ເຊັນປຶ້ມໄຫວ້ອາໄລແກ່ ອະດີດປະທານາທິບໍດີ ອິນເດຍ

ໃນ​​ວັນ​ທີ 30 ກໍລະກົດ 2015, ທ່ານ ສະ​ເຫລີມ​ໄຊ ກົມມະ​ສິດ, ລັດຖະມົນຕີ​ຊ່ວຍ​ວ່າການ​ ກະຊວງ​ການ​ຕ່າງປະ​ເທດ ​ແຫ່ງ ສປປ ລາວ ພ້ອມ​ດ້ວຍ​ຄະນະ​ກົມ​ ຂອງ​ກະຊວງ​ການ​ຕ່າງປະ​ເທດ​ ໄດ້​ໄປ​ຮ່ວມ​ໄຫວ້​ອາ​ໄລ​ ແກ່​ດວງ​ວິນ​ຍານຂອງ ​ທ່ານ ອັບ​ດຸລ ຄາ​ລຳ (APJ Abdul Kalam), ອະດີດປະທານາທິບໍດີອິນ​ເດຍ​, ທີ່ໄດ້​ເຖິງ​ແກ່​ມໍລະນະ​ກຳ​ໃນ​ວັນ​ທີ 27 ກໍລະກົດ 2015 ທີ່​ຜ່ານ​ມາ ​ແລະ ​ ໄດ້ຕາງໜ້າ​ໃຫ້​ລັດຖະບານ ​ແຫ່ງ ສປປ ລາວ ​ເຊັນ​ປຶ້ມ​ໄຫວ້​ອາ​ໄລ ໂດຍ​ມີ​ເນື້ອ​ໃນ​ດັ່ງ​ນີ້:

​          “ໃນ​ນາມ​ລັດຖະບານ ​ແລະ ປະຊາຊົນ ແຫ່ງ ສປປ ​ລາວ ກໍ​ຄື​ໃນ​ນາມ​ສ່ວນ​ຕົວ, ຂ້າພະ​ເຈົ້າ​ຂໍ​ສະ​ແດງ​ ຄວາມ​ເສົ້າ​ສະຫລົດໃຈ ​ແລະ ຄວາມ​ເຫັນ​ໃຈ​ຢ່າງ​ສຸດ​ຊຶ້ງ ຕໍ່ການ​ເສຍຊີວິດຂອງ ທ່ານ ອັບດຸລ ຄາລຳ, ອະດີດປະທານາທິບໍດີ ອິນເດຍ ຊິ່ງ​ເປັນຜູ້ນຳ​ທີ່ແສນ​ເຄົາລົບ​ຮັກ, ເປັນນັກວິທະຍາສາດ​ທີ່​ເກັ່ງ ​ແລະ ​ເປັນ​ປະທານາທິບໍດີ​ ອິນ​ເດຍຜູ້​ໜຶ່ງ ​ທີ່ໄດ້​ຮັບ​ຄວາມ​ນິຍົມສູງ.

ການ​ຈາກ​ໄປ​ຂອງ​ທ່ານ ອັບ​ດຸລ ຄາ​ລຳ ​ໃນ​ຄັ້ງ​ນີ້ ບໍ່​ພຽງ​ແຕ່​ເປັນ​ການ​ສູນ​ເສຍ​ ອັນ​ໃຫຍ່​ຫລວງ​ຂອງ​ລັດຖະບານ ​ແລະ ປະຊາຊົນ​ອິນ​ເດຍ, ​ແຕ່​ຍັງ​ເປັນ​ການ​ສູນ​ເສຍ​ ຂອງ​ສະມາຄົມ​ວິທະຍາ​ສາ​ດຂອງ​ໂລກອີກດ້ວຍ.

ຂ້າພະ​ເຈົ້າ​ ຂໍ​ແບ່ງປັນ​ຄວາມ​ໂສກ​ເສົ້າ​ ມ​າຍັງ​ລັດຖະບານ  ​ແລະ ປະຊາຊົນອິນເດຍ ກໍຄື​ຄອບຄົວ​ ແລະ ເພື່ອນມິດ ຂອງ​ທ່ານ ອັບ​ດຸລ ຄາ​ລຳ ມາໃນໂອກາດນີ້ດ້ວຍ” .

ທີ່ມາ: www.kpl.gov.la