ເປັນທາງການແລ້ວ!! ຜີແດງປະກາດແຍກທາງກັບຟານກາວຮຽບຮ້ອຍ

 

ແມນເຊສເຕີ ຢູໄນເຕັດ ອອກມາລະບຸແລ້ວວ່າພວກເຂົາແຍກທາງກັບ ຫຼຸຍ ຟານກາວ ເປັນທີ່ຮຽບຮ້ອຍ ສ່ວນເລື່ອງຕົວແທນຈະມີການປະກາດໃນພາຍຫຼັງ ໂດຍ ເອັດ ວູດເວິດ ຜູ້ບໍລິຫານລະດັບສູງຂອງທີມກ່າວຂອບໃຈ ຟານກາວ ທີ່ເຮັດວຽກເປັນຢ່າງດີໃຫ້ທີມມາຕະຫຼອດ.

 

ແມນເຊສເຕີ ຢູໄນເຕັດ ສະໂມສອນດັງຈາກ ພຣີເມຍລີກ ປະກາດຢືນຢັນເປັນທາງການວ່າໄດ້ແຍກທາງກັບ ຫຼຸຍ ຟານກາວ ແລ້ວເມື່ອວັນຈັນທີ່ຜ່ານມາ.

 

ຟານກາວ ຕົກເປັນຂ່າວເລື່ອງທີ່ຈະຕ້ອງຕົກງານມາໄດ້ໄລຍະໜຶ່ງແລ້ວ ຫຼັງຈາກທີ່ພາທີມເຮັດຜົນງານໄດ້ບໍ່ດີເທົ່າທີ່ຄວນ ແລະ ຫຼັງຈົບເກມ ເອຟເອ ຄັບ ຮອບຊິງຊະນະເລີດທີ່ “ຜີສາດແດງ” ເອົາຊະນະ ຄຣິສຕັນ ພາເຫຼດ 2-1 ໃນຊ່ວງຕໍ່ເວລາພິເສດເມື່ອວັນເສົາທີ່ຜ່ານມາແລ້ວນັ້ນ ມັນກໍມີລາຍງານຢ່າງໜາຫູວ່າ ແມນຢູ ຕັດສິນໃຈທີ່ຈະດຶງ ໂຊເຊ ມູຣິນໂຢ ມາຄຸມທີມແທນເຂົາແລ້ວ.

 

ເປັນບ່ອນເຊື່ອວ່າຂ່າວດັ່ງກ່າວຫຼຸດມາຈາກຝັ່ງທີມງານຂອງ ມູຣິນໂຢ ບໍ່ແມ່ນຈາກ ແມນຢູ ໂດຍຕັ້ງແຕ່ນັ້ນເປັນຕົ້ນມາທີມດັງຈາກ ໂອນ ທຣາຟເຟິດ ກໍມິດມາຕະຫຼອດ ຈົນຫຼ້າສຸດພວກເຂົາໄດ້ຢືນຢັນວ່າມັນເປັນໄປຕາມຂ່າວທີ່ອອກມາແທ້.

 

ທັງນີ້ ເອັດ ວູດເວິດ ປະທານບໍລິຫານຂອງ ແມນຢູ ກ່າວຂອບໃຈ ຫຼຸຍ ຟານກາວ ທີ່ເຮັດຜົນງານໃຫ້ທີມເປັນຢ່າງດີເຊັ່ນການສ້າງດາວລຸ້ງຢ່າງເຕັມທີ່ ພ້ອມກັບອວຍພອນໃຫ້ເຂົາປະສົບຄວາມສຳເລັດໃນອະນາຄົດ.

 

“ຂ້ອຍຢາກຂອບໃຈ ຫຼຸຍ ຟານກາວ ແລະ ທີມງານຂອງເຂົາສຳລັບການເຮັດວຽກທີ່ດີໃນຊ່ວງ 2 ປີຫຼັງສຸດຈົນເຖິງຂັ້ນພາທີມໄດ້ແຊມ ເອຟເອ ຄັບ ເປັນສະຖິຕິລວມທີ່ຈຳນວນ 12 ສະໄໝ (ແລະ ຍັງເຮັດໃຫ້ເຂົາໄດ້ແຊມກັບການຄຸມທີມໃນ 4 ປະເທດພ້ອມ) ເຂົາສະແດງຄວາມເປັນມືອາຊີບ ແລະ ຄວາມສະຫງ່າຜ່າເຜີຍຕະຫຼອດໄລຍະທີ່ຢູ່ກັບທີມ ເຂົາຈາກເຮົາໄປພ້ອມກັບມໍລະດົກຊັ້ນດີນັ້ນຄືການເຮັດໃຫ້ນັກເຕະດາວລຸ້ງຫຼາຍຄົນມີຄວາມໝັ້ນໃຈທີ່ຈະສະແດງຄວາມສາມາດຂອງພວກເຂົາອອກມາໃນລະດັບທີ່ສູງທີ່ສຸດ ທຸກຄົນທີ່ສະໂມສອນອວຍພອນໃຫ້ເຂົາປະສົບຄວາມສຳເລັດໃນອະນາຄົດ” ວູດເວິດ ລະບຸ.

 

ນອກຈາກນີ້ແຊມລີກສູງສຸດເມືອງຜູ້ດີ 20 ສະໄໝຍັງເສີມອີກວ່າຈະມີການປະກາດຄົນທີ່ເຂົ້າມາຄຸມທີ່ຕໍ່ຈາກ ຟານກາວ ໃນໄວໆນີ້.