ເຕືອນໄພ!!! ກະແຈລາຄາແພງກໍເອົາບໍ່ຢູ່...ຖ້າຫາກຂາດສະຕິ

        ໃນຕອນເຊົ້າເວລາປະມານ 04:30 ໂມງຂອງວັນທີ 19 ກັນຍາ 2016 ທີ່ຜ່ານມາໄດ້ເກີດເຫດໂຈນຂີ້ລັກງັດເຂົ້າເຮືອນຫ້ອງແຖວ ບໍລິເວນເຂດບ້ານ ໜອງວຽງຄຳ ຮ່ອມ 6 ເມືອງ ໄຊທານີ ນະຄອນຫຼວງວຽງຈັນ. ໃນເວລາດັ່ງກ່າວ ທາງເຈົ້າຂອງຫ້ອງແຖວມີຄວາມຮູ້ສຶກຜິດປົກກະຕິວ່າໄດ້ຍິນສຽງໄຂປະຕູຮົ້ວ ເຊິ່ງແມ່ນສຽງໂສ້ດາດໃສ່ເຫຼັກເກີດມີສຽງດັງຂຶ້ນ ແຕ່ກໍບໍ່ຮູ້ສຶກແປກໃຈຫຍັງເນື່ອງຈາກຄິດວ່າຄົນທີ່ອາໃສຢູ່ໃນຫ້ອງແຖວນັ້ນໄຂປະຕູເຂົ້າມາ, ໄດ້ຍິນສຽງຄັ້ງທີ 2 ແມ່ນໄຂຄອກລົດຈັກ ຕົນເອງຄິດໃນໃຈວ່າເປັນຫຍັງຜົວຂອງຕົນຄືໄປເປີດຄອກລົດແຕ່ເດິກແທ້ ພໍດີຫັ້ນໄປເບິ່ງຜົວຊໍ້າພັດຍັງນອນຢູ່ ກໍເລີຍສົງໄສວ່າມີໂຈນເຂົ້າມາລັກລົດແນ່ນອນ, ຕົນເອງຈຶ່ງໄດ້ຮີບລຸກຟ້າວອອກໄປເບິ່ງ ປະກົດວ່າມີຜູ້ຊາຍສອງຄົນຮູບຮ່າງໃຫຍ່ກຶດ, ໃຊ້ໝວກກັນກັນທົບປົກປິດ ເພື່ອປ້ອງກັນການຈື່ຈໍາໃບໜ້າ ກຳລັງທີ່ຈະທັບມ້າງກະແຈລົດເວບຮ້ອຍຂອງຄົນທີ່ມາພັກເຊົາທີ່ເຂົາຈອດໄວ້ໃນຄອກລົດ. ເມື່ອໂຈນພົບເຫັນເຈົ້າຂອງຫ້ອງແຖວ ບໍ່ມີທ່າທາງວ່າຈະຄິດຢ້ານ ຫຼື ແລ່ນໜີແມ່ນແຕ່ໜ້ອຍ, ຊໍ້າບໍ່ໜຳຍັງເວົ້າເຢີ້ຍອີກວ່າ: "ລົງມາແມະຄັນເກັ່ງນະ ລົງມາໆ" ໃນຕອນນັ້ນເຈົ້າຂອງຫ້ອງແຖວກໍຕ້ອງໃຈ, ສັ່ນ ແລະ ເຮັດຫຍັງບໍ່ຖືກຈຶ່ງໄດ້ເອີ້ນໃສ່ຜູ້ເປັນຜົວລຸກຂຶ້ນມາ ແຕ່ກໍບໍ່ທັນແລ້ວ ເພາະໂຈນໄດ້ໜີໄປເສຍກ່ອນ ແຕ່ກໍຍັງໂຊກດີທີ່ບໍ່ມີຊັບສິນເສຍຫາຍກໍພຽງແຕ່ເຮັດໃຫ້ທາງເຈົ້າຂອງຫ້ອງແຖວຂວັນເສຍຫຼາຍເຕີບ. 

      ດັ່ງນັ້ນ, ຈຶ່ງຢາກຝາກເຕືອນຜູ້ທີ່ເຊົ່າຢູ່ຕາມຫ້ອງເຊົ່າ ຫຼື ຫ້ອງແຖວ ໃຫ້ມີສະຕິລະມັດລະວັງຕົວເອງຫຼາຍຂຶ້ນ ໂດຍສະເພາະພວກຂີ້ລັກຈະມັກສວາຍໂອກາດໃນຊ່ວງຍາມຝົນຕົກຟ້າຮ້ອງ ແລະ ຊ່ວງຍາມເທດສະການງານບຸນຕ່າງໆ. ໃຫ້ຮັກສາເກັບມ້ຽນໃຫ້ດີ ທີ່ສໍາຄັນຊ່ວຍກັນເປັນຫູເປັນຕາ ແລະ ນໍາຈັບຄົນທີ່ກະທຳຜິດມາລົງໂທດຕາມລະບຽບກົດໝາຍໃຫ້ໄດ້ ເພາະຍິ່ງປ່ອຍໃຫ້ມັນລອຍນວນຍິ່ງເປັນອັນຕະລາຍຕໍ່ສັງຄົມ. 

       ໃຫ້ຄິດໄວ້ສະເໝີວ່າ: ບໍ່ວ່າອຸປະກອນເຮົາຈະໝັ້ນໃຈໄດ້ມາດຕະຖານ ແລະ ມີລາຄາແພງເທົ່າໃດບໍ່ສໍາຄັນ. ໂຈນມັນກໍຍ່ອມມີການພັດທະນາຝີມືການລັກຂອງມັນຂຶ້ນໄປເລື້ອຍໆເຊັ່ນກັນ ຄືດັ່ງທີ່ທ່ານເຫັນໃນຮູບພາບດັ່ງກ່າວນັ້ນ ຄົນຮ້າຍບໍ່ສາມາດເອົາລູກກະແຈອື່ນມາໄຂໄດ້ ແຕ່ກໍຍັງສາມາດເອົາເຫຼັກຕັດມາໜີບຈົນຂາດອອກໄດ້.​

    ທ່ານໃດທີ່ສາມາດຮູ້ເບາະແສຂອງຄົນຮ້າຍ ຫຼື ຖືກກຸ່ມຄົນບໍ່ດີດັ່ງກ່າວໄປງັດເຮືອນ ຫຼື ຫ້ອງແຖວຂອງທ່ານ ຈົ່ງໃຫ້ຮີບແຈ້ງເຈົ້າໜ້າທີ່ໂດຍດ່ວນ ເພາະຕອນນີ້ເຈົ້າໜ້າທີ່ ປກສ ເຂດກຸ່ມດົງໂດກກຳລັງນໍາຈັບຕົວຄົນຮ້າຍ.