ເຈົ້າໜ້າທີ່ເຕືອນ!! ພໍ່ຄ້າແມ່ຄ້າຕ້ອງຂາຍສິນຄ້າໃນລາຄາທີ່ກຳນົດ

ຂປລ. ບັນດາ ຜູ້ປະກອບການທຸລະກິດ ຊາວຄ້າຂາຍ ຕ້ອງຈຳໜ່າຍ ແລະ ຂາຍສິນຄ້າ ໃນລາຄາທີ່ລັດກໍານົດ ໃນໄລຍະ ສະເຫລີມສະຫລອງ ບຸນປີໃໝ່ລາວ ພສ 2559 ສະເພາະ ລາຍການສິນຄ້າ ປະເພດຄວບຄຸມ ເຊັ່ນ: ຊີ້ນງົວ, ຄວາຍ, ໝູ ແລະ ປາ. ສ່ວນສິນຄ້າປະເພດອື່ນໆ ແມ່ນຂາຍປົກກະຕິ ຕາມລາຄາທ້ອງຕະຫລາດ.

          ເພື່ອເຮັດໃຫ້ບຸນປີໃໝ່ລາວ ທີ່ຈະມາເຖິງນີ້ ມີຄວາມເປັນລະບຽບຮຽບຮ້ອຍ ເຮັດໃຫ້ການສະເຫລີມສະຫລອງ ເຕັມໄປດ້ວຍບັນຍາກາດ ເບີກບານມ່ວນຊື່ນ ແລະ ມີສິນຄ້າພຽງພໍກັບຄວາມຕ້ອງການຂອງຜູ້ຊົມໃຊ້ ຕິດພັນກັບການຊົມໃຊ້ສິນຄ້າມີຄວາມເປັນທຳ ທາງດ້ານລາຄາ ປະລິມານ ແລະ ຄຸນນະພາບ ບົນພື້ນຖານກົນໄກ ມີການຄຸ້ມຄອງຂອງລັດ ແລະ ບໍ່ໃຫ້ມີການເອົາລັດເອົາປຽບ ລະຫວ່າງ ຜູ້ຂາຍ-ຜູ້ຊົມໃຊ້ ທັງຮັບປະກັນໃຫ້ທົ່ວສັງຄົມ ມີຄວາມສະຫງົບນັ້ນ, ລັດໄດ້ກຳນົດໃຫ້ ຫົວໜ່ວຍທຸລະກິດຈຳໜ່າຍ ສິນຄ້າປະເພດ ຊີ້ນງົວ, ຄວາຍ,ໝູ ແລະ ປາ ຕິດລາຄາ ດັ່ງນີ້: ຊີ້ນງົວ, ຄວາຍ ສູງສຸດບໍ່ໃຫ້ເກີນ 75.000 ກີບຕໍ່ກິໂລ, ຊີ້ນໝູ ປະເພດ 1 ສູງສຸດ ບໍ່ໃຫ້ເກີນ 37.000 ກີບຕໍ່ກິໂລ, ຊີ້ນໝູ ປະເພດ 2 ສູງສຸດບໍ່ໃຫ້ເກີນ 35.000 ກີບຕໍ່ກິໂລ, ຊີ້ນໝູສາມຊັ້ນ ສູງສຸດບໍ່ໃຫ້ເກີນ 33.000 ກີບຕໍ່ກິໂລ ແລະ ປານິນກະຊັງ ສູງສຸດ ບໍ່ໃຫ້ເກີນ 22.000 ກີບຕໍ່ກິໂລ. ໂດຍມອບໃຫ້ຂະແໜງການຄ້າພາຍໃນ, ຫ້ອງການ ອຸດສາຫະກໍາ ແລະ ການຄ້າເມືອງ, ຄະນະຈັດສັນຕະຫລາດທຸກຕະຫລາດ ເອົາໃຈໃສ່ຕິດຕາມ ສິນຄ້າລັດຄວບຄຸມ ແລະ ຄຸ້ມຄອງລາຄາ ບໍ່ໃຫ້ມີການກົດ ລາຄາສິນຄ້າ ຂາດຕະຫລາດ ການສວຍໂອກາດ ກັກຕຸນສິນຄ້າ ເພື່ອປັ່ນປ່ວນລາຄາ ໃນໄລຍະບຸນປີໃໝ່ລາວ ຢ່າງເດັດຂາດ.

ແຫຼ່ງຂ່າວ: Pathedlao Lao.