ເຈົ້າໜ້າທີ່ພາສີ ຢຶດເງິນຕາຈຳນວນຫຼາຍ ທີ່ກຽມນຳອອກຕ່າງປະເທດ

ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ຕ້ານ ແລະ ສະ­ກັດ​ກັ້ນ​ປາ­ກົດ­ການ​ຫຍໍ້­ທໍ້​ຕ່າງໆ ພາຍ​ໃນ​ດ່ານ​ພາ­ສີ​ສາ­ກົນ​ຂົວ​ມິດ­ຕະ­ພາບ 1 (ນະ­ຄອນ­ຫຼວງ​ວຽງ​ຈັນ-ໜອງ​ຄາຍ) ເຈົ້າ​ໜ້າ­ທີ່​ພາ­ສີ ໄດ້​ເອົາ­ໃຈ­ໃສ່​ໃນ​ການ​ປະ­ຕິ­ບັດ​ໜ້າ­ທີ່​ຢ່າງ​ເຂັ້ມ​ງວດ ເປັນ­ຕົ້ນ​ການ​ກວດ­ກາ​ພາ­ຫະ­ນະ ແລະ ຜູ້­ໂດຍ­ສານ​ເຂົ້າ-ອອກ​ປະ­ເທດ​ຜ່ານ​ດ່ານ ລ່າ​ສຸດ​ໃນ​ວັນ​ທີ 31 ຕຸ­ລາ 2018 ເຈົ້າ​ໜ້າ­ທີ່​ພາ­ສີ​ສາ­ມາດ​ຢຶດ​ເງິນ​ໄດ້​ຕື່ມ​ອີກ ທີ່​ກຽມ​ນຳ​ເງິນ­ຕາ​ອອກ​ນອກ​ປະ­ເທດ.

ອີງ​ຕາມ​ການ​ລາຍ​ຂອງ​ທ່ານ ບຸນ​ແອງ ພັນ­ທະ​ວົງ ຫົວ­ໜ້າ​ດ່ານ​ພາ­ສີ​ສາ­ກົນ​ຂົວ​ມິດ­ຕະ­ພາບ 1 ນະ­ຄອນ­ຫຼວງ​ວຽງ​ຈັນ-ໜອງ​ຄາຍ ໃຫ້​ຮູ້​ວ່າ: ວັນ​ທີ 31 ຕຸ­ລາ 2018 ເວ­ລາ 10:25 ໂມງ ເຈົ້າ​ໜ້າ­ທີ່​ພາ­ສີ​ໄດ້​ຮັບ​ແຫຼ່ງ​ຂ່າວ​ວ່າ ຈະ​ມີ​ການ​ລັກ­ລອບ​ເງິນ­ຕາ​ອອກ​ນອກ​ປະ­ເທດ ພ້ອມ​ກັນ​ນັ້ນ ຈຸ​ງານ​ກວດ­ກາ​ພາ­ຫະ­ນະ-ຜູ້­ໂດຍ­ສານ ແລະ ໜ່ວຍ​ງານ​ທີ່​ກ່ຽວ­ຂ້ອງ​ໄດ້​ກຽມ­ພ້ອມ​ກວດ­ກາ ພໍ​ມາ​ຮອດ​ເວ­ລາ 11:37 ໂມງ ໄດ້​ພົບ​ເຫັນ​ລົດ​ເປົ້າ​ໝາຍ ຈຶ່ງ​ຂໍ­ອະ­ນຸ­ຍາດ​ກວດ­ກາ​ລະ­ອຽດ​ພົບ​ເຫັນ​ເງິນ​ໂດ​ລາ​ສະ­ຫະ­ລັດ 170.000 ໂດ​ລາ ເງິນ​ໂດ​ລາ​ອົດ​ສະ​ຕຣາ​ລີ 7.470 ໂດ​ລາ ແລະ ເງິນ​ເອີ​ໂຣ 3.145 ເອີ​ໂຣ ທີ່​ຊຸກ­ເຊື່ອງ​ໃນ​ກະ­ເປົາ​ເປ້​ສີ­ດຳ​ໃນ​ລົດ​ກະ­ບະ ໝາຍ​ເລກ​ທະ­ບຽນ ຂກ 6633 ກຳ­ແພງ​ນະ­ຄອນ ກຽມ​ນຳ​ເງິນ­ຕາ​ອອກ​ນອກ​ປະ­ເທດ ຕີ​ເປັນ​ມູນ​ຄ່າ​ເງິນ​ກີບ​ຫຼາຍ​ກວ່າ 1,5 ຕື້​ກີບ ປັດ­ຈຸ­ບັນ ເງິນ​ຈຳ­ນວນ​ດັ່ງ­ກ່າວ ແລະ ພາ­ຫະ­ນະ​ເຈົ້າ​ໜ້າ­ທີ່​ພາ­ສີ ໄດ້​ຢຶດ​ໄວ້​ເປັນ​ຂອງ​ກາງ ເພື່ອ​ດຳ­ເນີນ​ການ​ຕາມ​ລະ­ບຽບ​ພາ­ສີ ແລະ ລະ­ບຽບ​ການ​ຕ່າງໆ ສ່ວນ​ຜູ້​ຕ້ອງ​ຫາ​ຈຳ­ນວນ 3 ຄົນ (ຊາຍ 1 ຄົນ ແລະ ຍິງ 2 ຄົນ) ໄດ້​ມອບ​ໃຫ້​ເຈົ້າ​ໜ້າ­ທີ່ ຕມ ປະ­ຈຳ​ດ່ານ​ສືບ­ສວນ-ສອບ​ສວນ ຕາມ​ວິ­ຊາ​ສະ­ເພາະ ແລະ ດຳ­ເນີນ​ຄະ­ດີ​ຕາມ​ລະ­ບຽບ​ການ ແລະ ກົດ­ໝາຍ​ຂັ້ນ​ຕໍ່​ໄປ.

