ເນມາ ຍິງສອງລູກຊ່ວຍທີມຂຶ້ນນຳຈ່າຝູງ

ບາເຊໂລນາ ໄດ້ ເນມາ ກອງໜ້າຄົນສຳຄັນຍິງສອງປະຕູຊ່ວຍໃຫ້ໄລ່ຖະລົ່ມ ບີຢາເຣອັນ ໄປແບບຂາດລອຍ 3-0 ເກັບສາມຄະແນນສຳຄັນພ້ອມກັບຂຶ້ນນຳໄປຈ່າຝູງກ່ອນຊົ່ວຄາວມີ 27 ຄະແນນ ຈາກ 11 ນັດ ໃນການແຂ່ງຂັນລາຍການ ລາ ລີກາ ສະເປນ ວັນອາທິດທີ 8 ພະຈິກ ທີ່ຜ່ານມາ.

ສະໜາມ : ເອສຕາດີໂອ ແຄັມ ນູ (ບາເຊໂລນາ)

 

“ອາຊູກລານາ” ບາເຊໂລນາ ເກັບໄດ້ແລ້ວ 24 ຄະແນນຈາກການລົງສະໜາມ 10 ນັດ ຕ້ອງຂາດ ຮາເວຍ ມາສເຄລາໂນ ກອງກາງທີມຊາດ ອາເຈັນຕິນາ ອາຍຸ 31 ປີ ທີ່ຕິດໂທດແບນນັດສຸດທ້າຍຈາກທັງໝົດ 2 ນັດ.

ນອກຈາກນັ້ນຍັງຂາດ ດັກກລາສ ເປເຣຣາ ທີ່ເຈັບຕີນ, ລີໂອເນວ ເມສຊີ ນັກເຕະດາວດັງຂອງທີມທີ່ບາດເຈັບຫົວເຂົ່າ ແລະ ຣາຟິນຢາ ອັນກັນຕາຣາ ເຊິ່ງເຈັບເອັນຫົວເຂົ່າລວມໄປເຖິງ ອີວານ ລາຄິຕິດ ກອງກາງຂອງທີມທີ່ມີອາການບາດເຈັບມາຈາກເກມທີ່ຖະລົ່ມ ບາເຕ້ 3-0 ໃນລາຍການ ຢູຟາ ແຊມປຽນລີກ ຮອບແບ່ງກຸ່ມ.

ສາມປະສານແດນໜ້າສົ່ງ ມູນີ ເອວ ຮັດດາດີ້, ຫຼຸຍ ຊົວເຣດ ແລະ ເນມາ ລົງດວນກັບທີມຂູ່ແຂ່ງ ສ່ວນ “ເຍວໂລ ຊັບມາຣີນ” ບີຢາເຣອັນ ໃຫ້ ໂຣເບໂຕ້ ໂຊດາໂດ້ ຢືນເປັນກອງໜ້າໂຕເປົ້າ.

ເລີ່ມເກມມາເຄິ່ງເວລາທຳອິດໃນພຽງ 7 ນາທີ ເຈົ້າບ້ານມີລຸ້ນໄດ້ປະຕູກ່ອນຈາກຈັງຫວະຄວາມສາມາດສະເພາະໂຕຂອງ ຫຼຸຍ ຊົວເຣດ ທີ່ໄດ້ຈັງຫວະຍິງໄກໜ້າເຂດໂທດແຕ່ບານພົ້ນເສົາອອກໄປໜ້າເສຍດາຍ.

ເກມດຳເນີນມາເຖິງນາທີ 27 ບາເຊໂລນາ ມີລຸ້ນໄດ້ປະຕູອີກ ເມື່ອ ຊົວເຣດ ຈ່າຍບານໃຫ້ ມາຕິເຢີ ໄດ້ຈັງຫວະຍິງໄກແຕ່ບານໄປເຂົ້າມືຂອງ ອັນຟົງ ອາເຣໂອລາ ນາຍທະວານຂອງທີມຢາມ.

ກ່ອນໝົດເວລາພຽງແຕ່ສາມນາທີ ທີມຢາມເກືອບໄດ້ປະຕູຂຶ້ນນຳເມື່ອ ຊາມູເອວ ກາສຕີເຢໂຄ ໄດ້ບານຈັງຫວະໜຶ່ງສອງຈາກເພື່ອນຮ່ວມທີມແຕ່ພັດຍິງໄປເຂົ້າມື ເຄລາດິໂອ ບຣາໂວ ປະຕູເຈົ້າບ້ານແບບໜ້າຜິດຫວັງ ໝົດເວລາເຄິ່ງທຳອິດສະເໝີກັນ 0-0.

ເຂົ້າສູ່ເຄິ່ງເວລາທີສອງ “ເຈົ້າບຸນທຸ່ມ” ມາໄດ້ປະຕູຂຶ້ນນຳກ່ອນ 1-0 ໃນນາທີ 60 ຈາກຈັງຫວະທີ່ ເຊຄິໂອ ບຸສເກັດ ແທງບານທະລຸຊ່ອງໃຫ້ກັບ ເນມາ ຫຼຸດເຂົ້າໄປຍິງດ້ວຍຊ້າຍໃນເຂດໂທດເບື້ອງຊ້າຍ ບານຜ່ານມື ອັນຟົງ ອາເຣໂອລາ ເຂົ້າໄປ.

ມາຮອດນາທີ 70 ບາເຊໂລນາ ມາໄດ້ປະຕູທີສອງຈາກຈັງຫວະທີ່ ມູນີ ເອວ ຮັດດາດີ້ ຖືກ ຄວາເມສ ກອສຕ້າ ແບັກຊ້າຍຂອງທີມຢາມເຮັດໃໝໃນເຂດໂທດ ຜູ້ຕັດສິນເປົ່າເປັນຈຸດໂທດກ່ອນທີ່ ຫຼຸຍ ຊົວເຣດ ຈະຮັບໜ້າທີ່ສັງຫານດ້ວຍຂວາເຂົ້າປະຕູໄປ.

ທ້າຍເກມນາທີ 85 ເຈົ້າບ້ານມາໄດ້ປະຕູທີສາມຈາກຈັງຫວະທີ່ ຊົວເຣດ ພາບານມາເປີດບານຈາກດ້ານຊ້າຍເຂົ້າໄປເຂດໂທດໃຫ້ກັບ ເນມາ ຍົກບານຫຼີກກອງຫຼັງກ່ອນທີ່ຈະກັບໂຕຍິງ ວໍເລ ດ້ວຍຂວາແບບບໍ່ຕ້ອງຈັບ ບານເຂົ້າປະຕູໄປຢ່າງສວຍງາມໃຫ້ ບາເຊໂລນາ ນຳຫ່າງເປັນ 3-0 ແລະ ເປັນປະຕູທີ 11 ຂອງ ເນມາ ໃນລີກລະດູການນີ້.

ເວລາທີ່ເຫຼືອທັງສອງທີມເຮັດຫຍັງເພີ່ມອີກບໍ່ໄດ້ ຈົບເກມ ບາເຊໂລນາ ເປີດຮັງຖະລົ່ມ ບີຢາເຣອັນ 3-0 ເກັບສາມຄະແນນໄດ້ສຳເລັດ ພ້ອມກັບຂຶ້ນເປັນຈ່າຝູງກ່ອນຊົ່ວຄາວ ມີ 27 ຄະແນນ ຈາກ 11 ນັດ.

.............................................................................................................................................................................