ເຊີນຊົມງານ Lao ICT Expo 2016 ຄັ້ງທໍາອິດຂອງປະເທດລາວ

        ໃນ​ຕອນ​ບ່າຍ​ຂອງ​ວັນ​ທີ 15 ທັນວາ 2016 ທີ່​ຜ່ານ​ມາ ທາງ​ກະຊວງ​ໄປສະນີ ​ໂທລະ​ຄົມມະນາຄົມ ​ແລະ ການ​ສື່ສານ (ປທສ) ​ໄດ້​ຈັດ​ພິທີ​ເປີດ​ງານ​ວາງສະ​ແດງ Lao ICT Expo 2016 ຂຶ້ນທີ່​ຫໍ​ປະຊຸມ​ແຫ່ງຊາດ (ຫຼັກ6) ຢ່າງ​ເປັນ​ທາງ​ການ ​ໂດຍ​ການ​ເປັນ​ປະ​ທານ​ເປີດ​ພິທີ​ໄດ້​ແກ່​ທ່ານ ປອ. ທັນ​ສະ​ໄໝ ກົມມະ​ສິດ ລັດຖະມົນຕີ ກະຊວງ​ໄປສະນີ ​ໂທລະ​ຄົມມະນາຄົມ ​ແລະ ການ​ສື່ສານ, ພະນະ​ທ່ານ ປອ. ບຸນ​ທອງ ຈິດ​ມະນີ ກຳມະການ​ກົມ​ການ​ເມືອງ​ສູນ​ກາງ​ພັກ, ຮອງ​ນາຍົກລັດຖະມົນຕີ ​ແລະ ບັນດາ​ເຈົ້າ​ແຂວງ/ຮອງ​ເຈົ້າ​ແຂວງ ພ້ອມ​ດ້ວຍ​ຜູ້ຕາງໜ້າຈາກ​ອົງການ​ຈັດຕັ້ງລັດ-​ເອກະ​ຊົນ, ພະນັກງານ​ຈາກ​ສູນ​ກາງ-ທ້ອງ​ຖິ່ນຂອງ​ຂະ​ແໜງ ປທສ ​ແລະ ມວນ​ຊົນ​ເຂົ້າຮ່ວມ​ຫຼາຍກວ່າ 550 ຄົນ.

       ທ່ານ ປອ. ທັນສະໄໝ ກົມມະສິດກ່າວວ່າ: ງານ ICT Expo 2016 ​ໄດ້​ຈັດ​ຂຶ້ນ​ເປັນຄັ້ງທໍາ​ອິດ​ຂອງ ສປປ ລາວ ​ຈຸດປະສົງ​ແມ່ນ​ເພື່ອ​ສົ່ງ​ເສີມ​ໃຫ້​ພາກ​ລັດ-​ເອກະ​ຊົນ, ບັນດາ​ບໍລິສັດ ຫຼື ນິຕິບຸກຄົນ​ທີ່​ປະກອບ​ການ​ດ້ານ​ໄອ​ຊີ​ທີ ​ແລະ ​ໂທລະ​ຄົມມະນາຄົມ ​ໄດ້​ມີ​ໂອກາດ​ສະ​ແດງ​ຜະລິດ​ຕະພັນ, ການ​ບໍລິການ ​ແລະ ນະ​ວັດຕະ​ກຳ​ທາງ​ໄອ​ຊີ​ທີຂອງ​ໂລກ ​ແລະ ຂອງ​ຕົນ. ພ້ອມ​ກັນນັ້ນ ກໍ​ເພື່ອ​ແລກປ່ຽນຂໍ້​ມູນ​ຂ່າວສານ, ປະສົບ​ການ​ໃນ​ການ​ພັດທະນາ​ຂະ​ແໜງການ​ໄອ​ຊີ​ທີ ​ແລະ ທັງ​ເປັນ​ເວທີ​ໃຫ້​ຄວາມ​ຮູ້​ທາງ​ດ້ານ​ໄອ​ຊີ​ທີ​ແກ່​ສັງຄົມ. ງານ​ດັ່ງກ່າວ​ໄດ້​ດໍາ​ເນີນ​ມາ​ເປັນ​ເວລາ 5 ວັນ​ ​ໃນ​ລະຫວ່າງ​ວັນ​ທີ 14-18 ທັນວາ 2016 ​ເຊ່ງກໍ​ໄດ້​ປະສົບ​ຜົນ​ສໍາ​ເລັດ​ຢ່າງ​ຈົບງາມ.

      ງານ ICT Expo 2016 ນີ້​ຖື​ວ່າ​ເປັນ​ງານໜຶ່ງທີ່​ມີຫຼາຍສີສັນ ​ເຊິ່ງຜູ້​ເຂົ້າຢ້ຽ​ມຊົມ​ງານ​ຈະ​ໄດ້​ທັງ​ຄວາມ​ຮູ້, ຄວາມ​ບັນ​ເທີ​ງ ​ແລະ ​ໂອກາດ​ໃນ​ການ​ຂະຫຍາຍ​ທຸລະ​ກິດ​ຂອງ​ຕົນ​ໃຫ້​ກ້າວໜ້າ ​ໃຫ້​ທັນ​ຍຸກ​ທັນ​ສະ​ໄໝ.