ເນມາ ຢືນຢັນ ເຮັດເຕັມທີ່ແລ້ວ ກັບສະຖານະການແຟນບານຕົນໂຫ່ໃສ່

ເນມາ ກອງໜ້າໂຕເກັ່ງຂອງ ບາເຊໂລນາ ຢືນຢັນວ່າເຮັດຕາມທີ່ຕົນເອງດີທີ່ສຸດແລ້ວ ຫຼັງຈາກທີ່ທີມຟອມອືດກວ່າຈະຊະນະຄູ່ແຂ່ງໄດ້ໃນເສິກ ຢູຟາ ແຊມປ້ຽນລີກ ເມື່ອວັນອັງຄານ ບອກວ່າມີຄວາມສຸກທີ່ ບາເຊໂລນາ ເກັບໄຊຊະນະ ເຖິງວ່າຈະຕ້ອງພົບກັບບັນຫາຫຼວງຫຼາຍ ແຕ່ຍອມຮັບວ່າສຸດແສນເສົ້າທີ່ຖືກແຟນບານຂອງຕົນເອງໂຫ່ໃສ່ໃນເກມນີ້.

ເນມາ ຫົວຫອກໂຕເກັ່ງຂອງ ບາເຊໂລນາ ສະໂມສອນຍັກໃຫຍ່ຈາກ ລາ ລີກາ ສະເປນ ອອກມາຢືນຢັນເມື່ອວັນທີ 30 ກັນຍາວ່າ ເຂົາໄດ້ເຮັດໜ້າທີ່ຂອງເຂົາແລ້ວໃນເກມ ຢູຟາ ແຊມປ້ຽນ ລີກ ຮອບແບ່ງກຸ່ມ ນັດທີ 2 ກຸ່ມ ອີ ທີ່ຕົ້ນສັງກັດເອົາຊະນະ “ຫ້າງຂາຍຢາ” ໄບເອີ ເລເວີກູເຊັນ ຄູ່ແຂ່ງຈາກເຢຍລະມັນໄປ 2-1 ທີ່ບ້ານຂອງຕົນເມື່ອວັນອັງຄານທີ່ຜ່ານມາ.

ລູກທີມຂອງ ຫຼຸຍ ເອັນຣິເກ້ ຖືກແຟນບານທີມຕົນເອງໂຫ່ໃສ່ ກ່ອນທີ່ພວກເຂົາຈະມາໄດ້ 2 ປະຕູໃນຊ່ວງທ້າຍເກມຈາກ ເຊກີ້ ໂຣເບຣໂຕ້ ແລະ ຫຼຸຍຊົົວເຣສ ເຮັດໃຫ້ທີມພິກກັບມາເກັບໄຊຊະນະ ແລະ 3 ຄະແນນ  ແລະ ດ້ວຍບັນຫາອາການບາດເຈັບຂອງ ເມສຊີ ໃນເວລານີ້ເຮັດໃຫ້ເບິ່ງວ່າ ບາເຊໂລນາ ມີບັນຫາໃນເກມບຸກ ແລະ ເນມາ ກໍເຮັດຜົນງານໄດ້ຕຳ່ກວ່າມາດຕະຖານຂອງຕົນເອງໃນລະດູການນີ້ ຢ່າງໃດກໍຕາມ ລ່າສຸດກອງໜ້າບຣາຊິວ ຢືນຢັນວ່າ ເຂົາມີຄວາມສຸກທີ່ຕົ້ນສັງກັດໄດ້ຮັບໄຊຊະນະ.

“ຂ້ອຍມີຄວາມສຸກຫຼາຍ ກັບໄຊຊະນະຄັ້ງນີ້ ເຮົາຕ້ອງພົບກັບບັນຫາຫຼວງຫຼາຍກວ່າຈະເກັບໄຊຊະນະໄດ້ໃນເກມນີ້ ແຕ່ສິ່ງສຳຄັນຄືການຊະນະ ແລະ ເຮົາກໍເຮັດທຸກຢ່າງເພື່ອຍິງປະຕູ ແລະ ເຮົາຊະນະ” ເນມາ ກ່າວ.

ສຳລັບເລື່ອງຟອມການຫຼິ້ນ ເນມາ ຢືນຢັນວ່າ ເຂົາໄດ້ເຮັດໃນສິ່ງທີ່ທຸກຄົນຄາດຫວັງຈາກໂຕເຂົາແລ້ວ ໂດຍກ່າວວ່າ “ຂ້ອຍເຮັດໜ້າທີ່ຂອງຕົນເອງ ເຮົາຕ້ອງຮູ້ຈັກວິທີການຫຼິ້ນເມື່ອຂາດ ເມສຊີ ແລະ ເກັບໄຊຊະນະ ເຊິ່ງເຂົາຈະກັບມາໃນຊ່ວງເວລາທີ່ດີ”

ເນມາ ຍອມຮັບວ່າເປັນເລື່ອງທີ່ຍາກສຳລັບນັກເຕະເມື່ອຕ້ອງພົບກັບແຟນບານຂອງຕົນໂຫ່ໃສ່ລະຫວ່າງການແຂ່ງຂັນໂດຍກ່າວວ່າ “ແມ່ນ ມັນຍາກເວລາທີ່ແຟນບານບໍ່ຢູ່ຄຽງຂ້າງເຮົາ”.

.......................................................................................................................................