ເດີບົວບອກງູຕ້ອງປັບອີກຫຼາຍຢ່າງເພື່ອປະສົບຄວາມສຳເລັດປີນີ້

 

ແຟັງ ເດີ ບົວ ຜູ້ຈັດການທີມ ມິລານ ຊີ້ຕົ້ນສັງກັດຕ້ອງປັບປຸງອີກຫຼາຍຫຼັງຈາກທີ່ເສຍໃຫ້ກັບ ຄິເອໂວ ນັດເປີດສະໜາມເມື່ອວັນອາທິດທີ່ຜ່ານມາ ຮັບວ່າສຸດຜິດຫວັງກັບຜົນການແຂ່ງຂັນແຕ່ໝັ້ນໃຈວ່າ “ງູໃຫຍ່” ຈະດີຂຶ້ນເລື້ອຍໆ ຫຼັງຈາກທີ່ຫາກໍເຂົ້າມາຄຸມທັບໄດ້ບໍ່ດົນ.

 

ແຟັງ ເດີ ບົວ ນາຍໃຫຍ່ “ງູໃຫຍ່” ອິນເຕີ ມິລານ ສະໂມສອນຍັກໃຫຍ່ຂອງ ກັນໂຊ ຊີຣີ ອາ ອອກມາກ່າວເມື່ອວັນຈັນນີ້ວ່າຕົ້ນສັງກັດຈຳເປັນຕ້ອງປັບປ່ຽນຫຼັງຈາກທີ່ເສຍໃຫ້ກັບ ຄິເອໂວ 0-2 ໃນເກມລີກນັດເປີດລະດູການເມື່ອວັນອາທິດທີ່ຜ່ານມາ.

 

ອະດີດນາຍໃຫຍ່ ອາແຈັກ ອາມສະເຕີດຳ ທີມດັງຈາກໂຮນລັງຫາກໍເຂົ້າມາຮັບຕຳແໜ່ງໃນ ຊານ ຊີໂຣ ເມື່ອ 2 ອາທິດກ່ອນ ແລະ ບໍ່ສາມາດພາລູກທີມເກັບ 3 ແຕ້ມໄດ້ໃນນັດທຳອິດ ຫຼັງຈາກທີ່ພາດທ່າເສຍໃຫ້ກັບ ຄິເອໂວ ຈາກການງານການເໝົາຍິງຂອງ ວໍເຕີ ເບຍຊາ ປີກທີມຊາດສະໂລວາເນຍໃນນາທີ 49 ແລະ 81 ແລະ ຫຼ້າສຸດ ເດີ ບົວ ໄດ້ອອກມາຍອມຮັບວ່າ ອິນເຕີ ຍັງມີວຽກທີ່ຕ້ອງເຮັດອີກຫຼາຍເພື່ອປະສົບຄວາມສຳເລັດໃນລະດູການນີ້.

 

“ເຮົາຜິດຫວັງກັບຜົນການແຂ່ງຂັນ ແລະ ມີວຽກຕ້ອງເຮັດອີກຫຼາຍ ຂ້ອຍໜັ້ນໃຈວ່າເຮົາຈະພັດທະນາຂຶ້ນ ທັງໃນເລື່ອງບານເຕະ ແລະ ສະພາບຮ່າງກາຍໃນອາທິດໜ້າເຮົາຈະພະຍາຍາມເຮັດໃຫ້ດີກວ່ານີ້” ນາຍໃຫຍ່ກ່າວ.

 

ເດີ ບົວ ຍັງບອກອີກວ່າເຂົາພະຍາຍາມຈັດທີມຊຸດທີ່ດີທີ່ສຸດລົງຫຼິ້ນ ຫຼັງຈາກ ອິນເຕີ ມີບັນຫາກັບເກມອຸ່ນເຄື່ອງຊ່ວງພຣີຊີຊັນທີ່ຜ່ານມາ.