 ທ່ານ​ຫົວ­ໜ້າ​ດ່ານ​ພາ­ສີ​ສາ­ກົນ​ຂົວ​ມິດ­ຕະ­ພາບ 1 ຍັງ​ໃຫ້​ຮູ້​ຕື່ມ​ວ່າ: ນັບ​ແຕ່​ເດືອນ​ມັງ­ກອນ​ຫາ​ເດືອນ​ຕຸ­ລາ 2018 ທີ່​ດ່ານ​ພາ­ສີ​ສາ­ກົນ​ຂົວ​ມິດ­ຕະ­ພາບ 1 (ນະ­ຄອນ­ຫຼວງ​ວຽງ​ຈັນ-ໜອງ​ຄາຍ) ໄດ້​ມີ​ປາ­ກົດ­ການ​ຫຍໍ້­ທໍ້​ກ່ຽວ​ກັບ​ຄະ­ດີ​ເງິນ 7 ຄະ­ດີ ຕີ​ເປັນ​ມູນ​ຄ່າ​ເງິນ​ກີບ​ຫຼາຍ​ກວ່າ 6 ຕື້​ກີບ ໃນ​ນັ້ນ ວັນ​ທີ 17 ມັງ­ກອນ 2018 ສາ­ມາດ​ຢຶດ​ໄດ້ 602.000 ບາດ, ວັນ​ທີ 9 ເມ­ສາ 2018 ຢຶດ​ໄດ້ 2.050.000 ບາດ, ວັນ​ທີ 18 ພຶດ­ສະ­ພາ 2018 ຢຶດ​ໄດ້ 4.000.000 ບາດ, ວັນ​ທີ 4 ກັນ­ຍາ 2018 ຢຶດ​ໄດ້ 230.000 ໂດ​ລາ​ສະ­ຫະ­ລັດ,ວັນ​ທີ 20 ກັນ­ຍາ 2018 ຢຶດ​ໄດ້ 2.000.000 ບາດ, ວັນ​ທີ 29 ຕຸ­ລາ 2018 ຢຶດ​ໄດ້ 1.400.000 ບາດ ,ວັນ​ທີ 31 ຕຸ­ລາ 2018 ຢຶດ​ໄດ້ 170.000 ໂດ​ລາ​ສະ­ຫະ­ລັດ 7.470 ໂດ​ລາ​ອົດ​ສະ​ຕຣາ​ລີ ແລະ 3.145 ເອີ​ໂຣ.

ສຳ­ລັບ​ຄະ­ດີ​ດັ່ງ­ກ່າວ ໄດ້​ສະ​ສາງ​ໄປ​ແລ້ວ 5 ຄະ­ດີ ມີ​ມູນ​ຄ່າ​ທັງ​ໝົດ 2,66 ຕື້​ກີບ ໄດ້​ປັບ​ໃໝ​ເງິນ​ເຂົ້າ​ງົບ­ປະ­ມານ 576 ລ້ານ​ກີບ ຍັງ​ຄ້າງ​ສະ​ສາງ 2 ຄະ­ດີ ປັດ­ຈຸ­ບັນ​ກຳ­ລັງ​ລາຍ​ງານ​ຂັ້ນ​ເທິງ ເພື່ອ​ຂໍ​ທິດ​ຊີ້​ນຳ​ໃນ​ການ​ແກ້​ໄຂ​ຄະ­ດີ​ດັ່ງ­ກ່າວ ລວມ​ມູນ​ຄ່າ 3,49 ຕື້​ກີບ ຖ້າ​ສະ​ສາງ​ແລ້ວ​ຈະ​ໄດ້​ເງິນ​ເຂົ້າ​ງົບ­ປະ­ມານ 1,6 ຕື້​ກີບ.

cr:ຫນັງສືພິມວຽງຈັນໃຫມ່