ເປັນທາງການ!!ມາກແຊຕັ້ງກາເຊຍຄຸມທັບ

 

ຣູດີ ກາເຊຍ ນາຍໃຫຍ່ຄົນດັງຂອງເມືອງນຳ້ຫອມໄດ້ງານໃໝ່ຮຽບຮ້ອຍແລ້ວຫຼັງຈາກທີ່ ໂອລິມປິກ ມາກແຊ ຕັ້ງໃຫ້ເຂົ້າມາເປັນຜູ້ຈັດການທີມຄົນໃໝ່ ຫຼັງຫາກໍຍົກເລີກສັນຍາຢ່າງເປັນທາງການກັບ ໂຣມາ ຕັ້ງແຕ່ຖືກໄລ່ອອກເມື່ອເດືອນມັງກອນທີ່ຜ່ານມາ.

 

ໂອລິມປິກ ມາກແຊ ສະໂມສອນຍັກໃຫຍ່ຂອງ ລີແອັງ ຝຣັ່ງປະກາດແຕ່ງຕັ້ງ ຣູດີ ກາເຊຍ ອະດີດຜູ້ຈັດການທີມຂອງ ໂຣມາ ທີມດັງຂອງອີຕາລີເຂົ້າມາເປັນກຸນຊືຄົນໃໝ່ເມື່ອວັນພະຫັດທີ່ຜ່ານມາ ໂດຍເຊັນສັນຍາຄຸມທັບເປັນເວລາ 3 ປີ.

 

ກຸນຊືຄົນຝຣັ່ງຖືກ ໂຣມາ ໄລ່ອອກຕັ້ງແຕ່ເດືອນມັງກອນ ແຕ່ວ່າຍັງມີສັນຍາກັບທີມ “ໝາປ່າແຫ່ງໂຣມ” ເຮັດໃຫ້ຕ້ອງມີການຍົກເລີກສັນຍາໂດຍການຍິນຍອມພ້ອມໃຈຂອງທັງສອງຝ່າຍເມື່ອວັນພະຫັດ ກ່ອນທີ່ຈະໄດ້ຄຸມບັງຫຽນ ມາກແຊ ແທນທີ່ ຟຣັອງ ປາດຊີ ທີ່ເປັນຜູ້ຈັດການທີມຊົ່ວຄາວມາຕັ້ງແຕ່ເດືອນເມສາທີ່ຜ່ານມາ.

 

ທັງນີ້ ກາເຊຍ ເຊິ່ງເຄີຍເປັນກຸນຊືໃຫ້ກັບ ແຊງ ເອຕຽນ ແລະ ລິວ ຈະເຮັດໜ້າທີ່ລົງຄຸມ ມາກແຊ ເກມທຳອິດໂດຍການພົບກັບ ເປເອັດເຊ ໃນວັນອາທິດທີ່ 23 ຕຸລານີ້.