ເທບສຸດ!! ຄູຕີກວາດລຽບ 4 ລາງວັນໃຫຍ່ຂອງຫົງ

 

ຟິລິບເປ ຄູຕິນໂຢ ຈອມທັບຈາກ ລີເວີພູ ຍິ່ງໃຫຍ່ແບບເທບຫຼັງຈາກທີ່ໄດ້ 4 ລາງວັນສຳຄັນໃນງານປະກາດລາງວັນນັກເຕະດີເດັ່ນລະດູການນີ້ ທາງດ້ານ ເອັມເຣ ຊານ ຫ້ອງເຄື່ອງໂຕເກັ່ງໄດ້ລາງວັນນັກເຕະດາວລຸ້ງດີເດັ່ນ.

 

ຟິລິບເປ ຄູຕິນໂຢ ເພເມກເກີທີມຊາດບາຊິວຂອງ ລີເວີພູ ສະໂມສອນດັງຈາກ ພຣີເມຍລີກ ໄດ້ຮັບລາງວັນ 4 ລາງວັນໃນງານປະກາດຜົນລາງວັນນັກເຕະດີເດັ່ນປະຈຳລະດູການ 2015-2016 ຂອງ “ຫົງແດງ” ເມື່ອວັນພະຫັດທີ່ຜ່ານມາ.

 

ດາວເຕະເລືອດແຊມບາໂຊຟອມໄດ້ຢ່າງໂດດເດັ່ນໃນລະດູການນີ້ສົ່ງຜົນໃຫ້ເຂົາໄດ້ຮັບເລືອກເປັນນັກເຕະດີເດັ່ນປະຈຳລະດູການຈາກການໂຫວດຂອງແຟນບານ ຕາມດ້ວຍນັກເຕະດີເດັ່ນຈາກການໂຫວດຂອງເພື່ອນຮ່ວມທີມ ລວມທັງລາງວັນປະຕູດີເດັ່ນປະຈຳລະດູການ ເຊິ່ງເປັນປະຕູທີ່ລາກບານເຂົ້າໄປຍົກຂ້າມຫົວ ດາວິດ ເດ ເຄອາ ໃນເກມທີ່ “ຫົງແດງ” ສະເໝີ ແມນເຊສເຕີ ຢູໄນເຕັດ 1-1 ໃນ ຢູຟາ ຢູໂຣປາ ລີກ ຮອບ 16 ທີມສຸດທ້າຍນັດສອງ.

 

ຍັງບໍ່ພໍເທົ່ານັ້ນອະດີດດາວເຕະ “ງູໃຫຍ່” ອິນເຕີ ມິລານ ຍັງໄດ້ຮັບລາງວັນນັກເຕະຟອມດີປະຈຳລະດູການໃນເກມທີ່ເຂົາລະເບີດຟອມເທບທຸບ “ເຮືອໃບສີຟ້າ” ແມນເຊສເຕີ ຊີຕີ 4-1 ໃນຖິ່ນ ເອຕິຮັດ ສະເຕດຽມ ໂດຍ ຄູຕິນໂຢ ເປີດໃຈກັບລູກທີ່ຍິງ ແມນເຊສເຕີ ຊີຕີ ວ່າ “ມັນເປັນໜຶ່ງໃນເລື່ອງທີ່ດີທີ່ສຸດສຳລັບຂ້ອຍ ແຕ່ສິ່ງສຳຄັນທີ່ສຸດຄືເຮົາຊະນະພວກເຂົາ”.

 

ນອກຈາກນີ້ ຄູຕິນໂຢ ຍັງໄດ້ກ່າວເຖິງການຮັບສຽງໂຫວດຈາກເພື່ອນຮ່ວມທີມເປັນສິ່ງທີ່ມີຄວາມໝາຍສຳລັບຕົນເອງຫຼາຍ “ສິ່ງນີ້ມີຄວາມໝາຍຫຼາຍສຳລັບຂ້ອຍ ເພາະມັນເປັນການໄດ້ຮັບສຽງໂຫວດຈາກເພື່ອນຮ່ວມທີມຂອງຂ້ອຍ ນີ້ແມ່ນລະດູການທີ່ດີສຳລັບທຸກຄົນ ຕອນນີ້ໃນອາທິດໜ້າເຮົາມີເກມນັດຊິງທີ່ສຳຄັນຫຼາຍໆເຮົາຕ້ອງເປັນໜຶ່ງດຽວກັນ ແລະ ສະແດງໃຫ້ເຫັນວ່າເຮົາເທບປານໃດ”.

 

ຂະນະດຽວກັນ ເອັມເຣ ຊານ ໄດ້ຮັບລາງວັນນັກເຕະດາວລຸ້ງດີເດັ່ນປະຈຳລະດູການ ທາງດ້ານ ແບັກ ສະມິດ ແບັກຊ້າຍອົດສະຕາລີໄດ້ຮັບລາງວັນນັກເຕະດີເດັ່ນຂອງອະຄາເດມີ.