ເຊັນແລ້ວ!! ໂດ້ຂະຫຍາຍສັນຍາກັບຊຸດຂາວຮອດ 2021 ຢ່າງເປັນທາງການ

 

ເຣອັນ ມາດຣິດ ຈະມີ ຄຣິສຕຽນໂນ ໂຣເນົາໂດ ປະຈຳການເກມບຸກຈົນຮອດປີ 2021 ຫຼັງຈາກທີ່ນັກເຕະເຊັນຂະຫຍາຍສັນຍາເພີ່ມພ້ອມກັບຮັບຄ່າເມື່ອຍສູງຂຶ້ນ ນັກເຕະຍັງບອກອີກວ່າສັນຍາເທື່ອນີ້ຈະບໍ່ແມ່ນສັນຍາສະບັບສຸດທ້າຍ ແລະ ຕ້ອງການລົງໂຊລີລາຂັ້ນເທບຈົນຮອດອາຍຸ 41 ປີ.

 

ຄຣິສຕຽນໂນ ໂຣເນົາໂດ ດາວຍິງຊູເປີສະຕາເຊັນຂະຫຍາຍສັນຍາກັບ ເຣອັນ ມາດຣິດ ຍັກໃຫຍ່ຂອງ ລາ ລີກາ ສະເປນເພີ່ມຈາກເດີມອອກໄປຈົນຮອດປີ 2021 ຢ່າງເປັນທາງການຮຽບຮ້ອຍແລ້ວເມື່ອວັນຈັນທີ່ຜ່ານມາ.

 

ກັບຕັນທີມຊາດປັອກຕຸຍການທີ່ຈະໄດ້ຮັບຄ່າເມື່ອຍອາທິດລະ 500,000 ປອນໃນສັນຍາໃໝ່ກ່າວວ່າ “ຂ້ອຍມີຄວາມສຸກກັບທີ່ນີ້ ແລະ ຕ້ອງການຢູ່ທີ່ນີ້ຕໍ່ໄປ ແຕ່ວ່າຈະບໍ່ແມ່ນສັນຍາສະບັບສຸດທ້າຍຂອງຂ້ອຍໃນເກມລູກໜັງ ຂ້ອຍຕ້ອງການຫຼິ້ນຈົນຮອດອາຍຸ 41 ຂ້ອຍເຄີຍພົບກັບ ເອົາເຟຣໂດ ດິ ສະເຕຟາໂນ ທີ່ນີ້ເຊິ່ງບອກຂ້ອຍວ່າ “ເດີນໜ້າຕໍ່ໄປແບບແຊມປຽນເຈົ້າຈະເປັນນັກເຕະທີ່ຍິ່ງໃຫຍ່””.

 

ກ່ອນໜ້ານີ້ ໂຣເນົາໂດ ຕົກເປັນຂ່າວກ່ຽວພັນກັບການຍ້າຍທີມຢ່າງຕໍ່ເນື່ອງໂດຍສະເພາະກັບ ແມນເຊສເຕີ ຢູໄນເຕັດ ຕົ້ນສັງກັດເກົ່າ ແລະ ປາຣີ ແຊັງ-ແຊັກແມັງ ທີມມະຫາເສດຖີຂອງ ລີກແອັງ ຝຣັ່ງທີ່ພ້ອມຈະທຸ່ມເງິນມະຫາສານດຶງໄປຮ່ວມທັບ.