ເຕືອນ​ໄວ້​ເລີຍ​! ກິນ​ປຸ໊ບ​ ນອນ​ປັ໊ບ​ ສ່ຽງ​ພະຍາດ​ກົດ​ໄຫຼຍ້ອນ​ ປ່ອຍ​ໄວ້​ດົນ​ ສ່ຽງ​ມະ​ເຮັງ​ຫຼອດ​ອາຫານ​

ເຕືອນ​ໄວ້​ເລີຍ​! ກິນ​ປຸ໊ບ​ ນອນ​ປັ໊ບ​ ສ່ຽງ​ພະຍາດ​ກົດ​ໄຫຼຍ້ອນ​ ປ່ອຍ​ໄວ້​ດົນ​ ສ່ຽງ​ມະ​ເຮັງ​ຫຼອດ​ອາຫານ​

ເມື່ອ​ໜັງ​ທ້ອງ​ຕຶງ​ ໜັງ​ຕາ​ກໍ​ເລີ່ມ​ຢ່ອນ​ ຈຶ່ງ​ເປັນ​ທຳມະດາ​​ທີ່ຄົ​ນ​ສ່ວນ​ໃຫຍ່​ຈະນອນຫຼັງຈາກກິນເຂົ້າ ແຕ່​ເຈົ້າ​ຮູ້​ຫຼື​ບໍ່​ວ່າ​ ສິ່ງ​ທີ່​ເຈົ້າ​ຄິດວ່າ​ເຮັດ​ແລ້ວ​ສະບາຍ​ ອາດ​ສົ່ງ​ຜົນ​ເສຍ​ຕໍ່​ເຈົ້າ​ໃນ​ອະນາຄົດ​ໄດ້​ ຜົນ​ເສຍ​ຄື​ຫຍັງ​ ຕ້ອງ​ມາ​ສຶກ​ສາ​ໄປ​ພ້ອມ​ກັນ​ຕອນ​ນີ້​ເລີຍ​
ເປັນ​ຄວາມ​ຈິງ​ທີ່​ສະ​ຖິ​ຕິ​ຜູ້​ປ່ວຍ​ທີ່​ມີ​ອາການ​ຂອງ​ “ພະຍາດ​ກົດ​ໄຫຼ​ຍ້ອນ​” ມີ​ປະລິ ມານ​ເພີ່ມ​ຫຼາຍ​ຂຶ້ນ​ເລື່ອຍ​ໆ​  ແລະ​ ບໍ່​ແມ່ນ​ພາຍໃນປະເທດເທົ່າ​ນັ້ນ​ທີ່ພົບບັນຫາ​ນີ້​ ແຕ່​ພະຍາດ​ກົດ​ໄຫຼ​ຍ້ອນ​ຍັງ​ເປັນ​ບັນຫາ​ຂອງ​ປະເທດ​ທີ່​ມີ​ການ​ພັດທະນາ​ທາງ​ເສດຖະກິດ​ ແລະ ​ສັງຄົມ​ຢ່າງ​ ຢູ​ໂຣບ​ ອາ​ເມ​ຣິ​ກາ​ ຫຼື ​ສິງ​ກະ​ໂປ ທີ່ພົບວ່າ​ປະລິມານ​ຜູ້​ປ່ວຍ​ທີ່​ເກີດ​ພະຍາດ​ກົດ​ໄຫຼ​ຍ້ອນ​ມີ​ຕົວ​ເລກ​ສູງ​ຂຶ້ນ​ ໂດຍ​ກຸ່ມ​ປະເທດ​ຕາເວັນ​ຕົກ​ມີ​ຫຼາຍ​ເຖິງ​ 11.8-28.5%  ສ່ວນ​ເອ​ເຊຍ​ຢູ່​ທີ່​ 3.3-16%

