ເດີນໜ້າເຕັມທີ່!!ເປເອັດເຊພ້ອມເດີນໜ້າດຶງມາເຣດຮ່ວມທັບ

 

ສື່ດັງຂອງອັງກິດລະບຸວ່າ ປາຣີ ແຊງ-ແຊັກແມງ ກຽມທີ່ຈະເອົາຈິງເອົາຈັງກັບການລ່າຕົວ ຣີຢາດ ມາເຣດ ປີກຈອມພິ້ວຂອງ ເລສເຕີ ຊີຕີ ມາຮ່ວມທີມຊ່ວງຊຳເມີນີ້ໂດຍພ້ອມຟາດເງິນກ້ອນມະຫຶມາ 35 ລ້ານປອນ.

 

ປາຣີ ແຊງ-ແຊັກແມງ ສະໂມສອນມະຫາເສດຖີ ລີກແອັງ ຝຣັ່ງຕັດສິນໃຈທີ່ຈະເດີນໜ້າດຶງຕົວ ຣີຢາດ ມາເຣດ ປີກຂອງ ເລສເຕີ ຊີຕີ ສະໂມສອນດັງໃນ ພຣີເມຍລີກ ມາຮ່ວມທັບໃຫ້ໄດ້ໃນຊ່ວງຊຳເມີນີ້ຕາມການລາຍງານຈາກ ເດລີ ສະຕາ ສື່ຊັ້ນນຳເມືອງຜູ້ດີເມື່ອວັນພະຫັດທີ່ຜ່ານມາ.

 

ເຖິງວ່າຈະບໍ່ໄດ້ໂຊຟອມເທບໆຄືກັບລະດູການຜ່ານມາແຕ່ກໍຖືວ່າລະດູການນີ້ເຂົາຍັງເຮັດຜົນງານໄດ້ດີເພາະຍິງໄປແລ້ວ 10 ລູກກັບອີກ 5 ແອັດຊິດຈາກການລົງຫຼິ້ນໃນທຸກລາຍການ ແລະ ເບິ່ງວ່າເຂົາຈະຍັງເປັນທີ່ສົນໃຈຂອງຍັກໃຫຍ່ຫຼາຍທີມໃນເອີຣົບ.

 

ໃນບັນດາທີມທີ່ສົນໃຈເຂົານັ້ນກໍມີ ເປເອັດເຊ ກໍຄືທີມທີ່ພ້ອມທຸ່ມເງິນກ້ອນໃຫຍ່ເພື່ອດຶງເຂົາໄປຮ່ວມທັບໃຫ້ໄດ້ໂດຍທີ່ ເດລີ ສະຕາ ເຜີຍວ່າທີມດັງຂອງນະຄອນປາຣີພ້ອມໃຫ້ເງິນເຖິງ 35 ລ້ານປອນເພື່ອເປັນຄ່າຫົວຂອງເຂົາ.

 

ທັງນີ້ ມາເຣດ ຍັງເຫຼືອສັນຍາກັບ ເລສເຕີ ອີກ 3 ປີແຕ່ກໍມີໂອກາດສູງທີ່ທີມດັງຈາກຖິ່ນ ຄິງ ພາວເວີ ສະເຕເດຽມ ຈະບໍ່ຂວາງທາງເຂົາຖ້າວ່າເຂົາຢາກຍ້າຍທີມຫຼັງຈາກທີ່ນັກເຕະຍອມຖິ້ມໂອກາດທີ່ຈະຍ້າຍທີມເມື່ອຊ່ວງຊຳເມີທີ່ຜ່ານມາເພື່ອຢູ່ຊ່ວຍທີມໃນລະດູການນີ້.