ເຊວຊີເລັງດຶງແວຣັດຕິເສີມກາງເດືອນມັງກອນ

 

ເຊວຊີ ຫວັງເພີ່ມຄວາມແຂງແກ່ນໃນແດນກາງ ເມື່ອຫຼ້າສຸດມີຂ່າວວ່າກຳລັງຊັ່ງໃຈດຶງ ມາໂກ ແວຣັດຕິ ຫ້ອງເຄື່ອງຂອງ ປາຣີ ແຊັງ-ແຊັກແມັງ ມາຮ່ວມທັບຊ່ວງເດືອນມັງກອນນີ້ເຖິງວ່ານັກເຕະຫາກໍເຊັນສັນສະບັບໃໝ່ກັບຕົ້ນສັງກັດກໍຕາມ.

 

ເຊວຊີ ສະໂມສອນຍັກໃຫຍ່ຂອງ ພຣີເມຍລີກ ຕົກເປັນຂ່າວເມື່ອວັນພຸດທີຜ່ານມາວ່າກຳລັງພິຈາລະນາທີ່ຈະອອກລ່າໂຕ ມາໂກ ແວຣັດຕິ ກອງກາງທີມຊາດອີຕາລີຂອງ ປາຣີ ແຊັງ-ແຊັກແມັງ ສະໂມສອນດັງຂອງລີກຝຣັ່ງມາເສີມທັບໃນຊ່ວງຕະຫຼາດຊື້ຂາຍນັກເຕະຮອບສອງເດືອນມັງກອນນີ້.

 

ອະນາຄົດໃນຖິ່ນ ປາກ ເດີ ແພຣັງ ຂອງ ດາວເຕະທີມຊາດອີຕາລີເລີ່ມບໍ່ມີຄວາມແນ່ນອນຫຼັງຈາກທີ່ເອເຢນຂອງນັກເຕະອອກມາເວົ້າແຍ້ມໆວ່າອະດີດນັກເຕະ ເປສຄາຣາ ພ້ອມທີ່ຈະພິຈາລະນາທຸກທາງເລືອກ ແລະ ຫຼ້າສຸດ ເດິ ມິນເລີ ສື່ຂອງອັງກິດລະບຸວ່າ ອັນໂຕນິໂອ ຄອນເຕ ຜູ້ຈັດການທີມ ເຊວຊີ ກຳລັງຈັບຕາເບິ່ງສະຖານະການຂອງ ແວຣັດຕິ ເຊິ່ງຫາກໍເຊັນສັນຍາສະບັບໃໝ່ 5 ປີກັບຕົ້ນສັງກັດເມື່ອເດືອນສິງຫາຢ່າງໃກ້ຊິດ ແລະ ຖ້າວ່າມີການຍ້າຍທີມເກີດຂຶ້ນກໍເທົ່າກັບວ່າ ຈອນ ໂອບິ ມິເກວ ມິດຟິວທີມຊາດໄນຈິເລຍກຽມທີ່ຈະອຳລາຖິ່ນ ສະແຕມຝອດ ບຣິດ ເມື່ອໝົດສັນຍາຫຼັງຈົບລະດູການນີ້.

 

ທັງນີ້ ແວຣັດຕິ ເຊິ່ງຍ້າຍມາຈາກ ເປສຄາຣາ ເມື່ອປີ 2012 ໄດ້ແຊມ ລີກແອັງ 4 ສະໄໝ, ເຟຣັນ ຄັບ 2 ສະໄໝ ແລະ ເຟຣັນ ລີກ ຄັບ 2 ສະໄໝກັບ ເປເອັດເຊ.