃຫ້ຄົນໄຫ້ເກືອບຫມົດໂຮງຫນັງ?

ໄລຍະຜ່ານມານີ້ຕະຫລາດຮູບເງົາຢູ່ບ້ານເຮົາພວມຂະຫຍາຍຕົວ (ອາດເປັນເພາະມີໂຮງຮູບເງົາຫລາຍຂຶ້ນກໍບໍ່ຮູ້ເນາະ ອິອິ) ມີຮູບເງົາຫລາກຫລາຍປະເພດທັງພາຍໃນແລະຕ່າງປະເທດມາເປັນທາງເລືອກໃຫ້ແກ່ຜູ້ຊົມຫລາຍຂຶ້ນ. ມື້ນີ້ກໍເລີຍຈະຢິບຍົກຮູບເຫງົາເລື່ອງຫນຶ່ງທີ່ພວມເປັນກະແສຂຶ້ນມາເວົ້າສູ່ກັນຟັງ. ຫລາຍໆຄົນຄົງຈະຮູ້ຈັກຮູບເງົາເລື່ອງ 'ແຟນເດ ແຟນກັນວັນດຽວ' ຜົນງານປະເທດເພື່ອນບ້ານແລະເປັນຜົນງານທຳອິດຈາກຄ້າຍນ້ອງໃຫມ່ GDH ທີ່ເປີດສາຍຢ່າງເປັນທາງການເມື່ອວັນທີ 1 ກັນຍາໂດຍໄດ້ຜູ້ກຳກັບຫນຸ່ມ ໂຕ້ງ ບັນຈົງ ແລະຜູ້ຂຽນບົດທີ່ຫລິ້ນເປັນຕົວລະຄອນຫລັກນັ້ນກໍຄື ເຕີ໋ ສັນທະວິດ. ແຟນເດ ບອກເລົ່າເລື່ອງລາວຄວາມຮັກຊຶ້ງໆຂອງ ເດັ່ນໄຊ ( ເຕີ໋ ສັນທະວິດ) ຫນຸ່ມພະນັກງານໄອທີເຊີຍໆທີ່ແອບຮັກ ເພື່ອນຮ່ວມງານທີ່ສູງສົ່ງກວ່າຕົນເອງ ບໍ່ຕ່າງຈາກດອກຟ້າກັບມາວັດ ຈົນກະທັ້ງມື້ຫນຶ່ງ ນຸ້ຍ ( ມິວ ນິດຖາ) ນາງເອກໄດ້ປະສົບອຸບັດເຫດຄວາມຈຳເສື່ອມຫນຶ່ງວັນ ເດັ່ນໄຊກໍເລີຍສວມຮອຍຕົວະວ່າເປັນແຟນນຸ້ຍ ແລະພະຍາຍາມເຮັດທຸກສິ່ງທຸກຢ່າງເພື່ອສ້າງຄວາມຊົງຈຳທີ່ດີທີ່ສຸດກັບຍິງສາວທີ່ຕົນແອບຮັກມາຫລາຍປີ. ຟັງເບິ່ງພັອດເລື່ອງແລ້ວນ້ຳເນົ່າຍຸງລາຍຂະຫນາດເນາະ ຫ່ະ!ຫ່ະ!ຫ່ະ! ພັອດແບບນີ້ໃຜໆກໍຂຽນໄດ້ (ມີຄວາມຫລົງໂຕເອງເລັກນ້ອຍ) ແຕ່ດ້ວຍຄວາມຢາກເຫັນນ້ອງໃຫມ່ໂຊຂອງ ບວກກັບມັກຜົນງານຂອງຜູ້ກຳກັບຄົນນີ້ຕັ້ງແຕ່ເລື່ອງອ້າຍມາກພະຂະໂຫນງກໍເລີຍບໍ່ລັງເລທີ່ຈະຈົກເງິນຊື້ປີ້ 40.000 ກີບໄປນັ່ງເບິ່ງ ເກືອບ 2 ຊົ່ວໂມງຜ່ານໄປກໍຕ້ອງອອກຈາກໂຮງໃນສະພາບມາສຄາຣາເປື້ອນຕາໄຫລຊະໄຫລຊາຍ ຫ່ະ! ຫ່ະ! ຜູ້ຂ້ານັ່ງໄຫ້ຕັ້ງແຕ່ຕົ້ນຈົນຈົບ. ປະການທຳອິດທີ່ຕ້ອງເວົ້າຄວາມຈິງແບບບໍ່ໄດ້ຍ້ອງຄື ຕົວລະຄອນມີຄວາມເປັນທຳມະຊາດສູງຂະນະດຽວກັນກໍມີຊີວິດຊີວາຕາມແບບຄາເລັກເຕີ້ທີ່ຄວນຈະເປັນ ເຊິ່ງມັນສະແດງໃຫ້ເຫັນວ່າຜູ້ກຳກັບໃສ່ໃຈຕໍ່ກັບການປັ້ນແຕ່ງຕົວລະຄອນ ໂດຍສະເພາະເດັ່ນໄຊ ໃຫ້ເປັນຜູ້ຊາຍຊົກມົກຮົກເຮື້ອຕາມແບບສະບັບພະນັກງານໄອທີທີ່ຂາດທັກສະໃນການປະຕິສຳພັນກັບສັງຄົມ (ໄດ້ຂ່າວວ່າ ພະເອກຕ້ອງລົງທຶນເພີ່ມນ້ຳຫນັກ 8ໂລ, ດັດຜົມ, ເຮັດແຂ້ວເຈີງ, ນຸ່ງເຄື່ອງມືສອງຂອງຢີ່ປຸ່ນ ແລະສວມວິນຍານເປັນຕົວລະຄອນແທ້ໆທັງໃນຈໍ-ນອກຈໍຕັ້ງ6ເດືອນ) ຜູ້ຂຽນມັກ! ມັກທີີຊ່າງແຕ່ງຫນ້າບໍ່ທາລິບມັນໃຫ້ພະເອກເລີຍ ທັງທີ່ພະເອກປາກແຕກລອກເພາະອາກາດຫນາວ ນັ້ນສະແດງໃຫ້ເຫັນເຖິງຄວາມໃສ່ໃຈຂອງຜູ້ກຳກັບທີ່ພະຍາຍາມປ່ອຍໃຫ້ມີຄວາມເປັນທຳມະຊາດ. ແຕ່ໃນຂະນະດຽວກັບຕົວລະຄອນເດັ່ນໄຊກໍເຮັດໃຫ້ຜູ້ຊົມຫົວຂວັນໄດ້ຜ່ານມາຊື່ໆກົງໆແບບໂງ່ໆຂອງເພິ່ນ ແລະທີ່ແນ່ນອນ ດວງຕາທີ່ຊຸກເຊື່ອງໄວ້ໃຕ້ແວ່ນຕາຫັກໆພັນດ້ວຍພາສເຕີ້ຕິດບາດຂອງເດັ່ນໄຊ ສະທ້ອນເຖິງແວວແຫ່ງຄວາມຮັກອັນປ່ຽມລົ້ນຢ່າງແທ້ຈິງ (ຄືສຳຜັດໄດ້ວ່າໂຕລະຄອນເຮັດວຽກບ້ານມາດີຫລາຍ ບໍ່ມີສ່ວນໃຫ້ຈັບຜິດໄດ້ເລີຍ). ຜູ້ຊົມຫລາຍຄົນຫລົງຮັກເດັ່ນໄຊພ້ອມກັບນ້ຳຕາ ຍ້ອນຄວາມພະຍາຍາມເຮັດທຸກສິ່ງທຸກຢ່າງເພື່ອຄົນທີ່ແອບຮັກຕະຫລອດໄລຍະເວລາ 3 ປີ ທັງທີ່ຖືກດູຖູກ ຫຍຽບຫຍາມ ທົນເບິ່ງຜູ້ຊາຍທີ່ເຟີເຟັກກວ່າຮັກກັບຄົນທີ່ແອບຮັກ. ມີສາກຫນຶ່ງສຸດປະທັບໃຈທີ່ເດັ່ນໄຊເວົ້າວ່າ 'ມີຫລາຍຄົນທີ່ພະຍາຍາມປີນຍອດພູເອເວີເຣັສ ທັງທີ່ຮູ້ວ່າຕ້ອງຕົກມາຕາຍ....ເຈົ້າຄືຍອດພູເອເວີເຣັສຂອງຂ້ອຍ'. ເດັ່ນໄຊເປັນຕົວລະຄອນທີ່ຮ້ອງໄຫ້ຜ່ານແວວຕາໄດ້ຢ່າງຍອດຍ້ຽມ (ໄຫ້ແບບບໍ່ມີນ້ຳຕາ ແຕ່ຜູ້ຊົມນ້ຳຕາໄຫລເກືອບຫມົດໂຮງ). ປະການທີສອງ ແຟນເດ ສາມາດດຳເນີນເຫດການໄປໄດ້ຢ່າງບໍ່ຫນ້າເບື່ອທັງທີ່ມີຕົວລະຄອນຫລັກພຽງແຕ່ 2 ຕົວເທົ່ານັ້ນ ຄືດັ່ງທີ່ຮູ້ຮູບເງົາເລື່ອງນີ້ຍົກກອງຖ່າຍໄປໄກຮອດຢີ່ປຸ່ນ ຜູ້ສ້າງສາມາດນຳສະເຫນີແຫລ່ງທ່ອງທ່ຽວໃນແຕ່ລະສາກໄດ້ຢ່າງສວຍງາມ (ງາມກວ່າຄວາມຈິງເລີຍລະ)ຖືວ່າເປັນຈຸດຂາຍອີກຢ່າງຫນຶ່ງໃນຮູບເງົາ, ນຳເອົາຣະຄັງຄວາມເຊື່ອໃນທ້ອງຖິ່ນມາເປັນປົມໃນເລື່ອງ, ປຽບທຽບເທສະການປາສາດຫິມະທີ່ຖືກກໍ່ໃຫ້ສວຍງາມພຽງວັນດຽວກໍ່ທຳລາຍຖິ້ມສົມທຽບກັບຄວາມຮັກຂອງພະເອກ, ເກັບເລັກປະສົມຫນ້ອຍໃນວັດທະນະທຳຢີ່ປຸ່ນ ແລະວິຖີຂອງນັກທ່ອງທ່ຽວທີ່ເມືອງຫນາວ ແຕ່ຖືກຖ່າຍທອດຜ່ານຕົວລະຄອນທັງສອງຢ່າງອົບອຸ່ນ. ມຸມພາບທີ່ໃຊ້ໂດຍທົ່ວໆໄປກໍແສນຈະທຳມະດາຍັງເປັນສະຕາຍຄ້າຍຄືກັບຮູບເງົາກວນມຶນໂຮ ທີ່ຜູ້ກຳກັບສ້າງເມື່ອ 6 ປີກ່ອນ. ການເລົ່າເລື່ອງກໍງ່າຍດາຍເຂົ້າໃຈງ່າຍໆບໍ່ສັບຊ້ອນສັບສົນ ແຕ່ກໍຫນ້າຕິດຕາມ ແຕ່ຕົ້ນຈົນຈົບ. ໃນທັດສະນະຄະຕິສ່ວນຕົວ ມັນບໍ່ແມ່ນເລື່ອງງ່າຍພໍປານໃດທີີຈະໄດ້ເບິ່ງຮູບເງົາແບບໃສໆຊຶ້ງທີ່ປະປົນທັງຄວາມເສົ້າຂອງຄົນຫນຸ່ມສາວຕອນປາຍອາດເວົ້າໄດ້ວ່າມັນສ້າງຍາກກວ່າກວ່າຮູບເງົາຄອມມິດີ້ເລີຍລະ! ແຕ່ກໍຖືກຖ່າຍທອດໄດ້ໃນລະດັບດີ ເບິ່ງແລ້ວບໍ່ປວດຮາກຄືລະຄອນຫລັງຂ່າວ(ບາງເລື່ອງ) ພ້ອມດຽວກັນນັ້ນສິ່ງທີ່ຜູ້ຂຽນປະທັບໃຈຄືມັນໃຫ້ແງ່ຄິດໃນດ້ານຄວາມຮັກໃນຫລາຍມຸມມອງ ແລະສຽດສີເຫຍາະເຍີ້ຍສັງຄົມປັດຈຸບັນທີ່ຕີລາຄາຄົນຜ່ານເປືອກນອກໄດ້ຢ່າງກົງໄປກົງມາ. ໃນຕອນຈົບມີຜູ້ຊົມຫລາຍຄົນຈົ່ມກະປອດກະແປດບໍ່ພໍໃຈໃນຕອນຈົບເລີຍ (ບາງຄົນດ່າຜູ້ກຳກັບພຸ້ນຕົວະຫ່ະຫ່ະຫ່ະ) ແຕ່ໃນທັດສະນະຂອງຄົນເຮັດຮູບເງົາຄິດວ່າມັນລົງໂຕແລ້ວ ເພາະຈົບຕາມແບບຊີວິດຄວາມເປັນຈິງ ບໍ່ໄດ້ຈົບແບບອີງນິຍາຍ happy ending ອີ່ຫຍັງປະມານນັ້ນ ມັນຫມົດຍຸກແລ້ວລະ!. ທີ່ບັນລະຍາຍມາບັກຍາວໆປານນີ້ກໍບໍ່ໄດ້ເຫີ່ຮູບເງົາຕ່າງປະເທດ ຫລືໂຄສະນາຊວນເຊື່ອແຕ່ປະການໃດ ພຽງແຕ່ມາເລົ່າສູ່ງກັນຟັງ ໃນມຸມມອງຂອງຄົນເຮັດຮູບເງົາຜູ້ຫນຶ່ງ ທີ່ຮູ້ສຶກຊື່ນຊົມໃນຄົນຮຸ່ນໃຫມ່ທີ່ສາມາດສ້າງສັນຜົນງານທີ່ໃຫ້ຄວາມສຸກ, ໃຫ້ນ້ຳຕາ ແລະແງ່ຄິດແກ່ຜູ້ຊົມ ຜູ້ຂຽນເຊື່ອວ່າ filmmakers ຢູ່ບ້ານເຮົາຫລາຍໆທ່ານກໍມີຄວາມສາມາດເຊັ່ນດຽວກັນ ອາດຈະໄດ້ເຫັນຜົນງານທີ່ຫນ້າຕິດຕາມໃນອະນາຄົດ. ສຳລັບແຟນເດ! ຖ້າໃຜກຳລັງແອບຮັກ ຫລືມີຄວາມຮັກກໍຢ່າລືມແວ່ໄປໄຫ້ໄດ້ທີ່ໂຮງຮູບເງົາເດີ ອິອິອິ. ຂອບໃຈບົດຂຽນຈາກຜູ້ສ້າງຮູບເງົາທ່ານຫນຶ່ງ.