ເບັນເຊມາ ນອນຄຸກ 1 ຄືນ ເພາະຕົກເປັນຜູ້ຖືກສົງໄສຄະດີ ເຊັກເທັບ

ຄາຣິມ ເບັນເຊມາ ຫົວຫອກ ເຣອັນ ມາດຣິດ ຕົກເປັນຂ່າວວ່າຕ້ອງຢູ່ໃນຄຸກ 1​ ຄືນຫຼັງຈາກທີ່ຖືກຕໍາຫຼວດສອບສວນຢ່າງໜັກກ່ຽວກັບກໍລະນີທີ່ກ່ຽວພັນກັບກຸ່ມຄົນຮ້າຍທີ່ຢູ່ເບື້ອງຫຼັງການພະຍາຍາມໃຊ້ຄລິບວິດີໂດ ເຊັກເທັບ ຂູ່ແບັກເມ ມາຕິເຢີ ວາບູເອນາ ເພື່ອນນັກເຕະຮ່ວມຊາດ.

ຄາຣິມ ເບັນເຊມາ ກອງໜ້າຈອມຖະລົ່ມປະຕູຈາກ ເຣອັນ ມາດຣິດ ຍັກໃຫຍ່ຂອງ ລາ ລີກາ ສະເປນ ຕົກເປັນຂ່າວຕ້ອງຢູ່ໃນຄຸກ 1 ຄືນ ຫຼັງຈາກທີ່ຖືກເຈົ້າໜ້າທີ່ສືບສວນສອບສວນກໍລະນິທີ່ຖືກກ່າວຫາວ່າວາງແຜນໃຊ້ ເຊັກເທັບ ຂູ່ ມາຕິເຢີ ວາບູເອນາ ນັກເຕະກອງກາງຈາກ ໂອລິມປິກ ລີຢົງ ທີມຈາກແດນນ້ຳຫອມ ລີກແອັງ ຝຣັ່ງ.

ເມື່ອວັນພຸດທີ 4 ພະຈິກທີ່ຜ່ານມາ ເບັນເຊມາ ຖືກເຈົ້າໜ້າທີ່ຕຳຫຼວດໃນເມືອງແວຊາຍ ປະເທດຝຣັ່ງ ສອບປາກຄຳ ຈາກປະເດັນທີ່ມີຄວາມສະນິດສະໜົມກັບກຸ່ມຄົນຮ້າຍເຊິ່ງເຊື່ອກັນວ່າຢູ່ເບື້ອງຫຼັງຂອງການພະຍາຍາມແບັກເມ ວາບູເອນາ ແລະ ມັນເຮັດໃຫ້ມີການລືກັນວ່າ ດາວເຕະອາຍຸ 27 ປີ ມີສ່ວນຮູ້ເຫັນກັບເລື່ອງໃນຄັ້ງນີ້.

ລາຍງານລະບຸວ່າ ເບັນເຊມາ ເດີນທາງໄປທີ່ສານຕຳຫຼວດຕອນເກືອບ 9 ໂມງເຊົ້າ (ຕາມເວລາທ້ອງຖິ່ນ) ກ່ອນທີ່ຖືກຄວບຄຸມໂຕ ໂດຍປະເດັນກ່ຽວກັບການພິຈາລະນາຄະດີເຊິ່ງເລີ່ມຕົ້ນຂຶ້ນເມື່ອເດືອນ ກໍລະກົດ ຈາກກໍລະນີທີ່ຕົກເປັນເປົ້າໝາຍຂອງການນາບຂູ່.

ຢ່າງໃດກໍຕາມ ຊິວແວັງ ກໍມິເຢ ທະນາຍຄວາມຂອງຫົວຫອກທີມຊາດ ຝຣັ່ງ ຢືນຢັນວ່າ ລູກຄວາມຂອງຕົນບໍ່ໄດ້ມີສ່ວນກ່ຽວຂ້ອງກັບປະເດັນທີ່ມການກ່າວຫາແຕ່ຢ່າງໃດ.

.............................................................................................................................................................................