ເບຣເມນສັ່ງເຕະສະຄຣິບນິກອອກຈາກຕັ່ງນາຍໃຫຍ່ແລ້ວ

 

ວິກເຕີ ສະຄຣິບນິກ ກຸນຊືຊາວຢູເຄນຖືກ ແວເດີ ເບຣເມນ ປົດອອກຈາກຕຳແໜ່ງແລ້ວຫຼັງຈາກທີ່ນຳ “ນົກນາງນວນ” ບຸກໄປເສຍໃຫ້ກັບ ໂບຣຸສເຊຍ ມິວເຊັນກັດບັກ ເມື່ອວັນເສົາທີ່ຜ່ານມາສົ່ງຜົນໃຫ້ທີມແພ້ 3 ເກມຕິດຕັ້ງແຕ່ອອກເລີ່ມລະດູການ ພ້ອມທັງດັນນາຍໃຫຍ່ຊຸດ ຢູ-23 ຂຶ້ນມາຄຸມທັບແທນຊົ່ວຄາວ.

 

ແວເດີ ເບຣເມນ ສະໂມສອນດັງໃນ ບຸນເດສລີກາ ປະກາດປົດ ວິກເຕີ ສະຄຣິບນິກ ອອກຈາກຕຳແໜ່ງຜູ້ຈັດການທີມເປັນທີ່ຮຽບຮ້ອຍແລ້ວເມື່ອວັນອາທິດທີ່ຜ່ານມາຫຼັງຈາກນຳທີມເສຍ 3 ເກມຕິດໃນລີກລະດູການນີ້ຈົນຕົກໄປຢູ່ອັນດັບສຸດທ້າຍຂອງຕາຕາລາງຄະແນນ.

 

ຫຼັງຈາກ “ນົກນາງນວນ” ບຸກເສຍ ໂບຣຸສເຊຍ ມິວເຊັນກັດບັກ ແບບເລະເທະເຖິງ 1-4 ເມື່ອວັນເສົາທີ່ຜ່ານມາເຮັດໃຫ້ຍັງເກັບຄະແນນບໍ່ໄດ້ເລີຍໃນ ບຸນເດສລີກາ ລະດູການນີ້ ແລະ ຍັງຕົກຮອບທຳອິດຂອງ ເດເອຟເບ ໂພຄານ ໂດຍການເສຍໃຫ້ກັບ ສະປອດຟຸນເດ້ ລັອດເຕ້ ຈາກ ລີກ້າ 3 ເຮັດໃຫ້ສະໂມສອນປົດເຂົາທັນທີພ້ອມກັບດັນ ອະເລັກຊານເດີ ນູຣີ ໂຄດຂອງ ຢູ-23 ຂອງ ເບຣເມນ ຂຶ້ນມາຄຸມທັບເປັນການຊົ່ວຄາວ.

 

ເບຣເມນ ອອກຖະແຫຼງການວ່າ “ການກຽມຄວາມພ້ອມສຳລັບການຫຼິ້ນໃນບ້ານພົບກັບ ມາຍ 05 ແລະ ໄປຢາມ ເຟົາເອຟແອວ ໂວຟບວກ ອະເລັກຊານເດີ ນູຣິ ຈະເປັນຄົນເຂົ້າມາເຮັດໜ້າທີ່ໃນວັນຈັນນີ້.”