ເບັນ ອາຟາ ຕັ້ງເປົ້າກັບມາຕິດທີມຊາດອີກຄັ້ງໃນ ບານຢູໂຣ 2016

ຮາເຕັມ ເບັນ ອາຟາ ປີກໂຕເກັ່ງຂອງ ນີສ ຕັ້ງເປົ້າໝາຍກັບໄປຕິດທີມຊາດຝຣັ່ງຊຸດບານ ຢູໂຣ 2016 ຫຼັງຈາກທີ່ໂຊຟອມດີໃຫ້ຕົ້ນສັງກັດໃນລະດູການນີ້ ຍອມຮັບອາດຈະເປັນງານໃຫຍ່ເຫດຜົນເພາະ “ກາໄກ່” ມີນັກເຕະດີໆຫຼາຍຄົນແຕ່ເຊື່ອວ່າຂຶ້ນຢູ່ກັບຕົນເອງທີ່ຈະຕ້ອງພິສູດຄວາມສາມາດຕໍ່ໄປ.

ຮາເຕັມ ເບັນ ອາຟາ ກອງກາງ ນິສ ສະໂມສອນຈາກລີກ ແອັງ ອອກມາເປີດເຜິຍວ່າ ຕົນເອງຕ້ອງການທີ່ຈະກັບໄປມີຊື່ຕິດທີມຊາດຝຣັ່ງອີກຄັ້ງ ເພື່ອໄປສູ້ເສິກບານຊິງແຊ້ມແຫ່ງຊາດ ເອີຣົບ “ຢູໂຣ 2016” ຮອບສຸດທ້າຍປີໜ້າອີກຄັ້ງ ຫຼັງຈາກທີ່ເຮັດຜົນງານໄດ້ຢ່າງດີເລີດໃຫ້ກັບຕົ້ນສັງກັດລະດູການນີ້.

ຫຼັງຈາກທີ່ເມື່ອລະດູການກ່ອນໜ້ານີ້ ກອງກາງອາຍຸ 28 ປີ ຄົນນີ້ທີ່ຮັບໃຊ້ບ້ານເກີດ 13 ນັດ ພົບກັບໄລຍະເວລາທີ່ຍາກລຳບາກເລື່ອງທີ່ຖືກສະຫະພັນບານເຕະ ນານາຊາດ “ຟີຟາ” ເບຣກຍ້າຍສົບເພາະເຄີຍຫຼິ້ນໃຫ້ກັບ 2 ສະໂມສອນ ຄື ນິວຄາສເຊິນ ແລະ ຮາວ ຊິຕີ້ ມາແລ້ວນັ້ນ ຕົນເອງກໍຖືກຍ້າຍມາ ນີສ ໃນລະດູການນີ້ ແລະ ໄດ້ລົງຫຼິ້ນຢ່າງຕໍ່ເນື່ອງຈົນໂຊຟອມເກັ່ງ ແລະ ເປັນດາວຍິງສູງສຸດຂອງລີກແດນນຳ້ຫອມຮ່ວມກັບ ເອດິສັນ ຄາວານີ ດາວຍິງ ປາຣີ ແຊັງ-ແຊັກແມັງ ທີ່ຈຳນວນ 6 ປະຕູ.

ຫຼັງຈາກຜົນງານທີ່ດີເລີດຂອງ ເບັນ ອາຟາ ທີ່ຫຼຸດຈາກທີມຊາດ ຝຣັ່ງ ນັບຕັ້ງແຕ່ປີ 2012 ເຮັດໃຫ້ເຊື່ອກັນວ່າເຂົາອາດຈະຖືກເອີ້ນໂຕກັບມາລົງໃຫ້ “ເລ ເບລີ” ແລະ ລ່າສຸດອະດີດດາວເຕະ ໂອລິມປິກ ມາກແຊ ຍອມຮັບວ່າ ຢາກກັບໄປຮັບໃຊ້ທີມຊາດອີກຄັ້ງ.

ເມື່ອຖືກຖາມເຖິງຄວາມຄາດຫວັງທີ່ກັບໄປຕິດທັບ “ກາໄກ່” ໃນເສິກບານ “ຢູໂຣ 2016” ຮອບສຸດທ້າຍ ເບັນ ອາຟາ ກ່າວກັບ “ເລກິບ” ສື່ດັງເມືອງນ້ຳຫອມວ່າ “ມັນຍັງຢູ່ຫ່າງໄກຢູ່ກໍແມ່ນແຕ່ເປັນຫຍັງມັນຈະເປັນໄປບໍ່ໄດ້ລະ? ທີມຊາດ ຝຣັ່ງ ມີນັກເຕະຫຼາຍຄົນທີ່ດີ ມັນມີກຸ່ມນັກເຕະແຂງແກ່ນຫຼາຍ ທີ່ຢູ່ຮ່ວມກັນມາດົນ ແລະ ນັ້ນແມ່ນເລື່ອງປົກກະຕິຢູ່ແລ້ວ ການກັບໄປຕິດທີມຊາດອາດຈະເປັນເລື່ອງທີ່ຍາກ ແຕ່ມັນຂຶ້ນຢູ່ກັບວ່າຂ້ອຍຈະສາມາດໂຊຟອມການຫຼິ້ນໄດ້ດີປານໃດໃນສະໜາມ ແລະ ສົມຄວນທີ່ຈະໄດ້ຮັບໂອກາດໄປ ຫຼື ບໍ່”.

.......................................................................................................................................