ພະຍາດ​ກົດ​ໄຫຼ​ຍ້ອນ​ ຄື​ຫຍັງ​
ພະຍາດ​ກົດ​ໄຫຼ​ຍ້ອນ​ ເປັນ​ພາ​ວະ​ທີ່​ມີ​ກົດ​ ຫຼື ​ນ້ຳ​ຍ່ອຍ​ໃນ​ກະເພາະ​ອາຫານ​ໄຫຼ​ຍ້ອນ​ຂຶ້ນ​ມາ​ບໍລິເວນ​ຫຼອດ​ອາຫານ​ ຊຶ່ງ​ບໍ່​ແມ່ນ​ບໍລິເວນ​ທີ່​ສາມາດ​ທົນ​ຕໍ່​ກົດ ​ຫຼື ​ນ້ຳ ບີ​ໄດ້​ດົນ​ໆ​ ເຮັດໃຫ້​ຜູ້​ປ່ວຍ​ມີ​ການ​ອັກ​ເສບ​ຂອງ​ຫຼອດ​ອາຫານ​ ແລະ​ ເຈັບ​ປວດ​ທໍລະມານ​ ເມື່ອປ່ອຍ​ຖິ້ມ​ໄວ້​ດົນ​ໆ​ 5-10 ປີ​ ກໍ​ມັກ​ຈະ​ພົບ​ພາ​ວະ​ແຊກ​ຊ້ອນ​ ເຊັ່ນ​ ຫຼອດ​ອາຫານ​ອັກ​ເສບ​ຊຳເຮື້ອ​ ມີ​ພັງ​ຜືດ​ ກືນ​ອາຫານ​ລຳ​ບາກ​ ແລະ​ ເພີ່ມ​ໂອ​ກາດ​ເກີດ​ພະຍາດ​ມະ​ເຮັງ​ຫຼອດ​ອາຫານ​ ເປັນ​ຕົ້ນ​

ອາການ​ໃດເດ​ທີ່​ບົ່ງ​ບອກ​ວ່າ​ເປັນ​ພະຍາດ​ກົດ​ໄຫຼ​ຍ້ອນ​
ອາການ​ທີ່ພົບ​ ເຊັ່ນ​
– ເອິ​ເລື້ອຍໆ​
– ຮູ້ສຶກ​ມີລົດຂົມ​ຂອງ​ນ້ຳບີ​ ຫຼື​ ມີລົດ​ສົ້ມ​ຂອງ​ກົດ​ໃນ​ຄໍ​ຫຼື​ໃນ​ປາກ​
– ອາການ​ປວດ​ແສບ​ຮ້ອນ​ບໍລິເວນ​ກາງເອິກ​
– ກືນ​ອາຫານ​ຕິດ​ຂັດ​  ຮູ້ສຶກ​ເໝືອນ​ມີ​ກ້ອນ​ຢູ່ໃນ​ຄໍ​
– ​ໄອ​ຊຳເຮື້ອ​
– ເຈັບ​ຄໍ​ຫຼື​ແສບ​ລີ້ນ​ຊຳເຮື້ອ​
– ສຽງ​ແຫບ​ຊຳເຮື້ອ​ ຫຼື​ ສຽງ​ປ່ຽນ​
– ໄຊ​ນັດ​ອັກ​ເສບ​ ຫຼື​ ຫູ​ນ້ຳ​ໜວກ​
– ອາການ​ຈຸກ​ແໜ້ນ​ບໍລິເວນ​ໜ້າເ​ອິກ​ ທີ່​ບໍ່​ໄດ້​ເກີດ​ຈາກ​ພະຍາດ​ຫົວ​ໃຈ​ ພະຍາດ​ຫອບ​ຫືດ​

ບຸກ​ຄົກກຸຸ່ມ​ໃດ​ ສ່ຽງ​ຕໍ່​ພະຍາດ​ກົດ​ໄຫຼ​ຍ້ອນ​
ພະຍາດ​ກົດ​ໄຫຼ​ຍ້ອນ​ເປັນ​ໄດ້​ກັບ​ຄົນ​ທຸກ​ເພດ​ ທຸກໄ​ວ​ ແຕ່​ເກີດ​ຫຼາຍ​ທີ່ສຸດ​ໃນ​ “ຄົນຕຸ້ຍ​” ເນື່ອງ​ຈາກ​ ແຮງ​ດັນ​ທີ່​ຝາ​ໜ້າ​ທ້ອງ​ຈະ​ໄປ​ກົດ​ທີ່​ກະເພາະ​ອາຫານ​ ເຮັດໃຫ້​ແຮງ​ດັນ​ໃນ​ກະເພາະ​ເພີ່ມ​ຫຼາຍ​ຂຶ້ນ​ ແລະ ​ດັນ​ໃຫ້​ກົດ​ຂຶ້ນ​ມາ​ທີ່​ຫຼອດ​ອາຫານ​ໄດ້​ງ່າຍ​ຂຶ້ນ​

ປ້ອງ​ກັນ​ພະຍາດ​ກົດ​ໄຫຼ​ຍ້ອນ​ ໄດ້​ແນວໃດ​
ຫາກ​ບໍ່​ຕ້ອງ​ການ​ຈະ​ເປັນ​ພະຍາດ​ກົດ​ໄຫຼ​ຍ້ອນ​ ຈະ​ຕ້ອງ​ພະຍາຍາມ​ປັບ​ປ່ຽນ​ພຶດຕິກຳ​ການ​ດຳ​ເນີນ​ຊີວິດ​ບາງຢ່າງ​ ໂດຍ​ສະເພາະ​ພຶດຕິກຳ​ການ​ຮັບປະທານ​ອາຫານ​ແລະ​ພຶດຕິກຳ​ຫຼັງ​ອາຫານ​ ດັ່ງ​ຕໍ່ໄປ​ນີ້​

