ເບັກເກີຊື້ໂນເລບໍ່ຊ້ອມໜັກຟອມເລີຍຕົກ

 

ບໍຣິສ ເບັກເກີ ອະດີດນັກເທັນນິດຄົນດັງລະບຸໃນຊ່ວງ 6 ເດືອນຫຼັງສຸດ ໂນວັກ ໂຢໂຄວິກ ແຣັກເກັດຊື່ດັງບໍ່ໄດ້ຊ້ອມໜັກພໍປານໃດພ້ອມກັບຊີ້ວ່າຖ້າວ່າ ໂນເລ ກັບໄປປະສົບຄວາມສຳເລັດອີກຄັ້ງກໍຕ້ອງກັບໄປຊ້ອມແບບເຕັມທີ່ຄືກັບທີ່ຜ່ານມາ.

 

ບໍຣິສ ເບັກເກີ ຕຳນານນັກເທັນນິດເຢຍລະມັນກ່າວວ່າ ໂນວັກ ໂຢໂຄວິກ ນັກເທັນນິດເລືອດເຊີເບຍບໍ່ຝຶກຊ້ອມຫຼາຍພໍໃນຊ່ວງ 6 ເດືອນສຸດທ້າຍຂອງລະດູການຫຼ້າສຸດ ຈົນເຮັດໃຫ້ເຂົາຕ້ອງເສຍຕຳແໜ່ງມື 1 ຂອງໂລກ.

 

ເບັກເກີ ເຄີຍເຮັດວຽກເປັນຜູ້ຝຶກສອນໃຫ້ ໂຢໂຄວິກ ດົນ 3 ປີເຊິ່ງໃນຊ່ວງດັ່ງກ່າວເຂົາໄດ້ແຊມລະດັບແກຣນສະແລມເຖິງ 6 ລາຍການກ່ອນທີ່ສຸດທ້າຍທັງສອງຈະແຍກທາງກັນ.

 

ທັງນີ້ປີ 2016 ຖືເປັນປີທີ່ໜ້າຜິດຫວັງຂອງ ໂຢໂຄວິກ ເພາະນອກຈາກຈະເສຍຕຳແໜ່ງມື 1 ຂອງໂລກໃຫ້ກັບ ແອນດີ ມາຣີ ແລ້ວນັ້ນເຂົາຍັງຕົກຮອບ 3 ຂອງລາຍການ ວິມເບີດັນ, ເສຍໃນນັດຊິງຊະນະເລີດຂອງລາຍການ ຢູເອສ ໂອເພັນ ແລະ ຕົກຮອບທຳອິດຂອງ ໂອລິມປິກ ເກມ 2016 ອີກຈົນເຮັດໃຫ້ຫຼາຍຄົນສົງໄສວ່າມັນເກີດຫຍັງຂຶ້ນກັບເຂົາ.

 

ເບັກເກີ ໃຫ້ສຳພາດກັບ ສະກາຍສະປອດ ນິວ ສື່ກິລາຊື່ດັງວ່າ “ຊ່ວງ 6 ເດືອນຫຼັງສຸດເຂົາບໍ່ໄດ້ຊ້ອມໜັກຄືທີ່ເຄີຍເຮັດ ແລະ ເຂົາເອງກໍຮູ້ເລື່ອງນັ້ນດີ ຄວາມສຳເລັດມັນບໍ່ມີທາງໄດ້ມາງ່າຍໆ ເຈົ້າບໍ່ມີທາງທີ່ຈະໄປແຂ່ງຢ່າງດຽວແລ້ວປະສົບຄວາມສຳເລັດ ເຈົ້າຕ້ອງຊ້ອມຢ່າງໜັກເພາະຄູ່ແຂ່ງເອງກໍເຮັດແບບນັ້ນຄືກັນ”.

 

“ຂ້ອຍຮູ້ວ່າການເສຍ ສະແຕນ (ສະຕານິສລາສ ວາວຣິນກາ) ໃນຮອບຊິງຊະນະເລີດຂອງລາຍການ ຢູເອສ ໂອເພັນ ມັນເຈັບປວດ ທີ່ຈິງຂ້ອຍຄິດວ່າການເສຍແນ່ຈັກໜ່ອຍຈະສົ່ງຜົນດີກັບເຂົາ ເພື່ອທີ່ຈະໄດ້ຮູ້ວ່າການປລາໄຊມັນເປັນຈັ່ງໃດ ເພາະເຂົາບໍ່ໄດ້ເສຍໃຜມາພໍເທົ່າໃດຕັ້ງ 2 ປີເຄິ່ງ ຂ້ອຍໝັ້ນໃຈວ່າການເສຍຕຳແໜ່ງມື 1 ຂອງໂລກໃຫ້ກັບ ແອນດີ ມາຣີ ມັນເຈັບແບບສຸດໆແຕ່ເຂົາກໍຕ້ອງກັບໄປຊ້ອມຢ່າງໜັກ ເຂົາຕ້ອງກັບໄປທີ່ສຳນັກງານແລ້ວຊ້ອມຫຼາຍຊົ່ວໂມງ ລວມເຖິງກັບໄປໃຫ້ຄວາມສຳຄັນກັບສິ່ງທີ່ເຮັດໃຫ້ເຂົາແຂງແກ່ນ” ອະດີດນັກຫວດອາຍຸ 49 ປີກ່າວ.