ເບັນ ອາຟາ ຂີ້ໂມ້ອອກສື່ມີ 18 ທີມສົນດຶງເສີມທັບ

 

ຮາເຕັມ ເບັນ ອາຟາ ມິດຟິວແຄມເສັ້ນຈາກ ນີດ ຂີ້ໂມ້ວ່າມີເຖິງ 18 ທີມທີ່ສະແດງຄວາມສົນໃຈແຕ່ຕອນນີ້ໄດ້ຄັດໃຫ້ເຫຼືອ 3 ທີມແລ້ວ ຫຼັງນັກເຕະຄືນຟອມເທບໃຫ້ຕົ້ນສັງກັດໃນ ລີກແອັງ ລະດູການນີ້.

 

ຮາເຕັມ ເບັນ ອາຟາ ປີກຟອມລະເບີດຂອງ ນີດ ສະໂມສອນດັງຈາກ ລີກແອັງ ອອກມາເປີດເຜີຍວ່າ ໃນເວລານີ້ມີເຖິງ 18 ສະໂມສອນທີ່ໃຫ້ຄວາມສົນໃຈຢາກດຶງເຂົາໄປຮ່ວມທີມແຕ່ຕົນເອງໄດ້ເລືອກໄວ້ແລ້ວ 3 ທີມ ແລະ ກຳລັງພິຈາລະນາຢູ່ວ່າຈະຍ້າຍໄປຢູ່ກັບທີມໃດໃນຊ່ວງພັກລະດູການນີ້.

 

ອະດີດດາວເຕະ ນິວຄາສເຊິນ ຢູໄນເຕັດ ກັບມາຟອມດີອີກຄັ້ງໃນເວລາ ລີແອັງ ໂດຍຍິງໄປ 17 ລູກຈົນຊ່ວຍໃຫ້ຕົ້ນສັງກັດຈົບອັນດັບ 4 ແລະ ໄດ້ໂຄຕາໄປຫຼິ້ນ ຢູຟາ ຢູໂຣປາລີກ ໃນລະດູການໜ້າ ທາງດ້ານ ມອງ-ປີແອ ຣີວີແຢ ປະທານສະໂມສອນ ນີດ ເຜີຍວ່າ ບາເຊໂລນາ ກຳລັງພິຈາລະນາຍື່ນຂໍ້ສະເໜີຊື້ນັກເຕະ ຂະນະທີ່ ໂອລິມປິກ ລີຢົງ ກັບ ເປເອັດເຊ ກໍຕົກເປັນຂ່າວຢ່າງໜັກກັບ ເບັນ ອາຟາ ເຊັ່ນກັນ.

 

ຫຼ້າສຸດ ເບັນ ອາຟາ ທີ່ເດີນທາງໄປຮ່ວມງານເທດສະການພາບພະຍົນນານາຊາດເມືອງຄານໃນອາທິດນີ້ກ່າວກັບ “ການັນ ປຸສ” ສະຖານີໂທລະພາບເມືອງນໍ້າຫອມວ່າ “ສຳລັບຂ້ອຍຕອນນີ້ມີ 18 ສະໂມສອນທີ່ໜ້າສົນໃຈຫຼາຍ ແຕ່ຂ້ອຍໄດ້ເລືອກເອົາໄວ້ແລ້ວ ແລະ ຕອນນີ້ຂ້ອຍມີເປົ້າໝາຍພຽງແຕ່ 3 ຈາກ 18 ສະໂມສອນ ມັນເປັນການຕັດສິນໃຈທີ່ສຳຄັນສຳລັບຂ້ອຍໃນປີນີ້ ຂ້ອຍຈະພິຈາລະນາເລື່ອງນີ້ ແລະ ຫາລືກັບບຸກຄົນທີ່ໃກ້ຊິດກັບຂ້ອຍ”.