1. ຫຼີກ​ລ້ຽງ​ອາຫານ​ທີ່​ເຮັດໃຫ້​ຫູ​ຮູດ​ກະເພາະ​ອາຫານ​ຫຼວມ​ ເຊັ່ນ​ ອາຫານ​ທອດ​ ອາຫານ​ໄຂ​ມັນ​ຫຼາຍ​ ອາຫານ​ເຜັດ​ ຊັອກ​ໂກ​ແລັດ​ ຫຼື​ ເຄື່ອງ​ດື່ມ​ທີ່​ມີ​ຄາ​ເຟ​ອີນ​ສູງ​ຄືຊາ​ຫຼື​ກາ​ເຟ​ ເປັນ​ຕົ້ນ​
2. ຫຼີກ​ລ້ຽງ​ອາຫານ​ທີ່​ມີ​ຄວາມ​ເປັນ​ກົດ​ ຫຼື​ ຈະ​ເຮັດໃຫ້​ເກີດ​ການ​ລະ​ຄາຍ​ເຄືອງ​ຕໍ່​ລະບົບ​ທາງເດີນ​ອາຫານ​ ເຊັ່ນ​ ໝາກໄມ້​ປະ​ເພດ​ໝາກກ້ຽງ ຫຼື​ ໝາກນາວ​ ໝາກ​ເຂືອເລັ່ນ ຫອມ​ຫົວ​ໃຫຍ່​ ນ້ຳ​ອັດ​ລົມ​ ພິກ​ໄທ​ ເປັນ​ຕົ້ນ​
3. ຫ້າມ​ນອນ​ທັນ​ທີພາຍ​ຫຼັງກິນເຂົ້າ​ອິ່ມ​ ຄວນ​ຖິ້ມໄລຍະ​ຫ່າງ​ກ່ອນ​ນອນ​ປະ​ມານ​ 3 ຊົ່ວ​ໂມງ​ ຫຼື ​ພະຍາຍາມ​ເລື່ອນ​ການກິນເຂົ້າຕອນແລງໃຫ້​ໄວ​ຂຶ້ນ​
4. ປັບ​ປ່ຽນ​ພຶດຕິກຳ​ບາງຢ່າງ​ຕອນ​ນອນ​ຫຼັບ​ ເຊັ່ນ​ ການ​ນອນ​ໜຸນ​ຫົວ​ຕຽງ​ໃຫ້​ສູງ​ຂຶ້ນ​ 6-8 ນິ້ວ​  ການ​ນອນ​ສະ​ແຄງ​ຊ້າຍ​  ເປັນ​ຕົ້ນ​
5. ຫຼີກ​ລ້ຽງ​ການໃສ່​ເສື້ອ​ຜ້າ​ ຫຼື​ ເຂັມ​ຂັດ​ທີ່​ຄັບ​ແໜ້ນ​ຈົນ​ເກີນ​ໄປ​
6. ຫຼຸດ​ນ້ຳ​ໜັກ​ຕົວ​

ຢ່າ​ນິ່ງ​ນອນ​ໃຈ​ກັບ​ພຶດຕິກຳ​ການ​ໃຊ້​ຊີວິດ​ແບບ​ຜິດ​ໆ​ທີ່​ອາດຈະ​ສົ່ງ​ຜົນ​ຕໍ່​ການ​ເກີດ​ພະຍາດ​ກົດ​ໄຫຼ​ຍ້ອນ​ ການ​ຮຽນ​ຮູ້​ ແລະ​ ການ​ປ້ອງ​ກັນ​ເປັນ​ສິ່ງ​ທີ່​ຈຳ​ເປັນ ກ່ອນ​ທີ່​ທຸກ​ຢ່າງ​ຈະ​ສາຍ​ເກີນ​ໄປ​…ຈຳ​ໄວ້​ວ່າ​…ອາການ​ຂອງ​ພະຍາດ​ກົດ​ໄຫຼ​ຍ້ອນ​ເປັນ​ສິ່ງ​ທີ່​ສາມາດ​ປ້ອງ​ກັນ​ໄດ້​ ຖ້າ​ເຈົ້າ​ເຮັດ​ໄດ້​ກ່ອນ​ ໂອ​ກາດ​ທີ່​ຈະ​ເປັນ​ພະຍາດ​ນີ້​ກໍ​ຄົງ​ບໍ່​ເກີດ​ຂຶ້ນ​ກັບ​ເຈົ້າ​ຢ່າງ​ແນ່ນອນ​