ເດວ ບອສເກບໍ່ຢືນຢັນອະນາຄົດຂອງຕົນແຕ່ຍຸກທອງຂອງກະທິງຍັງບໍ່ຈົບ

 

ບີເຊັນເຕ ເດວ ບອສເກ ນາຍໃຫຍ່ທີມຊາດສະເປນລະບຸຊັດເຈນວ່າຍັງບໍ່ແນ່ນອນກັບເລື່ອງອະນາຄົດການຄຸມທີມຂອງຕົນແຕ່ໝັ້ນໃຈວ່າຍຸກທອງຂອງວົງການລູກໜັງແດນກະທິງຍັງບໍ່ເຖິງຈຸດຈົບ.

 

ບີເຊັນເຕ ເດວ ບອສເກ ຜູ້ຈັດການທີມຊາດສະເປນຍອມຮັບວ່າອະນາຄົດຂອງຕົນຍັງບໍ່ມີຄວາມແນ່ນອນຫຼັງຈາກທີ່ທັບ “ກະທິງ” ຈົບເສັ້ນທາງໃນລາຍການ ຢູໂຣ 2016 ໄວ້ແຕ່ຮອບ 16 ທີມສຸດທ້າຍດ້ວຍການປລາໄຊໃຫ້ກັບອີຕາລີ 0-2 ເມື່ອວັນຈັນທີ່ຜ່ານມາ.

 

ສະເປນເຊິ່ງມີດີກຣີເປັນແຊມເກົ່າ 2 ສະໄໝຕິດຕົກຮອບ ຢູໂຣ ແບບໜ້າຜິດຫວັງເຊິ່ງຖືກເປັນຄວາມລົ້ມເຫຼວໃນທົວນາເມນໃຫຍ່ 2 ລາຍການຕິດຫຼັງຈາກທີ່ຈອດປ້າຍຕັ້ງແຕ່ຮອບທຳອິດໃນບານໂລກ 2014 ທີ່ປະເທດບາຊິວ.

 

ເຖິງວ່າ ເດວ ບອສເກ ໝັ້ນໃຈວ່າຍຸກທອງຂອງສະເປນຍັງບໍ່ທັນຈົບແຕ່ເຂົາກໍຍອມຮັບວ່າຕົນເອງອາດຈະບໍ່ໄດ້ຢູ່ໃນຕຳແໜ່ງຕໍ່ໄປໃນອະນາຄົດ “ຂ້ອຍຕ້ອງເຂົ້າໄປລົມກັບປະທານ (ສະຫະພັນບານເຕະສະເປນ) ກ່ອນ ເຮົາຈຳເປັນຕ້ອງເຮັດສິ່ງທີ່ດີທີ່ສຸດເພື່ອວົງການລູກໜັງສະເປນ ຂ້ອຍບໍ່ໄດ້ຄິດດອກວ່າຍຸກທອງຂອງສະເປນນັ້ນຈົບແລ້ວ ບານຂອງສະເປນມີໂຄງສ້າງທີ່ດີ ມີອະຄາເດມີດີໆຫຼວງຫຼາຍ, ນັກເຕະເກັ່ງໆກໍຫຼາຍ ແລະ ສະໂມສອນດີໆຫຼາຍແຫ່ງ”.