ເປັນທາງການ!! ຮຸມເມວເຊັນສັນຍາບາເຢິນ 5 ປີ

 

ມັສ ຮຸມເມວ ກອງຫຼັງເລືອດເບຍກັບມາເປັນສະມາຊິກຂອງ ບາເຢິນ ມິວນິກ ຢ່າງເປັນທາງການແລ້ວຫຼັງຈາກທີ່ເຊັນສັນຍາກັນ 5 ປີ ເຜີຍພ້ອມແລ້ວກັບສິ່ງທ້າທ້າຍເທື່ອໃໝ່ ດ້ານ ຄາ-ຮາຍ ຣຸມເມນິກເກ ຊີອີໂອຂອງ “ເສືອໃຕ້” ດີໃຈທີ່ໄດ້ນັກເຕະລະດັບໂລກມາເສີມທັບ.

 

ມັສ ຮຸມເມວ ເຊັນເຕີແບັກທີມຊາດເຢຍລະມັນເກັບເຄື່ອງຍ້າຍອອກຈາກ ໂບຣຸສເຊຍ ດອດມູນ ກັບມາຮ່ວມທີມ ບາເຢິນ ມິວນິກ ຢ່າງເປັນທາງການແລ້ວເມື່ອວັນຈັນທີ່ຜ່ານມາ ຫຼັງຈາກທີ່ຜ່ານການກວດຮ່າງກາຍຮຽບຮ້ອຍ ພ້ອມກັບຈົດປາກກາລົງສັນຍາຮ່ວມທັບ “ເສືອໃຕ້” ເປັນເວລາ 5 ປີ.

 

ທັງສອງສະໂມສອນຕົກລົງເລື່ອງການຊື້ຂາຍກັນມາໄດ້ຕັ້ງແຕ່ສອງອາທິດກ່ອນ ກ່ອນທີ່ຈະມີການເຊັນສັນຍາຢ່າງເປັນທາງການໃນມື້ນີ້ໂດຍ ຮຸມເມວ ຖືເປັນນັກເຕະ “ເສືອເຫຼືອງ” ຄົນທີສາມທີ່ຍ້າຍມາຮ່ວມທັບກັບ “ເສືອໃຕ້” ນັບຕັ້ງແຕ່ປີ 2013 ຕໍ່ຈາກ ມາຣິໂອ ເກິດເຊ ແລະ ໂຣເບີດ ເລວານດອບສະກີ.

 

“ການກ່າວອຳລາ ດອດມູນ ມັນເປັນເລື່ອງທີ່ບໍ່ງາຍ ເຊິ່ງມັນກໍຄືກັບຕອນທີ່ຂ້ອຍອອກຈາກທີ່ນີ້ເມື່ອປີ 2008” ກອງຫຼັງເລືອດເບຍເປີດໃຈ “ຕອນນີ້ຂ້ອຍຍພ້ອມທີ່ຈະພົບກັບທຸກຢ່າງທີ່ຖ້າຢູ່ທີ່ ບາເຢິນ ມິວນິກ ຂ້ອຍຮູ້ສຶກສະບາຍໃຈຫຼາຍໃນຕອນນີ້”.

 

ທາງດ້ານຂອງ ຄາ-ຮາຍ ຣຸມເມນິກເກ ປະທານບໍລິຫານຂອງ ບາເຢິນ ຮູ້ສຶກຍິນດີທີ່ທີມໄດ້ກອງຫຼັງລະດັບໂລກມາເສີມທັບ “ເຮົາໄດ້ເສີມຄວາມແຂງແກ່ນໃຫ້ທີມໂດຍກອງຫຼັງລະດັບໂລກ ແລະ ຖືເປັນນັກເຕະທີ່ບໍ່ເຄີຍຢ້ານຕໍ່ຄວາມຮັບຜິດຊອບອີກດ້ວຍ ແລະ ທີ່ດີໄປກວ່ານັ້ນຄືເຂົາມາຈາກທີມລະດັບເຍົາວະຊົນຂອງເຮົາເອງ”.

 

ທັງນີ້ ຮຸມເມວ ຢູ່ກັບ ບາເຢິນ ຕັ້ງແຕ່ປີ 1995 ຫຼື ຕອນທີ່ເຂົາອາຍຸໄດ້ພຽງ 6 ປີ ແລະ ເຂົາໄດ້ລົງຫຼິ້ນເກມລະດັບອາຊີບນັດທຳອິດໃນປີ 2007 ກ່ອນທີ່ຈະຍ້າຍໄປຮ່ວມທີມກັບ ດອດມູນ ຊ່ວງເດືອນມັງກອນປີ 2008.

 

 

ບົດຄວາມໃຫມ່ໆ