ເບັນເຕເກຢັນຢູ່ຊ່ວຍຫົງ-ຖ້າບໍ່ຢູ່ໃນແຜນຈະໄປເອງ

 

ຄຣິສເຕຢອງ ເບັນເຕເກ ຫົວຫອກຂອງ ລີເວີພູ ຕ້ອງການຢູ່ຊ່ວຍຕົ້ນສັງກັດຕໍ່ໄປ ແຕ່ກໍບອກວ່າພ້ອມທີ່ຈະໄປເຊັ່ນກັນຖ້າບໍ່ເປັນທີ່ຕ້ອງການຂອງ ເຈີເກັນ ຄັອບ.

 

ຄຣິສເຕຢອງ ເບັນເຕເກ ກອງໜ້າຮ່າງໃຫຍ່ຂອງ ລີເວີພູ ສະໂມສອນດັງຂອງ ພຣີເມຍລີກ ຢືນຢັນວ່າຕົນເອງຕ້ອງການທີ່ຢູ່ຊ່ວຍທີມຕໍ່ໄປໃນລະດູການໜ້າເຖິງວ່າລະດູການທີ່ຜ່ານມາຕົນເອງເຮັດຜົນງານໄດ້ບໍ່ດີຈົນມີຂ່າວວ່າກຽມທີ່ຈະລາທີມກໍຕາມ.

 

ຫົວຫອກທີມຊາດເບວຢຽມຍ້າຍມາຈາກ ແອສຕັນ ວິນລາ ມາຮ່ວມທັບ “ຫົງແດງ” ດ້ວຍຄ່າໂຕມະຫາສານເຖິງ 32.5 ລ້ານປອນເມື່ອຊ່ວງພັກລະດູການປີກາຍແຕ່ວ່າເຮັດຜົນງານໄດ້ໜ້າຜິດຫວັງໃນລະດູການ 2015-2016 ເມື່ອຍິງໄດ້ແຕ່ 10 ລູກຈາການລົງຫຼິ້ນທັງໝົດ 42 ນັດລວມທຸກລາຍການ.

 

ຢ່າງໃດກໍຕາມຫຼ້າສຸດ ເບັນເຕເກ ປະກາດຊັດເຈນວ່າຕົນເອງຍັງຢາກຢູ່ຊ່ວຍ ລີເວີພູ ຕໍ່ແຕ່ວ່າກໍພ້ອມທີ່ຈະຍ້າຍເຊັ່ນກັນຖ້າວ່າບໍ່ຢູ່ໃນແຜນການເຮັດທີມຂອງ ເຈີເກັນ ຄັອບ.

 

“ຕອນນີ້ຂ້ອຍອາຍຸ 25 ປີບໍ່ນ້ອຍ ແລະ ບໍ່ແກ່ ແຕ່ວ່າການໄດ້ລົງຫຼິ້ນຖືວ່າເປັນສີ່ງສຳຄັນ ຂ້ອຍຍັງມີສັນຍາຢູ່ກັບ ລີເວີພູ ແລະ ຂ້ອຍກໍຢາກຢູ່ບ່ອນນີ້ຕໍ່ໄປ ຖ້າວ່າຂ້ອຍຍັງຢູ່ໃນແຜນການເຮັດທີມຂອງຜູ້ຈັດການ ຖ້າມັນບໍ່ເປັນແບບນັ້ນມັນກໍເປັນເລື່ອງຍາກທີ່ສຸດທີ່ຈະຢູ່ຕໍ່ໄປ ຂ້ອຍຈະຄິດເລື່ອງນີ້ຫຼັງຈາກຈົບເສິກ ຢູໂຣ ຂ້ອຍກຽມຕົວຖ້າໄວ້ແລ້ວກັບສິ່ງທີ່ພົບມາເມື່ອລະດູການກ່ອນ ຂ້ອຍຮູ້ດີວ່າຂ້ອຍຈະຕ້ອງຖືກວິຈານແນ່ນອນຖ້າວ່າເຮັດຜົນງານໄດ້ບໍ່ດີ ເຊິ່ງແບບນັ້ນແຫຼະທີ່ມັນເປັນສິ່ງທີ່ຈະເກີດຂຶ້ນ” ເບັນເຕເກ ກ່າວ.