ເທັດຫຼືແທ້!! ຜີເທ 150 ລ້ານປອນໃຫ້ມູສ້າງທີມໃໝ່ເຕັມສູບ

 

ເດິ ຊັນ ສື່ດັງຂອງເມືອງຜູ້ດີລາຍງານຕອນນີ້ ແມນຢູ ບ້າເລືອດມອບເງິນໃຫ້ກັບ ໂຊເຊ ມູຣິນໂຢ ວ່າທີ່ນາຍໃຫຍ່ຄົນໃໝ່ຂອງທີມຈຳນວນ 150 ລ້ານປອນເພື່ອຫວັງນຳໄປໃຊ້ເສີມທັບເຕັມສູບ ໂດຍຕອນນີ້ມີຂ່າວວ່າເຮຍມູເລັງນັກເຕະເອົາໄວ້ 7 ຄົນ ແລະ ຖ້າໄດ້ຮັບການແຕ່ງຕັ້ງຢ່າງເປັນທາງການກໍພ້ອມເດີນໜ້າລ່າໂຕມາຢູ່ໃນຮັງຂອງຜີແດງ.

 

ແມນເຊສເຕີ ຢູໄນເຕັດ ສະໂມສອນດັງຈາກ ພຣີເມຍລີກ ກຽມເທງົບປະມານຈຳນວນກວ່າ 150 ລ້ານປອນໃຫ້ກັບ ໂຊເຊ ມູຣິນໂຢ ວ່າທີ່ນາຍໃຫຍ່ຄົນໃໝ່ເພື່ອດຶງນັກເຕະສຳຄັນມາເສີມທັບ “ຜີສາດແດງ” ໃຫ້ກັບມາມີລຸ້ນແຊມອີກໃນລະດູການໜ້າ.

 

ຫຼັງຈາກທີ່ “ຜີແດງ” ຖະແຫຼງການປົດ ຟານກາວ ອອກຈາກຕໍາແໜ່ງຮຽບຮ້ອຍຕອນນີ້ທຸກກະແສຕາງໝັ້ນໃຈວ່ານາຍໃຫຍ່ຄົນຕໍ່ໄປຕ້ອງບໍ່ພົ້ນ ໂຊເຊ ມູຣິນໂຢ ແນ່ນອນ ແລະ ຕອນນີ້ເລີ່ມມີກະແສຂ່າວກ່ຽວກັບກັບການເສີມທັບເພື່ອຫວັງນຳ ແມນຢູ ກັບມາປະສົບຜົນສຳເລັດອີກເທື່ອໜຶ່ງ.

 

ສຳລັບ 7 ນັກເຕະທີ່ຄາດວ່າເປັນເປົ້າໝາຍໃນການເສີມທັບຂອງ “ຈານມູ” ເລີ່ມທີ່ ຈອນ ສະໂຕນ ກອງຫຼັງຈາກ ເອເວີຕັນ ເຊິ່ງເປັນເປົ້າໝາຍທຳອິດຂອງ ໂຊເຊ ໃນການດຶງມາເສີມສ້າງຄວາມແຂງແກ່ນໃຫ້ກັບແນວຮັບຂອງທີມ ເຊິ່ງໂດຍສ່ວນຕົວແລ້ວເຂົາມັກ ສະໂຕນ ຫຼາຍເພາະວ່າຍື່ນຂໍ້ສະເໜີເຖິງ 3 ຮອບສູງກວ່າ 50 ລ້ານປອນຕອນທີ່ຄຸມຢູ່ ເຊວຊີ ແຕ່ຖືກປະຕິເສດ ແລະ ອີກຄົນໜຶ່ງແມ່ນ ອາເຊເກວ ກາລາຍ ເຊັນເຕີແບັກຂອງ ເຊນິດ ເຊັນປີເຕສະເບີກ.

 

ນອກຈາກນີ້ຍັງຕ້ອງການກອງໜ້າມາເພີ່ມເພື່ອຊ່ວຍກອງໜ້າທີ່ມີຢູ່ຄື ຊະລາຕັນ ອິບາຮິໂມວິດ ກອງໜ້າຈາກ ເປເອັດເຊ ທີ່ຄິດວ່າຕ້ອງໄດ້ມາຢູ່ກັບທີມແນ່ນອນ ແລະ ຍັງມີ ອັນບາໂລ ໂມຣາຕາ ກອງໜ້າຈາກ ຢູເວັນຕຸດ, ກອນຊາໂລ ຮິກວາອິນ ດາວຍິງຈາກ ນາໂປລີ, ເຣນາໂຕ ຊານເຊດ ຫ້ອງເຄື່ອງຈາກ ເບັນຟິກາ ແຕ່ວ່າ ເສືອໃຕ້ເອົາໄປແລ້ວຮຽບຮ້ອຍຈຶ່ງເຮັດໃຫ້ ມູຣິນໂຢ ຫັນໄປເບິ່ງ ອັນເດຣ ໂກເມດ ຈາກ ບາເລນເຊຍ ແທນກັບ ຊູອາ ມາຣິໂອ ຈາກ ສະປອດຕິງ ລິສບອນ.