ເດ ເຄອາ ຢືນຢັນມີຄວາມສຸກກັບທີມຕອນນີ້

ດາວິດ ເດ ເຄອາ ນາຍທະວານທີມຊາດ ສະເປນ ຂອງ ແມນເຊສເຕີ ຢູໄນເຕັດ ເປີດເຜີຍຮູ້ແລ້ວວ່າອັນໃດແມ່ນຄວາມສຸກຂອງຊີວິດ ຕັ້ງແຕ່ວິນາທີທີ່ລົງປາກກາເຊັນສັນຍາສະບັບໃໝ່ ຕອນທີ່ບໍ່ໄດ້ຍ້າຍໄປ ເຣອັນ ມາດຣິດ ເປີດເຜີຍໃຫ້ຮູ້ວ່າ ເຂົາໂຊກດີແລ້ວທີ່ໄດ້ຢູ່ໃນ ໂອນ ທຣາຟເຟິດ ຕໍ່ໄປເພາະວ່າສຳຜັດໄດ້ເຖິງຄວາມອົບອຸ່ນ ຄວາມເຊື່ອໝັ້ນ ແລະ ຄວາມສັດທາທີ່ມີຢູ່ໃນທີມ.

ດາວິດ ເດ ເຄອາ ນາຍທະວານທີມຊາດ ສະເປນ ຂອງ ແມນຢູ ເປີດເຜີຍ ມີຄວາມສຸກກັບຊີວິດປັດຈຸບັນໃນການສີເສື້ອ “ຜີສາດແດງ” ຢ່າງທີ່ສຸດ ຫຼັງຈາກທີ່ການຍ້າຍໄປຫຼິ້ນກັບ ເຣອັນ ມາດຣິດ ປິດສາກລົງດ້ວຍຄວາມຂົມ ແຕ່ຕອນນີ້ລືມໄປໝົດແລ້ວ ແລະ ຍັງບໍ່ຮູ້ສຶກເສຍໃຈຫຍັງ ເພາະໄດ້ຢູ່ກັບທີມທີ່ສະໂມສອນ, ຜູ້ຈັດການທີມ ແລະ ແຟນບານຮັກ ແລະ ໃຫ້ຄວາມສັດທາໃນໂຕເຂົາຢ່າງແທ້ຈິງ.

ເປັນທີ່ຮູ້ກັນວ່າ ເດ ເຄອາ ຕ້ອງການຍ້າຍໄປຫຼິ້ນກັບ ມາດຣິດ ໃນລະດູການນີ້ ເມື່ອປ່ອຍສັນຍາທີ່ເຫຼືອຢູ່ປີສຸດທ້າຍຄ້າງເອົາໄວ້ ແຕ່ດ້ວຍເຫດຜົນຫຍັງກໍຕາມການຍ້າຍທີມທີ່ເບິ່ງແລ້ວອາດຈະລຸລ່ວງໃນມື້ສຸດທ້າຍ ກັບລົ້ມເຫຼວລົງ ຈາກນັ້ນ ເດ ເຄອາ ກໍຕໍ່ສັນຍາໃໝ່ໄລຍະຍາວ 4 ປີ ຢູ່ກັບທີມ “ຜີສາດແດງ” ແບບມີຄວາມສຸກຈົນຮອດມື້ນີ້.

“ຂ້ອຍຮູ້ສຶກໄດ້ວ່າ ເວລາທີ່ເຊັນຂະຫຍາຍສັນຍາໃໝ່ ມັນເປັນສິ່ງທີ່ດີທີ່ສຸດແລ້ວ ຕອນນີ້ຂ້ອຍມີຄວາມສຸກ ຂ້ອຍໄດ້ຢູ່ໃນໜຶ່ງໃນທີມທີ່ຍິ່ງໃຫຍ່ທີ່ສຸດໃນໂລກ ທີ່ຂ້ອຍຮູ້ສຶກໄດ້ເຖິງຄວາມຮັກຈາກແຟນບານ ບໍ່ມີໃຜເຮັດໃຫ້ຂ້ອຍເສຍໃຈ ຫຼື ຜິດຫວັງ ເລື່ອງແບບນີ້ມັນເກີດຂຶ້ນໄດ້ ເຈົ້າຕ້ອງເບິ່ງໄປທີ່ອະນາຄົດ ແລະ ຂ້ອຍມີຄວາມສຸກຫຼາຍແທ້ໆ ຊ່ວງຕະຫຼາດ ຊື້-ຂາຍ ນັກເຕະແມ່ນຫຍັງກໍເປັນໄປໄດ້ ພຽງນາທີດຽວກໍປ່ຽນແປງແລ້ວ ກິລາບານເຕະກໍແບບນີ້ ມັນມີຊ່ວງເວລາທີ່ຍາກລຳບາກ ຊ່ວງເວລາທີ່ແປກໆ ແຕ່ມັນກໍເຮັດໃຫ້ເຮົາໃຫຍ່ຂຶ້ນແຂງແກ່ນຂຶ້ນ”.

ເດ ເຄອາ ຍ້ອງ ຫຼຸຍ ຟານກາວ ເປັນພິເສດອີກວ່າ ເຂົາຮູ້ສຶກຂອບໃຈຫຼາຍທີ່ເຊື່ອໝັ້ນໃນໂຕເຂົາ “ຕັ້ງແຕ່ມື້ທຳອິດທີ່ຂ້ອຍກັບມາ ຫຼັງຈາກເລື່ອງທັງໝົດ ເຂົາມອບຄວາມໝັ້ນໃຈຫຼາຍມະຫາສານຫຼາຍໃຫ້ກັບຂ້ອຍ ເຂົາບອກຂ້ອຍວ່າ ຂ້ອຍຈະໄດ້ຫຼິ້ນ ປ່ອຍຈິດໃຈໃຫ້ສະບາຍໆ ແລະ ເຮັດແບບທີ່ເຮັດຕໍ່ໄປ”.

............................................................................................................................................