ເຈົ້າໜ້າທີ່ຢຶດຢາບ້າໄດ້ 4 ລ້ານກວ່າເມັດ ຢູ່ເມືອງຕົ້ນເຜິ້ງ

ໃນວັນ​ທີ 29 ຕຸ­ລາ 2018 ເຈົ້າ​ໜ້າ­ທີ່ ປກສ ກຸ່ມ​ບ້ານ​ໃຫຍ່​ສີ​ເມືອງ​ງາມ ເມືອງ​ຕົ້ນ​ເຜິ້ງ ແຂວງ​ບໍ່​ແກ້ວ, ໄດ້​ປະ­ສານ​ສົມ­ທົບ​ກັບ​ທະ­ຫານ​ເມືອງ​ຕົ້ນ​ເຜິ້ງ ເຂົ້າ​ໄປ​ກວດ­ກາ​ລົດ​ວີ​ໂກ​ທີ່​ແລ່ນ​ເຂົ້າ​ໄປ​ຈອດ​ຢູ່​ທາງ​ແຄມ​ຂອງ ເຂດ​ເໜືອ​ບ້ານ​ໃຫຍ່​ສີ ເມືອງ​ງາມ​ທີ່​ມີ​ທ່າ​ທາງ​ພິ­ລຸດ ພາຍ­ຫຼັງ​ເຂົ້າ​ໄປ​ກວດ​ຈຸດ​ດັ່ງ­ກ່າວ ພົບ​ເຫັນ​ກຸ່ມ​ຜູ້​ຖືກ​ສົງ­ໄສ​ເປັນ​ຊາຍ​ປະ­ມານ 7-8 ຄົນ, ກຳ­ລັງ​ຂົນ​ເປົາ​ເຄື່ອງ​ອອກ​ຈາກ​ເຮືອ ຂຶ້ນ​ໃສ່​ທ້າຍ​ກະ­ບະ​ລົດ​ວີ​ໂກ​ສີ­ຂາວ ໝາຍ​ເລກ​ທະ­ບຽນ ກຈ 2511 ກຳ­ແພງ​ນະ­ຄອນ ເມື່ອ​ກຸ່ມ​ພວກ​ຖືກ​ສົງ­ໄສ​ເຫັນ​ເຈົ້າ​ໜ້າ­ທີ່ ກໍ​ພາ­ກັນ​ແລ່ນ​ເອົາ​ຕົວ​ຫຼົບ­ໜີ​ເຂົ້າ​ປ່າ​ແຄມ​ຂອງ​ໝົດ ທາງ​ເຈົ້າ​ໜ້າ­ທີ່​ຈຶ່ງ​ໄດ້​ເຂົ້າ​ໄປ​ກວດ­ກາ ແລະ ພົບ​ເຫັນ​ເປົາ​ຈຳ­ນວນ 38 ເປົາ ທີ່​ບັນ­ຈຸ​ຢາ​ເສບ​ຕິດ​ປະ­ເພດ​ຢາ​ບ້າ.

ຫລັງຈາກ​ນັ້ນ ເຈົ້າ​ໜ້າ­ທີ່ ປກສ ກຸ່ມ​ບ້ານ​ໃຫຍ່​ສີ​ເມືອງ​ງາມ ໄດ້​ລາຍ​ງານ​ໃຫ້​ທາງ ປກສ ເມືອງ​ຕົ້ນ​ເຜິ້ງ ຮັບ​ຊາບ ແລະ ແຕ່ງ­ຕັ້ງ​ເຈົ້າ​ໜ້າ­ທີ່​ລົງ​ມາ​ສົມ­ທົບ​ກັນ​ກວດ­ກາ​ສະ­ຖານ­ທີ່​ເກີດ​ເຫດ ແລະ ຂອບ​ເຂດ​ບໍ­ລິ­ເວນ​ປ່າ​ອ້ອມ​ຂ້າງ ແລະ ໄດ້​ພົບ​ເຫັນ​ເປົາ​ຢາ​ບ້າ​ຊຸກ­ເຊື່ອງ​ໄວ້​ໃນ​ປ່າ​ອີກ​ຈຳ­ນວນ 5 ເປົາ.

ຜ່ານ​ການ​ກວດ­ກາ​ຂອງ​ເຈົ້າ​ໜ້າ­ທີ່​ໃນ​ເບື້ອງ​ຕົ້ນ​ໃຫ້​ຮູ້​ວ່າ ຢາ​ບ້າ​ທັງ​ໝົດ​ມີ​ຈຳ­ນວນ 43 ເປົາ, ທີ່​ບັນ­ຈຸ​ຢາ​ບ້າ​ເປົາ​ລະ 50 ມັດ, ລວມ​ມີ 2.150 ມັດ ປະ­ກອບ​ມີ 4.300.000 ເມັດ, ປັດ­ຈຸ­ບັນ ເຈົ້າ​ໜ້າ­ທີ່​ໄດ້​ຢຶດ​ຢາ​ບ້າ​ຈຳ­ນວນ​ດັ່ງ­ກ່າວ ພ້ອມ​ດ້ວຍ​ລົດ​ກະ­ບະ​ວີ​ໂກ ແລະ ເຮືອ​ອີກ 1 ລຳ​ໄວ້​ເປັນ​ຫຼັກ​ຖານ ສ່ວນ​ຜູ້​ຖືກ​ຫາ​ທີ່​ກຳ­ລັງ​ເອົາ​ຕົວ​ຫຼົບ­ໜີ​ນັ້ນ ເຈົ້າ​ໜ້າ­ທີ່​ກຳ­ລັງ​ຕິດ­ຕາມ​ນຳ​ຈັບ​ຕົວ​ມາ​ດຳ­ເນີນ​ຄະ­ດີ​ຕາມ​ກົດ­ໝາຍ.

cr:ຫນັງສືພິມວຽງຈັນໃຫມ່