ເຕືອນ! ຫ້າມບໍ່ໃຫ້ລົດນ້ຳໜັກເກີນ 10 ໂຕນ ແລ່ນຜ່ານຂົວນໍ້າໄຮ ເພາະຢ້ານຫັກ

ຂົວຂ້າມນ້ຳໄຮ ເມືອງຄູນຄຳ ແຂວງຄຳມ່ວນ ຖືກນ້ຳເຊາະເປ່ເພຫຼາຍນັບແຕ່ວັນທີ 1 ສິງຫາ ເປັນຕົ້ນມາ; ດັ່ງນັ້ນ ຫ້ອງການໂຍທາທິການ ແລະ ຂົນສົ່ງ ເມືອງຄູນຄຳ ຈຶ່ງໄດ້ສັ່ງຫ້າມລົດປະເພດ 4 ລໍ້ທຸກຊະນິດ ສັນຈອນຂ້າມຂົວດັ່ງກ່າວ ເພື່ອຫຼີກລ້ຽງການເກີດອຸບັດເຫດ ແລະ ເຮັດໃຫ້ຂົວໄດ້ຮັບຜົນກະທົບຫຼາຍກວ່າເກົ່າ. ປັດຈຸບັນການສ້ອມແປງໄດ້ສຳເລັດແລ້ວ ເຮັດໃຫ້ລົດໃຫຍ່ປະເພດ 4 ລໍ້ສາມາດທຽວປົກກະຕິ, ແຕ່ລົດທີ່ມີນ້ຳໜັກເກີນ 10 ໂຕນຂຶ້ນບໍ່ສາມາດຜ່ານໄດ້.

ທ່ານ ພິດສະໄໝ ກອງຊາເດດ ຫົວໜ້າພະແນກໂຍທາທິການ ແລະ ຂົນສົ່ງ ແຂວງຄຳມ່ວນ ໃຫ້ສຳພາດວ່າ: ຂົວນ້ຳໄຮ ເມືອງຄູນຄຳທາງໄປຖ້ຳກອງລໍ ຖືກນ້ຳເຊາະເສົາຂົວຂາດ, ເຊາະດິນສົ້ນຂົວເຈື່ອນອອກ ເຮັດໃຫ້ສົ້ນຂົວຈະຫວິດຈາກດິນ. ສະນັ້ນ ພວກເຮົາໄດ້ສົມທົບກັບຫ້ອງການໂຍທາທິການແລະຂົນສົ່ງເມືອງຄູນຄຳ ສັ່ງຢຸດການສັນຈອນຜ່ານຂົວຊົ່ວຄາວ ໂດຍສະເພາະແມ່ນລົດໃຫຍ່ປະເພດ 4 ລໍ້, ໄດ້ແຕ່ງຕັ້ງພະນັກງນວິຊາການລົງໄປສ້ອມແປງແກ້ໄຂ, ພ້ອມທັງອະນຸມັດງົບຊື້ເຫຼັກເພື່ອມາຕໍ່ຂາງຂົວສົ້ນເບື້ອງກອງລໍອອກຕື່ມ 15 ແມັດ (ຂົວເດີມ ຍາວ 51 ແມັດ), ເນື່ອງຈາກດິນເບື້ອງດັ່ງກ່າວຖືກນ້ຳເຊາະເຈື່ອນອອກ. ມາຮອດວັນທີ 15 ສິງຫາ ການສ້ອມແປງໄດ້ສຳເລັດ ແລະ ເປີດໃຫ້ລົດໃຫຍ່ປະເພດ 4 ລໍ້ສັນຈອນໄດ້, ແຕ່ຂົວດັ່ງສາມາດຮອງຮັບນ້ຳໜັກໄດ້ພຽງແຕ່ 10 ໂຕນລົງມາ.

ທ່ານ ແກ້ວລັນດອນ ຈັນທະປານີ ເຈົ້າເມືອງໆ ຄູນຄຳ ແຂວງຄຳມ່ວນ ໃຫ້ສຳພາດວ່າ: ນັບແຕ່ມື້ຂົວເປ່ເພທາງເມືອງໄດ້ຊີ້ນຳໃຫ້ຂະແໜງການກ່ຽວຂ້ອງຂຸ້ນຂ້ຽວກັນສ້ອງແປງແກ້ໄຂ, ເຮັດໃຫ້ສະພາບການສັນຈອນຈາກເທດສະບານເມືອງໄປຫາບ້ານປະຊາຊົນຢູ່ຟາກນ້ຳເບື້ອງຖ້ຳກອງລໍ ຈຳນວນ 20 ບ້ານ ມີປະຊາຊົນຈຳນວນ 10 ພັນກວ່າຄົນ ມີຄວາມສະດວກ.

Cr: https://laoedaily.com